Apocalipse 14 - Tradução Bíblica Pacaas Novos

Ca com caca tamara' co witan nana

¹ Noro ac ta' na, querec ac ton na co ma' co ac Wijimain Taramaji Ovelha ma'. Xat pe nain tamain pacun ma', ca Sião caca oro wari' ma'. Ma' 144.000 nana wari' co coco' to ho' nonon quem. Wara xirao' to tata pain jitaracocon pain wixicon co ma' co ac Wijimain Taramaji Ovelha ma', je pain wixicon Cote ca quem.

² Taraju ac tain na ca ac ca tomi' wa paxi' ne ma'. Maqui' nain pawin. Ac ca xain ne pacun pain ca weweweo tamana ne com na, ac ca toroho mip ca comerem na quem. Ac ca tao' xine na cote ne ca ac violão paxi' ma' quem.

³ Oro wari' ma', co ma' 144.000 nana ma', com ac cacain na xocori tamara'. Coco' quima hwet nanain ca mam' xao pe pe ca Iri' Jam ma', cocon caram ma' co e' nana ma', co ac jam paxi' nana ma', co ma' 4 nana ma', cocon oro taramaxicon ma' quem, je ca com to cacain xocori tamara'. Om ca taxi' xixi' na ac cacain oro xucucun wari'. Xica' to nana caram ma' co ma' 144.000 nana ma', co to' witan ca' wawa cocon oro caracat co to nanain oro xijein macan' ma', xica' to nana caram ma' co com taxi' nanain xocori tamara'.

⁴ Xumu xo' nana, an xiho' nanam xojam' co om quep camain' wawa ma', om ca ara em' xucucun, om na. Win xumu e' nonon co ma' co ac Wijimain Taramaji Ovelha ma', taxipa' e' nonon. Tora' tata pain ca to' witan ca' tococwa cocon oro caracat co to nanain oro xijein macan' ma'. Wari' ne pan nonon Iri' Jam con co ma' co ac Wijimain Taramaji Ovelha ma'. Ac ca mi' cain' tococwa cocon na. Win ne ca mi' cain' tocwa pain oro tocwi trigo ca cat caca oro hwanana pain totacocon Iri' Jam pane, ac i ma' na ca mi' cain' tococwa cocon Iri' Jam con co ma' co ac Wijimain Taramaji Ovelha ma'.

⁵ Om ca tomi' mixein camain' caca. Iri' wari' nana, om ca xuruxut pan teretem camain' caca.

Oro jam co taramaja mi' nonon Iri' Jam ma', co ma' 3 nana ma'

⁶ Querec ac ton na xucun jam co taramaja mi' non Iri' Jam. Ho pe nain iri' pawin. Tomi' hwet tain capijacon Iri' Jam ca om pi' ra ha' ma', ca tomi' hwet nonon pain ca to' witan pin toton cocon oro wari' Iri' Jam ta na. Tomi' hwet toton pain oro wari' co to nanain macan' ma', wiricoco co to nanain oro xijein macan' ma', cocon oro co xucun wari' xucun wari' pi' pin nana ma', cocon oro co capija ni ca' nonon oro xucucun wari' ma', cocon oro co to ni ca' nonon oro xucucun wari' pain macaracocon ta na.

⁷ Tomi' mip ac ca na: Tomi' ha' jun Iri' Jam ta. In ac jun pain ca hwara' opa tamana nucun. Xi maqui' pin ara ne xec nein ca wap toton cocon oro caracat. Pe torotop mi' querec te jun co ma' co quep nain pawin je macan' je cote ne com je oro ca hoi hoi ne com ca weweweo qui' nain macan' ta na ca tomi' ca ma'.

⁸ Mao iri na jam co taramaja mi' non Iri' Jam ne, co maqui' cain' ma', maqui' ac ca na xucun jam co taramaja mi' non Iri' Jam. Ma' 2 pin nana. Tomi' ac ca na: Om pin na cidade pain Babilônia, om pin na Babilônia co hwara' opa tamana nana oro wari' nein ma'. Tomi' joc mam' mi' nam caxicam narima' co param ni ca' non taxicam ma'. Ac ca caracat wi xijexi' ta tococwa na oro xucucun wari' co to nanain oro xijein macan' ma', ac ca toc jein ta tococwa na pain comi uva ca mana' ma', ca an xiho' nain ca param ximama' xine oro ca om awi wa. Ac i ma' na ca tomi' ca ma'.

