Apocalipse 18 - Tradução Bíblica Pacaas Novos

Ca to' om pin xine Babilônia ca tomi' joc mam' mi' nam caxicam narima'

¹ An hwet mi' iri napa' pain carawa ca hwet pa' xim tacama caxicam narima' jam co taramaja mi' non Iri' Jam ne, querec ac ton na xucun jam co taramaja mi' non Iri' Jam. Quiji' qui' nain pawin. Hwara' opa tamana na. Toc meremem tamana na, toha mi' nain oro xijein macan'.

² Merem mip ac ca na: Om pin na, om pin na Babilônia co hwara' opa tamana nana oro wari' nein ma'. Ma' e' nana oro caxicon jam co om querec awi nana ma', wiricoco co xaraxa to nanain Babilônia pain xocori ca'. Oro caji me co om querec awi ma', co noc tamana ca Iri' Jam, je ca xaraxa to nain quem.

³ Xi ara em' pin ara tococwa oro wari' co to nanain oro xijein macan' ta. Ac ca toc jein ta tococwa na pain comi uva ca mana' ma', ca tomi' joc mam' mi' nain oro ca param ximama' cama caxicam narima' ma'. Ac ca caracat wi xi' ta tococwa na oro xucucun taramaxicon co taramaxicon to nanain oro xijein macan' ma', pain ca param ni ca' xun Iri' Jam ta tococwa ma'. Oro wari' co maqui' nanain oro xijein macan' ma', co vender taxipa' nanain oro carawa ma', caramaju tamana pin nana, xi om ne ca param ximama' ara cacain oro carawa ca awi oro wari' nein Babilônia ta. Ac i ma' na ca tomi' mip capa' jam co taramaja mi' non Iri' Jam ma', co quiji' qui' nain pawin ma'.

⁴ Taraju ac tain na xijein ca tomi' wa ca maqui' nain pawin. Tomi' ac ne na: Wahu' pain ca wari' ne xuhu' ca', taraju wet xine. Paca' jein Babilônia ma'. Ma' ta om caracat wi hwe cocon pain ca pan teretem nucucun oro wari' co to nanain ta inuhu'. Ma' ta om wap wi xihwe pain ca camara' hwet cocon oro ca xirac wa ta inuhu'.

⁵ Xi mija pin ara ne ca caracat nucucun ta. Ac ca moin' tamana cocon na ca caracat nucucun, ac ca xi' xi' hwet nein na pawin cocon. Om ca ji'am pin cocon Iri' Jam quem, mam' pe wet nain ca pan teretem nucucun.

⁶ Win huhun pane jujun. Ca quep em' pan cocon oro wari' pane, ac i ma' tara ca quep em' tamana pan huhun ta. Win cocon oro wari' pane, pain ca ac ca ji'ao mi' cocon ne pain iri' ca mana' nein comi uva ma', ca om joc wanan xine pain com ma', ac i ma' tara pain ca ac ca ji'ao mi' tamana pan huhun ne pain comi uva ca mana' quem.

⁷ Mija na ca xin to tamana caca, mija na ca waraju tamana cacain oro caramaxicocon ca mam' tomi' querec te ximama' caca ma'. Ac i ma' tara ca jain jain tamana nucucun, ac i ma' tara ca tomi' xaxa' tamana nucucun quem. Xi coromicat ac i ca' pan ara xucucun pain ximicocon ma', pain ca an xiho' cacam caxicam narima' ma' ta: Wata' co iri' taramaxicon ta. Om ca an xiho' tatam oro narima' co cono' ca' nanam waram taxicacam ma', co awaran nonon ma', xi ma' capa' tarama' ta. Om ta tomi' xaxa' camain' ta' ta. Ac i ma' na ca coromicat pan xucucun pain ca an xiho' cacam caxicam narima' ma'.

⁸ Je ca wap hap xun tococwa ta. Xica' pe tara xec nein ca maqui' pa' hap cocon oro ca xirac wa. Ma' tatara oro win ma' caca co cono' pin nana. Tomi' xaxa' tamana ac caca tara. Om pin totoron carawa ca cao' wa, pe' ac caca tara. Tom pin ac tococwa tara quem. Xi om ne ca hwara' opa pan ara ca Iri' Jam co iri' Taramaxicon ma', co wap toton nonon ma'. Ac i ma' na ca tomi' wa ca maqui' nain pawin.

