Apocalipse 12 - Tradução Bíblica Pacaas Novos

Narima' con co ma' co ac cote ne hop

¹ Hwet qui' ac ne na carawa pain pawin ma'. Wa wa tamana inain. Ac narima' na. Tomi' joc mam' mi' nain carawa ca maqui' ta' ma' quem. Cwere mam' pin nam xina, ac womicam na. Xat pe non panawo'. Pe nain caji waji' nucun taramaxicon ca ma' 12 ca pijo' pain winacam quem.

² Nam' na quem. Jain jain tamana na pain ca pan' ta' ca cawinacam. Mija na ca u cama.

³ Hwet qui' ac ne na xijein carawa pain pawin. Tomi' joc mam' mi' nain carawa ca maqui' ta' ma' quem. Co ma' co ac iri' cote ne hop na co hwet qui' ma'. Paca' na. Ma' 7 na winacon, ma' 10 na pixicon quem. Pe pe xam' nain oro winacon caji waji' nucun taramaxicon.

⁴ Pain cahurucun ma', mam' wap camara' um terço pin non pijo' co to nain pawin. Wixicaracao' camara' mi' non pain macan'. Hwet pin ac cam na narima' ma', co pan' ta' cawinacam ma', xat quima hwet ac cam na, winim' ac cain na ca pan' nucun cawinacam. Ma' ta cao' pin ton ta na.

⁵ Pan' qui' ac ca na cawinacam. Cao' ton paxi' na co ma' co ac caji hop ma', ane an mao hap pan tocwa pain pawin cain ne, pain ca pe pan ca Iri' Jam cwain. Cawinacam co xo' pan' ma', wirico tara co taramaxicon pe ho' toton nonon oro wari' pain oro xijein macan'. Iri' taramaxicon tara, taramaxicon hwara' opa tamana tara. Om ta xiram pa' camain' cocon oro wari' co om tomi' ha' nonon ma' quem.

⁶ Mo mao ac cama na jicon ma', pain mahweri ma'. Wara an pe xo' nain ca pe ra cam Iri' Jam. Ma' ta querec wet pe xima pain i cain ta nam. Je ca mo mao cama ma'. Ma' 1.260 na xec pain ca querec wet tacama pain i cain.

⁷ Mixita ac xucucun na pain pawin. Miguel cocon oro win jam ca co taramaja mi' nonon Iri' Jam ma', mixita ac cocon na co ma' co ac caji hop ma'. Wirico, wiricoco oro caxicon jam co taramaja mi' nonon ma' quem.

⁸ Mixita paxi' na co ac caji hop ma', cocon oro caxicon jam co taramaja mi' nonon ma', ane om hwara' opa pan caca ne. To' quiji' pin ac tococwa na. Om ca to mami' ac cacain pawin.

⁹ Xin hwet pin ac tocwa na co ma' co ac cote ne caji hop ma'. Wirico co ma' co caxicon em' cara pane, co mixein nonon hwanana pain cara pane. Wirico co Caxicon Jam ma', co Satanás na xijein wixicon ma', wirico co mixein taxipa' nonon oro wari' pain macan' ca'. Xin pan' hwet pin ac tocwa na pain macan'. Wixicaracao' camara' hwet pin ac tococwa na pain macan' oro caxicon jam co taramaja mi' nonon ma' quem.

¹⁰ Taraju ac tain na ca tomi' wa ca maqui' nain pawin. Tomi' mip ca' na: Maqui' pin iri na xec nein ca to' witan pin toton oro wari' ne ta na Iri' Jam nexi', je pain ca tomi' joc mam' mi' cain ca hwara' opa nucun, je pain ca Taramaxicon pin ca ca'. Maqui' pin iri na xec nein ca tora' ca Cristo ma' quem, pain ca hwara' opa pan ca pain ca Taramaxicon pin ca ca'. Xi xin hwet pin ara tocwa co ma' co xina non Iri' Jam ma', co tomi' em' taxipa' nonon oro xerexi' pain xec je pain xim quem.

¹¹ Oro xerexi' ma', wiricoco co to' quiji' pin nonon. Mam' to' quiji' pin nonon pain ca hwara' opa nein quicon co ma' co ac Wijimain Taramaji Ovelha ma'. Mam' to' quiji' pin nonon pain capijacon Iri' Jam ca pijim' caca con Jeju ma' quem. Mo ta to' parapa' xim cacapari' pain ca howa xun Iri' Jam cwa', je i ma' ira, to' parapa' ma' tatarapari' ne nana.

¹² Je ta tomi' querec te tomi' querec te xam' hun pain ca to hwein pawin ma'. Wahu' pain ca to hwein macan' je cote ne com ma' iri na ne, xiram pa' e' xihwe pain ca ximin nuhu' ma'. Xi quiji' hwet pin ara cuhu' Caxicon Jam ta. Mana' tamana na, xi taxi' ara ca pain ca wijimain pin ta' ne oro xec nein ca ara tain cain oro ca ara ta' ca ma'. Ac i ma' na ca tomi' mip ne ca tomi' wa ca taraju ta' ma'.

¹³ Xin hwet pin iri ta co ma' co ac caji hop pain macan' ne, tomi' ac xucun na: Ja' tequi' tam narima' ma', co xo' pan' qui' cawinacam ma' ac ca na, ja' tequi' ac cam na quem.

¹⁴ Quep tam paxi' na, ane mi' cam pain tapaxicon cote ca wajo Iri' Jam ne, ma' 2 na tapaxicon wajo ca mi' cam ma'. Ma' ta ha' quem pain ca taqui' mao main mahweri cain, ca wara an pe xo' mi' xim cain nam. Querec wet pe ac xim tara pain i cain ta nam. Ma' 3 tara cawaxi' pain ca querec wet pe xim pain i cain, ximijain xijein cawaxi' pa' terem quem, querec wet xo' xim ta. Om ta quep ac quem co ma' co ac caji hop ma', co caxicon em' ma' nam.

¹⁵ We' hwet ac cain na com pain capijacon. Ac iri' cwerein com na con. Weweweo hwet ac cam na narima' ma'. Ma' ta joc hwet pin tam ta paxi' na.

¹⁶ Ane quep xiho' cam macan' ne. Tototoc pin nain iri' cwerein com ca we' hwet ca co ma' co ac caji hop ma'.

¹⁷ Mana' tamana pin ac cam na narima' ma', mixita toton ta ac tococwa na humaxicam cocon oro waram winacam ma', wiricoco co tomi' ha' nonon Iri' Jam ma', co om an to camain' nanain oro ca tomi' hwet xine con Jeju.

¹⁸ Co ma' co ac caji hop ma', xat pe ac cain na namaji pain cacarain cote ne com.