Apocalipse 11 - Tradução Bíblica Pacaas Novos

Ca ma' 2 caca co tomi' hwet nanain ca ara ta' ca Iri' Jam

¹ Mi' ac capa' na pain taparain pana ca mam' tacan wa ma', ac pana ca mam' xut wa na. Tomi' ac capa' na: Tacan rain cote ne xiricon Iri' Jam ma', tacan rain pana ca tom tain' pe xine carawa ma' quem. Tomi' rain ca mija nucucun oro co to nanain quem, co pe torotop mi' querec te nanapa' pain ca in ac cacapa' ma'.

² Miri'om rain ca tao' caho' nein ma', ta tacan main me. Xi mi' ara tococwa pain oro xucucun wari' co om judeu nana ta. Ma' 42 tara panawo' pain ca to' em' xin cacain cidade ne ca', je Jerusalém ca'.

³ Ma' 2 tatara wari' ne co pijim' xin nanain capija ca iri'o'. To totoron caxicon wom, ma' ta querec pin' cacapari' pain ca tomi' xaxa' nexi' pain ca caracat nucucun oro wari' ta tatara. Pijim' hwet ac cacain tara capija. Ma' 1.260 tara xec pain ca pijim' nucucun. Ac i ma' na ca tomi' capa' ma'.

⁴ Caram ma' co pijim' hwet nanain capijacon Iri' Jam ma', tomi' joc mam' mi' nanain panaji oliva ca ma' 2 ma', je oro ca mam' tom pe ne naran ca ma' 2 ma' quem. To quima hwet nonon iri' Taramaxicon co taramaxicon pe ho' nonon oro wari' pain oro xijein macan'.

⁵ Mo ta quep em' toton ca wari' ma', hwerehwet qui' ac nein capijacocon tara xe, to' om pin ac tocwa tara. Cono' ac i ma' tatara oro wari' co noc nonon ma', co quep em' xun nonon ma'.

⁶ Caram ma' co pijim' hwet nanain capijacon Iri' Jam ma', mi' ac tococwa na pain ca hwara' opa wa pain oro xec nein ca pijim' caca. Ha' nonon pain ca tac caho' cacain xowi', je pain ca to' wic pin cacain com, je pain ca mam' to' em' pin cacain macan' je carawa pain oro ca xirac wa. Ara xin iri tatarain ne, ara ara ac cacain tara.

⁷ Pijim' hwet pi' pin iri tatarain oro ca pijim' je tococwa ne, hwet qui' ac ca tara co ma' co ac caji carawa ca mana' tamana, hwet qui' tarain cote ne man ca om tawirinain cain. Quep toton ta ac tococwa tara, to' quiji' pin ac tococwa tara, to' parapa' pin ac tococwa tara quem.

⁸ To wet iri caca ma' ac tococwa tara pain wana ca xuruxut ac caca oro wari' pain ximijain cote ne cidade ma', pain Jerusalém ma', ca tatatain pe tocwa pain pana Taramaxicon nexi' co taramaja mi' caca ma'. Ma' na ca wuxu ni mao ne Jerusalém ma' quem. Sodoma, je Egito, ac i ma' na ca wuxu ni mao ne ma'. Tomi' joc mam' mi' ara xi' tata oro wari' nein pain ca caracat tamana nucucun ta.

⁹ Querec querec xam' totoron oro wari' co to ni ca' nonon oro xucucun wari' pain macaracocon ma', co xucun wari' xucun wari' pi' pin nana ma', co capija ni ca' xucucun ma', co maqui' nanain oro xijein macan' ma' quem, querec querec xam' tatarain curucucun co to' parapa' wawa ma'. Ma' 3 tara xec pain ca querec e' cacain curucucun. Tocon xina pain xijein xec pa' totoron quem, querec e' tatarain curucucun. Narain ho' ac tococwa tara oro wari' pain ca tequi' pa' cocon quem.

¹⁰ Tomi' querec te tamana tatara oro wari' co to nanain oro xijein macan' ma', tomi' querec te tamana tatara pain ca cono' pin nucucun. Tomi' querec te xi' e', xi om ne ca cono' pin ara caca caram ma' co to' jain jain nanapari' pain ca to xin oro xijein macan' ta tatara, mi' querec te caracan ac xucucun tara pain oro carawa quem.