⁹ Tomi' tomi' tiquin' ac ca na co tomi' qui' nain pawin: Oro xucucun taramaxicon co taramaxicon to nanain oro xijein macan' ma', co caracat wi nana cocon oro wari' nein Babilônia ma', pain ca param ni ca' cocon Iri' Jam ma', co waraju wi nonon pain oro caramaxicocon ca mam' tomi' querec te ximama' caca ma', querec iri tatarain tain' pain ca tom pin tococwa ma' ne, awaran tamana ac tococwa tara.

¹⁰ Jin' tamana tatara, am wap xim cacapari' quem tatara. To pira ca' e' totoron, merem ac caca tara: Wa urut pahu' ta oro wari' nein Babilônia! Ximin hwe! Wa wa tamana paxi' nunuhu' oro wari' pane ira. Hwara' opa tamana paxi' hwe pane ira. Ane maqui' pa' hap cuhu' carawa ca to' ximin nuhu' ne, pain ca wap pin cuhu' Iri' Jam. Ane ane ximin pin hwe ta. Ac i ma' tara ca merem caca oro xucucun taramaxicon.

¹¹ Oro wari' co maqui' nanain oro xijein macan' ma', co vender taxipa' nanain oro carawa ma', awaran tamana tatara, xi om pin ara caca wari' co cut xin nanain carawa nucucun.

¹² Mo na oro carawa ca vender taxipa' caca ma': Ouro, je prata, je oro pacun ca awi tamana, je oro wirain pacun ca awi ca pérola caca ma'. Vender taxipa' nonon oro wom co awi tamana, co mija dinheiro nucun ma', oro wom co quep maram toto, oro wom co paca' ma' quem. Vender taxipa' nanain oro xijein pana ca hu awi ma', je oro ca mam' quep xine pain xinain elefante ma', ca mam' quep xine pain oro pana ca awi tamana, je oro ca mam' quep xine pain oro too ma', bronze pain ferro ma', je oro pacun ca awi ca towo' tamana ma' quem.

¹³ Vender taxipa' nanain canela ca hu toto pain ca tom nein ma', je oro homain pana ca hu awi ma', je incenso ma', je oro caji towaxi' ca hu awi ma' quem. Vender taxipa' nanain oro comi uva, je oro homain winain oliva, je oro ca tarara nein trigo je tocwi ma' quem. Vender taxipa' nanain boi je ovelha je cavalo je carroça ca mam' jein ne ma' quem. Vender taxipa' nonon wari' ma' quem. Mi' xut pain dinheiro cocon caram cwa', taramaja mi' e' tuturuhu' ta nonon, mi' ac tococwa na pain cocon quem. Om pin na wari' co cut nanain oro ca vender taxipa' caca.

¹⁴ Tomi' ac tococwa tara oro wari' nein Babilônia ma', co tomi' joc mam' mi' nanam caxicam narima' co param ni ca' non taxicam: Om pin na oro carawa ca awi ca param tamana hwe pane ira. Pan' ara'am ca' nuhu' oro caramajuhu' ca awi ma', ca mam' xec xec hwe pane. Om ta mam' mami' camain' hwein. Ac i ma' na ca tomi' tococwa ma'.

¹⁵ Oro wari' co vender taxipa' nanain carawa ma', co caramaju pin nana pain ca vender mi' cocon pain carawa oro wari' pain Babilônia ma', to pira ca' ac cocon tara. Jin' tamana tatara, am wap xim cacapari' ta tatara. Awaran tamana tatara,

¹⁶ merem ac caca tara: Wa urut pahu' pain ca to hwein cidade ma', pain Babilônia ma'. Ximin hwe! Wa wa tamana paxi' nunuhu' oro wari' pane ira. To paxi' hun wom co awi tamana, co mija dinheiro nucun pane, to paxi' hun wom co paca' pane quem. An warawa paxi' xujuhu' pain oro xijein too ca mam' xec xec hwe pane, je oro pacun ca awi tamana, je oro xijein wijimain pacun ma' quem, pérola ma'.

