Apocalipse 16 - Tradução Bíblica Pacaas Novos

Oro too ca moin' to nein oro ca xirac wa ca tomi' joc mam' mi' nain ca mana' tamana nucun Iri' Jam

¹ Taraju ac tain na ca tomi' wa ca maqui' nain xiricon Iri' Jam. Tomi' mip tata oro jam co taramaja mi' non Iri' Jam, co ma' 7 nana ma': Wara mama' je ta, cut jein too nuhu' ca ma' 7 ma', ca moin' pe nain oro ca xirac wa ma'. Ji'ao mi' jujun pain oro wari' co to nanain oro xijein macan' ta. Ac i ma' na ca tomi' mip tococwa ma'.

² Xucun ma', co mao cain' ta' ma', mao ac ca na, ji'ao pin ac cain na ca xirac wa ca moin' pe nain too nucun. Ji'ao mi' nain pain oro xijein macan'. Ji'ao mi' iri nain pain ne, nona pin ac caca na oro wari' co xirao' xirac wawa pain wixicon co ma' co ac caji carawa co hwet qui' cain' ma'. Nona pin nana co pe torotop mi' querec te nanain pacun ca ara an xiho' xine curucun ma'. Om ca xio camain' ne oro nonacocon. Caxi tamana nonon.

³ Mao ac ca na xucun ma', co ja' corom mao non ma', ma' 2 pin ac caca na jam co mama' nana. Ji'ao pin ac cain na ca xirac wa ca moin' pe nain too nucun. Ji'ao mi' nain pain cote ne com ma'. Ji'ao pin iri nain ne, wic pin ac ne na com. Ac quicon wari' co mi' pin ma'. Corojo na, taracu na. Cono' cono' pi' pin ac ne na oro carawa ca to nain oro com.

⁴ Mao ac ca na xucun ma', co ja' corom mao nonon win ma' ca ma', ma' 3 pin ac caca na jam co mama' nana. Ji'ao pin ac cain na ca xirac wa ca moin' pe nain too nucun. Ji'ao mi' nain pain oro iri' cwerein com je oro ca hoi hoi ne com ca weweweo qui' nain macan'. Ji'ao mi' iri nain pain ne, wic pin ac ne na quem.

⁵ Tomi' ac con Iri' Jam na jam co taramaja mi' non ma', co querec wet nain oro com ma'. Taraju inon pain ca tomi' nucun: Wum co ara xo' taxipa' ma' ta Iri' Jam. Wum co awi tamana ma', pain ca pe ni ca' main ca caracat wa ma'. Wum co ma' cara cwa', co wara ma' pain cara pane quem. Xi om ne ca ara xo' ara ma pain ca wap xo' momon oro caracat ta.

⁶ Xi to' parapa' pin ara cocon oro wari' nem cocon oro profeta nem ta. Ara xo' ma pain ca win hwe pane momon pain ca toc jein wic ca' momon ta. Ac i ma' na ca tomi' ca jam co taramaja mi' non Iri' Jam ma', co querec wet nain oro com ma'.

⁷ Taraju ac tain na ca tomi' wa ca maqui' nain pana ca in ac pe tocwa Iri' Jam. Tomi' ac ne na: Iri'o' na ca tomi' ca co ma' ta Taramaxicon Iri' Jam co hwara' opa pan. Iri'o' taxipa' ma, ara xo' taxipa' ma pain ca wap momon oro caracat. Ac i ma' na ca tomi' ne ma'.

⁸ Mao ac ca na xucun ma', co ja' corom mao nonon win ma' ca ma', ma' 4 pin ac caca na jam co mama' nana. Ji'ao pin ac cain na ca xirac wa ca moin' pe nain too nucun. Ji'ao mi' non pain xina. Ji'ao mi' iri non pain ne, mi' ac tocwa na pain ca xain mip cocon oro wari'. Ac xe nonon xina.

⁹ Jam' tamana nonon. Tomi' noro ac cocon na Iri' Jam ma', co to' jain jain nonon pain oro ca xirac wa ma'. Ximin paxi' nana, ane om cwirin' je ha' caca ne. Om ca in ac jun ha' cocon Iri' Jam quem.

¹⁰ Mao ac ca na xucun ma', co ja' corom mao nonon win ma' ca ma', ma' 5 pin ac caca na jam co mama' nana. Ji'ao pin ac cain na ca xirac wa ca moin' pe nain too nucun. Ji'ao mi' nain pain ca mam' xao pe pe ca co ma' co ac caji carawa co hwet qui' cain' ma'. Ji'ao mi' iri nain pain ne, xim pin ac ne na pain oro xijein macan' ca taramaxicon pe ca quem. Caxi tamana nana oro wari', quio quio nanain petehwet nucucun, xi om ne ca caxi tamana ara caca ta.

¹¹ Tomi' napat nonon Iri' Jam co pe pawin ma', xi caxi tamana ara cocon oro nonacocon ta. Ximin paxi' nana, ane om cwirin' je ha' cacain oro ca om awi wa ca ara taxipa' caca ne.