¹¹ Ma' 3 pin iri na xec pain ca to' parapa' pin tococwa ne, je pain ca tocon xina pa' pin tococwa pain xijein xec quem, huco' mi' pan ac cocon na pain iri' ca e' nucun Iri' Jam. Tequi' to pin ac caca na, jin' tamana ac caca na oro wari' co querec nonon pain ca tequi' to pin nucucun. Om ca jin' pije' camain' caca.

¹² Caram ma' co tequi' to pin nana ma', taraju ac cacain na ca tomi' wa ca maqui' nain pawin. Tomi' mip tata. Piri' qui' je ta ac tococwa na, piri' mama' ac cacain na pawin pain tajain nanawin ma'. Oro wari' co noc nonon ma', ja' noro nonon pain ca piri' mama' nucucun.

¹³ Piri' mama' iri nana ne, cocoroc mip ac ne na macan'. Jao horohot um décimo pin ac ne na oro xirim ma', pain Jerusalém ma'. Cono' 7.000 ac caca na oro wari' quem. Co witan ca' nanain ma', jin' tamana ac caca na, in ac tamana ac cocon na Iri' Jam co pe pawin ma' quem.

¹⁴ Je ca ma' 2 pin ne carawa ca om awi ca hwet pa' mami' nonon oro wari' pain macan' ca', pain ca to' ximin tamana mami' cocon ma'. Ame hwe e', ma' ma' wet na wirain carawa ca om awi ca hwet pa' ton nonon quem.

Ca on mami' xine caji taracom ma', pain ca ma' 7 pin caca co on nanain ma'

¹⁵ On ac cain na caji taracom xucun jam co taramaja mi' non Iri' Jam, ma' 7 pin ac caca na co on nanain ma'. On iri nain ne, taraju ac toton na co tomi' mip to nanain pawin ma'. Tomi' ac i ca' nana: Taramaxicon pin na Iri' Jam co Taramaxicon ne iri' cwa'. Taramaxicon pin na Cristo co tora' pan ca quem. Wirico Iri' Jam na co taramaxicon pe ho' taramaxicon pe ho' pi' pin toton nonon oro wari' pain oro xijein macan'. Taramaxicon cara tara quem. Ac i ma' na ca tomi' mip caca ma'.

¹⁶ Xucucun taramaxicon co ma' 24 nana ma', to quima hwet nonon Iri' Jam pain ca xao to to cacain ca mam' xao to nucucun ma', pe torotop mi' ac cocon na Iri' Jam. Camara' tucu hwet mi' nanain macan' ma', pe torotop mi' querec te ac cocon na quem.

¹⁷ Tomi' ac cocon na: Tomi' querec te urut pum ta Taramaxicon Iri' Jam. Wum co hwara' opa pan. Wum co ma' cara cwa', co wara ma', pain cara pane quem. Tomi' querec te urut pum, xi om ne ca an hwet pin ara main ca hwara' opa pan nem ma'. Taramaxicon pe pin main macan' ma'.

¹⁸ Mana' tamana paxi' nana oro wari' co to nanain oro xijein macan' ma', ane maqui' pin ne xec nein ca mana' toton pan momon pain ca win hwe pane toton momon ne. Maqui' pin na xec nein ca wap toton momon oro wari' co wara cono' nana. Wap toton momon pain oro carawa ca ara caca pain ca e' e' wet nucucun pane. Win hwe pane ac momon tara oro co taramaja mi' nenem pane, cocon oro profeta cocon oro wari' nem ma', cocon oro co tomi' ha' taxipa' nenem pane, co hwara' opa nana ma', co om hwara' opa nana ma' quem, win hwe pane ac momon tara, mi' ac momon tara pain oro ca awi wa. Maqui' pin na xec nein ca to' parapa' pin toton momon oro co to' parapa' pin nonon oro wari' pain macan' quem. Ac i ma' na ca tomi' cocon Iri' Jam.

¹⁹ Pa ac xine na xiricon Iri' Jam pain pawin ma'. Querec ac tain na iri' panaxicon ma', ca cut ho' pe xine pacun ca xirao' pe mi' tococwa oro wari' nucun ma', pain ca tomi' ha' xine tococwa ma'. Coc irija' ac ca na comerem ma', toroho mip pan na comerem quem, mija na. Cocoroc ac ne na macan' ma' quem. Nuru mip ac ne na camana', camara' ac ne na caji pacun nein xowi' ma' quem. Mija na.