Apocalipse 15 - Tradução Bíblica Pacaas Novos

Ca ma' 7 ne oro ca xirac wa ca to' jain jain nonon oro wari' pain oro xijein macan'

¹ Querec ac tain na xijein carawa pain pawin. Tomi' joc mam' mi' nain carawa ca maqui' ta' ma'. Wa wa tamana inain. Querec inonon jam co taramaja mi' nonon Iri' Jam. Ma' 7 nana. Ma' 7 na oro ca xirac wa ca ara xi' caca ma', ca to' jain jain xun nonon oro wari' pain oro xijein macan' quem. Pi' pin iri tara ca to' jain jain xun tococwa ne, pi' pin ac ne tara ca mana' nucun Iri' Jam.

² Querec ac tain na carawa ca ac cote ne com ma' quem, ca an xiho' nain ca mam' querec ca jamu wa ma'. Ac ca weo ne na xe pain ximijain. Querec ac toton na caram ma' co to' quiji' pin nonon co ac caji carawa co mana' tamana ma' quem, co hwet qui' cain' ma'. Caram ma' co querec ta' ma', to' quiji' pin nonon co ac caji carawa ma', xi pe torotop mi' querec te cacain caji pacun ca ara an xiho' tocwa ta, tomi' in pin nonon oro co xirao' xirac xut pahu' pain número nein wixicon ta nonon ma' quem. Coco' ja' pan nanain cacarain cote ne com ca an xiho' nain ca mam' querec ca jamu wa ma'. Cut nana ca mam' tao' wa ma', ca ac violão paxi' ma', ca mi' pan cocon Iri' Jam ma'.

³ Com ac cacain na tamara' ca wara com ca Moisés co taramaja mi' non Iri' Jam pain cara pane. Com querec te mi' nonon co ma' co ac Wijimain Taramaji Ovelha ma' quem. Com ca' nana: Wum co hwara' opa pan ta Taramaxicon Iri' Jam. In ac tamana urut pain oro ca ara ma ma'. Wum co taramaxicon pe ho' nonon oro wari' co to nanain oro xijein macan'. Ara xo' taxipa' main oro ca coromicat an pe xo' nem. Iri'o' taxipa' ma quem.

⁴ Tomi' ha' cara teterem oro wari' ta Taramaxicon Iri' Jam. In ac cara teterem quem. Xi xica' pe ara ma pain ca awi ma ma', pain ca pe ni ca' main ca caracat wa ma'. Hwet hwet xam' teterem oro wari' co to nanain oro xijein macan'. Pe torotop mi' querec te teterem. Xi om ne ca querec pin' ara quequem pain oro ca ara xo' tamana ma ma'. Ac i ma' na ca com nucucun.

⁵ Pi' pin iri na ca com nucucun ne, querec ac tain na xiricon Iri' Jam pain pawin ma', pain ca pa xine ma'. Querec inain iri' ca pe pan ca Iri' Jam ma', ca to pan ne pacun ca xirao' to xine oro ca tomi' ha' je ca pane.

⁶ Hwerehwet qui' ac cacain na xiricon Iri' Jam oro jam co taramaja mi' nonon ma', co ma' 7 nana ma', co to' jain jain xun nonon oro wari' pain oro ca xirac wa ma', ca ma' 7 ma'. To nonon wom co awi tamana. Om ca em' camain' ca womicocon, toc meremem na cocon. Tucu pan xucucun pain quimacocon, mam' quep ta pain ouro ca mam' tucu pan xucucun.

⁷ Ma' na co win ma' ne nonon caram ma' co e' nana ma', co ac jam paxi' nana ma', co ma' 4 nana ma', mi' mi' xam' ac tococwa na pain ouro ma', ca wara moin' pe nain carawa ca tomi' joc mam' mi' nain ca mana' tamana nucun Iri' Jam ma', co e' cara ma'.

⁸ Mija ac ne na tain' pain xiricon Iri' Jam. Maqui' nain ca toc meremem nucun, maqui' nain ca hwara' opa tamana nucun quem. Om ca corom ac xine xiricon. Pain ca om ara ara pi' pin cacain ca ara xi' caca oro jam co ma' 7 nana ma', co taramaja mi' nonon Iri' Jam ma', pain ca to' jain jain xun cocon oro wari' pain oro ca xirac wa ma', ca ma' 7 ma' quem, om ca corom ac xine xiricon Iri' Jam.