¹⁷ Maqui' pa' hap nuhu' carawa ca to' ximin nuhu' ma', pain ca to' om pin xine oro caramajuhu'. Ac i ma' na ca merem caca oro wari' co vender taxipa' nanain oro carawa ma'. Oro taramaxicon nein cote ne mam' horoho wa ma', cocon oro wari' co to nanain ma', cocon oro wari' co taramaja to nanain ma', cocon oro xucucun wari' co cut nana dinheiro pain ca taramaja to cacain cote ne com ma' quem, to pira ca' totoron quem.

¹⁸ Querec iri tatarain tain' pain ca tom pin xine Babilônia ne, merem ac caca tara: Om ca ma' camain' ne xijein cidade ca an xiho' nain Babilônia ma', ca wa wa caca oro wari' ma', ac i ma' tara ca merem nucucun.

¹⁹ Wixicaracao' mi' ac xucucun tara pain winacocon pain tajain macan'. Awaran tamana tatara, mija tatara. Merem ac caca tara: Wa urut pahu' ta oro wari' nein cidade ma'. Ximin hwe! Wa wa tamana paxi' nunuhu' oro wari' pane ira. Caramaju pin paxi' nana oro waximain cote ne mam' horoho wa, xi om ne oro caramajuhu' pane ta. Ane to' om pin xine ne. Ane ane ximin hap hwe ta. Ac i ma' tara ca merem nucucun.

²⁰ Merem ac tococwa tara oro wari' nucun Iri' Jam: Wahu' pain ca to hwein pawin ma', tomi' querec te tamana je! Wahu' quem, pain ca wari' nucun Iri' Jam hwe ma', wahu' quem oro apóstolo cocon oro profeta ma' quem, tomi' querec te tamana je! Wap pin nonon oro wari' nein Babilônia Iri' Jam ma', wap pin nonon oro co an xiho' nanam caxicam narima'. Xi om ne ca quep em' ara cuhu' pane ta. Ac i ma' tara ca merem tococwa ma'.

²¹ An ac cain na cote ne pacun jam co hwara' opa ma', co taramaja mi' non Iri' Jam. Cote ne pacun ta, ac iri' cote ne pacun ca mam' ep wa ma'. Xin pocom pin ac ca na pain cote ne com. Tomi' ac ca na: Ac i ma' tara ca xin mi' xine pain macan' cote ne cidade ma', Babilônia ma', ca wa wa tamana caca oro wari'. Om ta querec mami' camain' xine.

²² Tomi' pan inuhu' ta oro wari' nein Babilônia. Oro win ma' nuhu' co tao' nanain ca ac violão pane, co com nanain tamara' pane quem, om ta taraju mami' camain' tococwa. Co on nanain oro caji xiwiwio' je caji taracom pane, om ta taraju mami' camain' tococwa quem. Co quep taxi' nanain oro carawa pane, oro co taramaja to ho' nunuhu' pane, om pin nana, om ta mam' mami' camain' tococwa. Co ep nana pane, om ta taraju mami' camain' tacacama pain ca ep cacama ma'.

²³ Om ta tom xica' pe camain' ne naran pain oro xuruhu'. Om ta taraju mami' tocwa wari' ma', pain ca tomi' cam manacon pain ca tomi' querec te xequequem pain ca xo' an xequequem ma'. Hwara' opa paxi' nana oro win ma' nuhu' co vender tiquin' taxipa' nanain carawa nucucun pain oro xijein macan' ma'. Ane mixein mixein pi' pin cocon oro wari' co to nanain oro xijein macan' ne. Ara xirac nonon oro wari'. Ac i ma' na ca tomi' ca jam co taramaja mi' non Iri' Jam ma', co xin mi' na pain com cote ne pacun ma'.

²⁴ Wap pin tata oro wari' nein Babilônia, xi om ne ca to' parapa' to ara tococwa pain cidade nucucun oro profeta cocon oro wari' nucun Iri' Jam pane ta. Tomi' em' pin tata cocon oro xucucun wari' co to' parapa' pin wawa pain oro xijein macan' ma' quem.