Apocalipse 17 - Tradução Bíblica Pacaas Novos

Caxicam narima' co hwet tamana wixicam

¹ Hwet ac capa' na jam co taramaja mi' non Iri' Jam ma', co win ma' ne nonon co cut nanain too ca ma' 7 ma', ca moin' pe nain oro ca xirac wa ma'. Tomi' ac capa' na: Hap ra, an hwet mi' xim pain carawa ca hwet pa' tam nam caxicam narima' ma', co hwara' opa paxi' ma', co xao pe pe nain ca mija pe nein oro iri' cwerein com ma'. An hwet mi' xim pain carawa ca ara tam cam Iri' Jam ma', pain ca wap tam cam ma'.

² Caracat wi xi' ta nonon oro taramaxicon co taramaxicon to nanain oro xijein macan', win ne ca param ni ca' ton taxi cwa', param ni ca' jun Iri' Jam ta nonon. Oro wari' co to nanain oro xijein macan' ma' quem, ac ca toc tamanain to cacain na comi uva nequem ca mana' ma', ca tomi' joc mam' mi' nain oro ca om awi wa ca ara cama pain ca caracat wi cocon oro xucucun taramaxicon.

³ Pe ho' mip ac capa' na Tamataracon Iri' Jam. O mao ac capa' na jam co taramaja mi' non ma', o mao napa' pain mahweri. Querec ac tam na narima' co xao pe pe nain xunucun co ma' co ac caji carawa co hwet qui' cain' ma', co paca' ma'. Xirao' pe xirao' pe xam' ta pain oro curucun oro ca om awi wa ca tomi' napat non Iri' Jam. Ma' 7 na winacon, ma' 10 na pixicon quem.

⁴ Caxicam narima' ma', pe non wom co tum ma', co paca' ma' quem. Mija na dinheiro nucun womicam. An warawa pan xequem pain oro xijein too ca mam' xec xec cama ma' quem, je ouro, je oro pacun ca awi tamana, je oro xijein wijimain pacun ma' quem, pérola na wixinain. An na pain micam ouro ca moin' pe nain oro ca om awi ma', ca noc tamana pan ca Iri' Jam. Moin' pe nain oro ca pan tem tamana nequem pain ca param ni ca' con Iri' Jam ma'.

⁵ Xirao' pe na pain jitaracam wixicam quem. Ma' na ca tomi' mao ne wixicam, i'ina na ca taraju pa' xine ca tomi' mao nein. Ca' na ca xirao' pe nein wixicam: Babilônia cwa', co hwara' opa tamana nana oro wari' nequem cwa', ac ca wijima cacam na oro caxicam narima' co param ni ca' nonon waram taxicacam ma'. Ca' na nanam pain oro ca pan teretem wa ca noc pan ca Iri' Jam. Je i ma' ca tomi' mao nein wixicam ca xirao' pe xine pain jitaracam.

⁶ Querec pin' inam pain ca hohot tamana cam ca to' parapa' pin tococwa oro wari' nucun Iri' Jam pain ca howa cara cocon Jeju ma'. Pain ca tomi' querec te nequem pain ca cono' pin nucucun ma', ac ca toc tamanain pe camain na quicocon. Querec iri inam ne, wa wa tamana ac tam na.

⁷ Tomi' ac capa' na jam co taramaja mi' non Iri' Jam: Para wa wa tamana mam narima' ma' quem? Tomi' xo' xim cam, tomi' xo' xim pain carawa ca tomi' joc mam' mi' cama ma'. Tomi' xo' xim pain carawa ca tomi' joc mam' mi' ca co ma' co ac caji carawa co hwet qui' cain' ma', co xao pe pe cama ma', co ma' 7 ne winacon ma', co ma' 10 ne pixicon ma' quem.

⁸ Co ac caji carawa co querec ma ma', e' paxi' na ira, ane om e' mami' ca pain xocori ca' ne. Mi' pin na. Wara piri' ca' tain nain cote ne man ca om tawirinain cain. Main to' om pin ac tocwa tara ta, ame ma e'. Oro wari' co to nanain oro xijein macan' ma', co om xirao' to wa wixicocon pain tapari carawa ca xirao' to xine wixicocon oro wari' co e' cara xi' nana ma', co om xirao' to wa wixicocon pain ca om tomi' ma' pin querec xine macan' pain cara pane quem, querec iri totoron co ac caji carawa co ma' 7 ne winacon ma' ne, wa wa ac cocon tara. E' paxi' na ira, ane om e' mami' ta' ca pain xocori ca' ne. Ame ma e', main e' mami' tara quem, ac i ma' na ca tomi' capa' ma'.