¹² Mao ac ca na xucun ma', co ja' corom mao nonon ma', ma' 6 pin ac caca na jam co mama' nana. Ji'ao pin ac cain na ca xirac wa ca moin' pe nain too nucun. Ji'ao mi' nain pain cote ne iri' cwerein com ma', pain Eufrates ma'. Ji'ao mi' iri nain pain ne, am pin ac ne na quem. Pit pin na com. Ac ca wara quep xo' mi' tococwa na pain wana oro taramaxicon co maqui' xi' nana pain pira cain, pain ca maqui' ac ca xina cain.

¹³ Querec ac toton na oro caxicon jam co ac tururu nana. Ma' 3 nana. Hwet qui' nain capijacon co ma' co ac caji hop xucun. Xucun ma', hwet qui' nain capijacon co ma' co ac caji carawa co hwet qui' cain' ma' quem. Xucun ma' iri na ne, hwet qui' ac cain na capijacon co ma' co hwet qui' pa'ao' ma', co profeta mixein ma', pain ca tomi' hwet taxipa' cain oro ca tomi' mixein nucun co hwet qui' cain' ma' quem.

¹⁴ Iri' caxicon jam nana. Ara nanain oro ca om ara taxi' ne ca wari' wa ma', ca wa wa caca oro wari' ma'. Hwet ac tococwa na oro taramaxicon pain oro xijein macan'. Cut in xijexi', mixita xun Iri' Jam ta ac tococwa na. Xec nein ca mixita xi' nucucun ma', je i ma' tara iri' xec nein ca hwara' opa pan ca Iri' Jam.

¹⁵ Je ca tomi' capari' ca': Taraju wet xine me. Ane ane maqui' pa' xuhu'. Win ne ca ane ane maqui' ca wari' co an noc xa ta' ma', ac i ma' tara ca ane ane maqui' pa' xuhu'. Iri' Jam ma', param mi' totoron pain ca awi wa oro wari' co winim' xo' cara nanapa' ma', pain ca wara an pe xo' cocon womicocon ma', pain ca om an xiho' cocon wari' co pi'am ca' nonon co an noc xa ta' ma'. Om ta wixipa' caca pain ca ane ane maqui' pa' toton pain ca ac ca hwet pe ne ne curucucun pain ca om winim' xo' cacapa' pain ca maqui' ta' ne ta. Ac i ma' na ca tomi' capari' ca'.

¹⁶ Harahap je ac caca na oro caxicon jam co ma' 3 nana ma'. Cut in xijexi', mixita xun Iri' Jam ta ac tococwa na oro taramaxicon ma'. Cut in ac xucucun na pain Armagedom ma', je i ma' wixinain ca cut in to xucucun pain capijacocon oro judeu ma', pain hebraico ma'.

¹⁷ Mao ac ca na xucun jam ma', co ja' corom mao nonon win ma' ca ma', ma' 7 pin ac caca na jam co mama' nana. Ji'ao pin ac cain na ca xirac wa ca moin' pe nain too nucun. Ji'ao na pain pawin. Ji'ao iri nain ne, taraju ac tain na ca tomi' wa ca maqui' nain xiricon Iri' Jam ma', maqui' nain ca mam' xao pe nucun ma'. Tomi' mip ac ne na: Ara pi' pin inain oro ca ara ta' ta' pane na.

¹⁸ Coc wein ac ca na comerem ma', toroho mip pan na comerem quem, mija na. Cocoroc tamana ac ne na macan' ma' quem. Pain ca xo' ma' ten qui' caca oro wari' pain macan' pane, om ca cocoroc mip ac i ma' ne ira. Je win cocoroc mip tamana ne pain xocori ca'.

¹⁹ Cocoroc iri na macan' pain cidade ma' ne, je pain Babilônia co hwara' opa tamana nana oro wari' nein ma', taparapa' pin ac ne na, taparapa' pan na macan'. Ma' 3 na cote ne ca taparapa' nein. To ni to ni xam' ac ne na. To' om pin ac xine na oro cidade pain oro xijein macan' quem. Iri' Jam ma', om ca ji'am pin cain ca pan teretem nucucun oro wari' nein Babilônia ma', co hwara' opa tamana paxi' nana pane. Toc jein ta ac tococwa na pain comi uva nucun ca mana' ma', ca tomi' joc mam' mi' nain ca mana' tamana nucun ma', ca ji'ao mi' ca pain ca mam' toc nucun ca an xiho' nain ca mana' tamana nucun ma'.

²⁰ Ane ane om pin ac ne na oro xixi pan nein macan' je oro cote ne pacun. Pan' ara'am pan' ara'am pi' pin na.

²¹ Camara' pa' ac cocon na oro wari' caji pacun nein xowi'. Camara' qui' nain pawin. Iri' cote ne caji pacun nein xowi', xite na, ac ca ma' 35 ne na quilo nein ca xica' pe nein. Tomi' napat nonon Iri' Jam oro wari' quem, xi om ne ca xirac wa pain cote ne caji pacun nein xowi' ca camara' pa' nonon ta. Jain jain tamana nana pain.