Apocalipse 13 - Tradução Bíblica Pacaas Novos

Co ma' co ac caji carawa co mana' tamana ma', co hwet qui' nain cote ne com

¹ Querec ac ton na co ma' co ac caji carawa co mana' tamana ma'. Hwet qui' nain cote ne com. Ma' 7 na winacon, ma' 10 na pixicon quem. Pain oro pixicon ma', ma' ma' xam' nain caji waji' nucun taramaxicon. Xirao' pe pan nain oro winacon oro ca om awi wa ca tomi' napat non Iri' Jam quem.

² Co ma' co ac caji carawa co querec ta' ma', ac cote ca copacao' mixem mixem na curucun. Caximacon ma', an xiho' nain caximacon urso. Capijacon ma', an xiho' nain capijacon leão quem. Co ma' co ac caji hop ma', mi' non pain ca hwara' opa pan nucun. Taramaxicon pe rain ca taramaxicon pe pan ta' ca' non, mi' ac con na pain ca taramaxicon pin wi con quem.

³ Ac ca wara to' tocwa na pain xijein winacon ma'. Mi' pin xira pain, ane xio pin ca ne. Wa wa wa wa pi' pin nonon oro wari'. Taxipa' ac cocon na quem.

⁴ Pe torotop mi' querec te nonon co ac caji hop ma', co mi' non pain ca hwara' opa nucun co ac caji carawa ma', pe torotop mi' querec te nonon co ac caji carawa ma' quem. Tomi' ca' nana: Noro jun co ma' co ac caji carawa ma'. Om na win hwara' opa ca. Om na wari' co ha' non pain ca mixita ton con. Ac i ma' na ca tomi' nucucun pain ca wa wa cocon ma'.

⁵ Mi' ac tocwa na pain ca tomi' ximao wa co ma' co ac caji carawa ma' quem. Tomi' xec xec na, tomi' napat non Iri' Jam. Mi' ta pain ca taramaxicon pe cain macan' quem. Ma' 42 tara panawo' pain ca taramaxicon pe rain macan' ta tocwa ma'.

⁶ Mija na ca tomi' napat con Iri' Jam. Tomi' noro non, tomi' noro nain ca pe pan ca, tomi' noro nonon oro co to nanain pawin quem.

⁷ Mi' ta pain ca mixita cocon oro wari' nucun Iri' Jam, mi' ta pain ca to' quiji' pin cocon quem. Mi' ta pain ca taramaxicon pe ho' cocon oro co xucun wari' xucun wari' pi' pin nana ma', cocon oro co to ni ca' nonon oro xucucun wari' pain macaracocon ma', cocon oro co capija ni ca' nonon ma', cocon oro co to nanain oro xijein macan' ma' quem.

⁸ Co ma' co ac Wijimain Taramaji Ovelha ma', co wara coromicat an pe xo' ca Iri' Jam pain cara pane, pain ca om tomi' ma' pin querec cain macan' pane, co main to' pa' pin xim nenem oro caracat ta ca pane, ma' non tapari carawa ca xirao' to xine wixicocon oro co e' cara xi' nana ma'. Oro wari' co to nanain oro xijein macan' ma', co om xirao' to wa wixicocon pain tapari carawa nucun co ma' co ac Wijimain Taramaji Ovelha ma', wa wa wa wa xam' totoron co ma' co ac caji carawa ma'. Pe torotop mi' querec te totoron quem.

⁹ Mo ta taraju pa' xixi' na hwe ma', je ta taraju wet qui' hwe ta:

¹⁰ Wari' co wara coromicat an pe mi' ca Iri' Jam pain ca quep xun tocwa ma', quep ac tocwa tara. Wari' co wara coromicat an pe mi' ca Iri' Jam pain ca to' pa' pin xun tocwa pain cote ne quit ma', to' pa' pin ac tocwa tara pain cote ne quit. Je ca tomi' xuhu' pain ca wari' nucun Iri' Jam hwe ma': Quereme cara jein oro ca to' i'ina nuhu' ma'. Win xumu jun Iri' Jam, howa cara jun ta.

Co ma' co ac caji carawa co mana' tamana ma', co hwet qui' nain macan'

¹¹ Querec ac ton na xucun co ac caji carawa co mana' tamana. Hwet qui' nain macan'. Ma' 2 na pixicon, ac pixinain wijimain taramaji ovelha na pixicon. Ca tomi' nucun ma' iri na ne, ac capijacon co ma' co ac caji hop ma'.

¹² Taramaja mi' non co ma' co ac caji carawa co hwet qui' cain' ma', co xio pin pain ca to' tocwa pain winacon pane. Oro carawa ca ara ca ma', mam' ara nain pain ca hwara' opa nucun co ma' co hwet qui' cain' ma'. Tomi' mip tata oro wari' co to nanain oro xijein macan' ma': Tomi' ha' xine, pe torotop mi' querec te jun co ma' co hwet qui' cain' cwa' ta tata.

¹³ Co ma' co hwet qui' nain macan' ma', ara nain oro ca om ara taxi' ne ca wari' wa ma', ca to' wa wa tamana nonon oro wari'. Tomi' camara' nain pawin xe, camara' hwet ac nein na macan'. Querec querec pi' pin nonon oro wari' co to nanain oro xijein macan'.

¹⁴ Mixein mixein pi' pin tata oro wari' co to nanain oro xijein macan', xi om ne oro ca ara ca ma', ca om ara taxi' ne ca wari' wa ma', ca ara ra pan con co hwet qui' cain' ma'. Tomi' ac tococwa na oro wari': Quep jein caji pacun ma', ara an xiho' jein curucun co ma' co hwet qui' cain' ma', co to' pa' pin paxi' wa pain cote ne quit ma', co e' mami' ma'. Pe torotop mi' querec te ac hwein tara ta, ac i ma' na ca tomi' tococwa oro wari'.

¹⁵ To' e' pin rain caji pacun ca an xiho' nein curucun co hwet qui' cain' ma' ac tocwa na co hwet qui' nain macan'. Ma' ta ha' nein pain ca tomi' wa, ma' ta ha' nein pain ca to' parapa' to' parapa' pi' pin tococwa oro co om pe torotop mi' querec te jein ha' nana ma' ac tocwa na.

¹⁶ Cuc cuc ac tococwa na oro wari' pain ca xirao' xirac tococwa ma'. Am pain micocon pain iri' curucucun ma', am pain jitaracocon ma', cuc cuc ac tococwa na pain ca xirao' xirac tococwa. Co om hwara' opa nana ma', co hwara' opa nana ma' quem, co caramaju nana ma', co om caramaju nana ma', co taramaja mi' pan xucucun ma', co taramaja mi' nonon xucun wari' ma' quem, cuc cuc ac tococwa na pain ca xirao' xirac xirao' xirac pi' pin tococwa ta.

¹⁷ Wari' co om xirao' xirac wawa ma', om ca cut ac cacain carawa, om ca vender ac cacain quem. Cut xica' to nanain co xirao' xirac wawa ma', vender xica' to nanain quem. Ca xirao' xirac wa ma', je i ma' wixicon co ma' co ac caji carawa co mana' tamana ma', co hwet qui' cain' ma'. Número nein wixicon na ca xirao' xirac wa ma'.

¹⁸ Taraju pa' xin i ca': Wari' co taraju pa' ma', querec pin' tarain ca tomi' mao ne número nein wixicon co ac caji carawa co hwet qui' cain' ma'. Número nucun ma', tomi' joc mam' mi' nain wixinain ca wari' wa. Je i ca' número nucun: 666 na ta.