⁹ Mo ta coromicat xo' ma, ha' terem pain ca taraju pa' wa ta ac capa' na. Winacon co ac caji carawa ma', ca ma' 7 ma', tomi' joc mam' mi' nain oro ca tamaja ne macan' ca ma' 7 ma' quem, ca xao pe pe cama narima' ma'.

¹⁰ Oro winacon ma', an xiho' nonon oro taramaxicon co ma' 7 nana ma' quem. Wara to' om 5 pin tata, taramaxicon taramaxicon wet ac ca na xucun ma', om ca maqui' querec ca xucun ma' quem. Maqui' pin iri tara xucun ne, mi' ac tocwa tara pain ca taramaxicon wijimain e' ca, om ta taramaxicon cara ca.

¹¹ Co ac caji carawa co hwet qui' cain' ma', co e' paxi' pane, co om e' mami' pain xocori ca', tomi' joc mam' mi' non taramaxicon quem. To' 8 pin nonon oro xucucun taramaxicon co ma' 7 nana ma'. To' om pin ac tocwa tara quem.

¹² Tomi' tomi' tiquin' ac capa' na: Querec main oro pixicon co ma' co ac caji carawa ma'. Ma' 10 na. Oro pixicon ma', tomi' joc mam' mi' nonon oro taramaxicon co ma' 10 nana quem. Om ca taramaxicon querec caca, ame ma e'. Mi' xun ac tococwa tara pain ca taramaxicon wa. Taramaxicon wi tatara con co ma' co ac caji carawa ma'. Om ta taramaxicon cara caca, pi' pin hap tara ca taramaxicon nucucun.

¹³ Xin ne ac xucucun tara, an an ari tara ca coromicat nucucun. Tomi' xo' ac xucucun tara, mi' xun pain ca hwara' opa nexi' co ma' co ac caji carawa ma', co hwet qui' cain' ma', taramaxicon pan ac ca tara ta, ac i ma' tara ca tomi' xo' xucucun.

¹⁴ Mixita paxi' totoron co ma' co ac Wijimain Taramaji Ovelha ma', ane to' quiji' pin xun tococwa ne, xi wirico pan ara ne co hwara' opa tamana pan, co taramaxicon hwara' opa tiquin' ca' nonon oro xucucun taramaxicon ma'. Oro wari' co tora' ca ma', co howa xine ca ma', co win xumu nonon ma', to' quiji' wi totoron cocon oro xucucun taramaxicon. Ac i ma' na ca tomi' capa' jam co taramaja mi' non Iri' Jam.

¹⁵ Tomi' tomi' tiquin' ac capa' na quem. Oro iri' cwerein com ca querec ma ma', ca xao pe pe cama caxicam narima' ma', tomi' joc mam' mi' nonon oro wari' co to nanain oro xijein macan'. Mija nana, capija ni ca' xucucun.

¹⁶ Co ma' co ac caji carawa co hwet qui' cain' ma', wiricoco co ac oro pixicon co ma' 10 nana ma' quem, noc pin tataram caxicam narima'. Cut ca' cut ca' pi' pin tataram pain oro carawa nequem. Womicam quem, hot ca' tataram con womicam, hwet pe ac ne tara cwerequem. Cao' pin ac cacain tara cwerequem, tom tom pi' pin ac cacam tara quem.

¹⁷ Wirico Iri' Jam ara xi' na co an pe mi' nonon pain ximicocon pain ca ara xin cacain ca param pan nucun. Wirico Iri' Jam pan co mi' nonon pain ca tomi' xo' xucucun ma', pain ca mi' xun pain ca hwara' opa nexi' pain ca taramaxicon iri' ca' cocon co ma' co ac caji carawa co hwet qui' cain' ma', pain ca taramaxicon pan ra ta cocon ma'. Taramaxicon ac ca tara, taramaxicon taramaxicon maqui' pa' ac con tara xec nein ca ara ara pi' pin tain cain oro ca wara tomi' pe pan nucun Iri' Jam. Taramaxicon taramaxicon om pin ac ca tara ta.

¹⁸ Narima' co querec ma ma', tomi' joc mam' mi' nain cidade ca wa wa caca oro wari' ma'. Wiricam co taramaxicon pe ho' nonon oro xucucun taramaxicon co taramaxicon to nanain oro xijein macan'.