⁹ Mao iri na co ma' ne, maqui' ac ca na xucun jam co taramaja mi' non Iri' Jam. Ma' 3 in nana. Tomi' mip ac ca na: Wari' co pe torotop mi' querec te nain caji pacun ca ara an xiho' xine curucun co ac caji carawa co mana' tamana ma', co hwet qui' cain' ma', wari' co xirao' xirac wa pain wixicon ma', pain jitaracon ma', am pain micon pain iri' curucun ma',

¹⁰ wap ac tocwa tara, wap pan toron Iri' Jam. Ac ca toc rain ta tocwa tara pain comi uva nucun ca mana' ma', ca tomi' joc mam' mi' nain ca mana' tamana nucun ma', ca ji'ao mi' ca pain ca mam' toc nucun ca an xiho' nain ca mana' tamana nucun ma'. Iri' comi uva nucun, om ta joc wanan xine pain com, mana' tamana tara comi uva nucun. Om ta xiram pa' camain' tocwa wari' co toc rain wa ma'. Jain jain tamana tara pain xe, je pain pacun ca weo tamana ma', ca enxofre caca oro wari' ma'. Oro jam co taramaja mi' nonon Iri' Jam ma', wirico co ma' co ac Wijimain Taramaji Ovelha ma' quem, querec totoron pain ca jain jain tamana nucun.

¹¹ Oro wari' co pe torotop mi' querec te ac i ma' nonon co ma' co ac caji carawa co mana' tamana ma', co hwet qui' cain' ma', oro wari' co pe torotop mi' querec te ac i ma' nanain caji pacun ca an xiho' nain curucun ma', co xirao' xirac wawa pain wixicon ma', jain jain cara tatara, pain xec je pain xim. Piri' cara tara tajain xe pain ca jain jain to caca. Om ta pi' pin camain' ne ca jain jain nucucun. Ac i ma' na ca tomi' ca co ma'.

¹² Je ca tomi' xuhu' ca': Wahu' pain ca wari' nucun Iri' Jam hwe ma', pain ca tomi' ha' hwein oro ca tomi' ha' je cuhu' ma', je pain ca win xumu cara hun pain ca howa cara hun Jeju ma', quereme cara jein oro ca to' i'ina nuhu' ta.

¹³ Taraju ac tain na ca tomi' wa ca maqui' nain pawin. Xirao' ca' ra ta ac ne na. Param mi' tata pain ca awi wa oro wari' co cono' pa' nanain ca howa nucucun pain xocori ca', pain ca howa cocon Taramaxicon nexi' Jeju cwa' na ca tomi' nein ma'. Tomi' ac ne na Tamataracon quem: Tomi' iri'o' ma, xao to wa tatarain ximicocon, xao to wa ca' tatarain ca taramaja tamana nucucun. To ho' cara totoron oro carawa ca awi ca mi' xun tococwa, xi om ne ca taramaja tamana ara caca pane ta na ca tomi' ne Tamataracon Iri' Jam ta.

Xec nein ca cut in xun tococwa oro caracat Iri' Jam

¹⁴ Querec ac tain na tajain nanawin ca towo'. Ma' na co xao pe pe nain quem. Ac Iri' Wari' na. Pe nain winacon caji waji' nucun taramaxicon ma', ca mam' quep xine pain ouro ma'. An na pain micon caji quit ca wara xa ma', ca mam' wawac wa caramaji xitot ma' quem.

¹⁵ Hwet qui' ac cain xiricon Iri' Jam na xucun jam co taramaja mi' non ma'. Merem mip ac con na co ma' co xao pe pe nain tajain nanawin ma'. An rain caji quit nem ma', wac cut rain winain pain oro caramaji xitot pain oro xijein macan' ma'. Xi paca' pin ara ne ta. Maqui' pin ara xi' na xec pain ca cut xin xine ta. Ac i ma' na ca tomi' con ma'.

¹⁶ Ara ac cain na co ma' co xao pe pe nain tajain nanawin quem. Wac cut ac cain na winain pain oro caramaji xitot pain oro xijein macan'. Cut cut pi' pin nain quem.

¹⁷ Hwet qui' ac cain xiricon Iri' Jam na xucun jam co taramaja mi' non ma'. An na caji quit ca wara xa ma', ca mam' wac xine winain uva ma'.

¹⁸ Hwet qui' ac ca na xucun jam co taramaja mi' non Iri' Jam, hwet qui' nain pana ca tom tain' pe xine incenso. Wirico co ma' co querec wet nain xe pain pana ma'. Hwet qui' iri na ne, merem mip ac con na co ma' co an nain caji quit ca wara xa ma', ca mam' wac xine winain uva ma': Mam' wac rain oro winain uva pain oro macori pain oro xijein macan' ma'. Cut in rain, xi paca' pin ara ne ta, ac i ma' na ca tomi' con ma'.

¹⁹ Wac ac cain na oro winain uva pain oro macori pain oro xijein macan'. Wixicaracao' mi' ac ca pain na manain cote ne pacun ca xom torotot pe xine ma', ca tomi' joc mam' mi' nain ca mana' tamana nucun Iri' Jam.

²⁰ Xom xom torotot pin ac xine na pain manain pacun ca pe ni ca' nain cidade ma'. Weweweo hwet qui' ac nein na wic quem. Mija na wic ta. Weweweo mao nain pira, ac ca ma' 300 ne na quilômetro nein ca weweweo mao nein pira. Xopain na quem, hwet nain paramain cavalo ca xopain nein.