Apocalipse 1 - Tradução Bíblica Pacaas Novos

¹ Je i ca' carawa ca maqui' ta' ma', ca an hwet pe ca Jeju Cristo pane. Wirico Iri' Jam co an hwet mi' pan non pain, an xin tiquin' mi' roron pain oro co taramaja mi' nanapa' pain macan' ta non. Om ta pain homa ne, maqui' ac ne tara ta non. Mam' ac capa' na con jam co taramaja mi' non ma', tomi' hwet ron pain João cwain, co taramaja mi' napa' cwain non, tomi' hwet ac capa' pain na quem.

² Je ca an xin tiquin' mi' xuhu' pain ca xirao' pe ta' ca'. Iri'o' na oro ca xirao' ne ca', xirao' xirao' pi' pin inain oro ca querec ta' con, je oro ca tomi' nucun Iri' Jam ma', xirao' xirao' pi' pin inain oro ca tomi' hwet capa' Jeju Cristo pane.

³ Iri' Jam ma', param mi' non pain ca awi wa wari' co noro nain ca xirao' ne ca', param mi' nonon pain ca awi wa oro wari' co taraju nanain pain ca noro xine ma', wiricoco co tomi' ha' nanain quem. Xi om ne ca wixicam pin ara ne oro xec nein ca maqui' ta' ne oro ca xirao' ne ta.

Ca wata' co xirao' mi' nuhu' ta ca João

⁴ João ina pain ca xirao' mi' xuhu' ca'. Xirao' mi' inuhu' pain ca howa hun Jeju ma', pain ca cut in xujuhu' pain oro cidade ca ma' 7 ma', ca to nain Ásia ma', je i ma' wixinain macan' ca to ne oro cidade ma'. Tomi' mi' inuhu' con Iri' Jam co ma' cara ma', co wara ma' pain cara pane, co maqui' ta' ma' quem. Param inon pain ca quep xiho' cuhu' pain ca mi' cuhu' pain ca param nucun, param inon pain ca mi' cuhu' pain ca om toron ne xumuhu' quem. Je ca param ta' pain Tamataracon ca ma' 7 ma' pain ca xat quima hwet nein ca mam' xao pe pe ca ma', pain ca Taramaxicon ca ma'. Param inain pain ca quep xiho' cuhu' pain ca mi' cuhu' pain ca param nein, je pain ca mi' cuhu' pain ca om toron ne xumuhu' ma' quem.

⁵ Param inon Jeju Cristo pain ca quep xiho' cuhu' pain ca mi' cuhu' pain ca param nucun, param inon pain ca mi' cuhu' pain ca om toron ne xumuhu' quem. Wirico Jeju co tama' tomi' iri'o' ma', co to' e' mami' cain' ca Iri' Jam pane, co iri' Taramaxicon co hwara' opa tiquin' ca' nonon oro taramaxicon co taramaxicon to nanain oro xijein macan' ca'. Wirico Jeju Cristo co om noc napari' ta. To' witan ca' napari' pain ca caracat nexi' ca'. Mam' to' witan napari' pain quicon.

⁶ Wari' ne napari' pain ca taramaxicon pe ho' capari', sacerdote je pain ca taramaja mi' hun Te Iri' Jam cwa' napari' pain ca Iri' Jam ne con Cote ca. Na e' na pain ca tomi' querec te xun Jeju Cristo co awi tamana cara ta. Wirico co iri' Taramaxicon cara quem. Amém, iri'o' na ca tomi' ne ta.

⁷ Noro je! Maqui' tara pain tajain nanawin Jeju. Querec querec pi' pin totoron oro wari'. Oro wari' co xucun' pa' nonon quem, querec querec pi' pin totoron. Awaran awaran pi' pin ac caca tara con oro xucucun wari' pain oro xijein macan'. Amém, iri'o' na ca tomi' ne ta.

⁸ Tomi' ca' na Taramaxicon Iri' Jam: Wata' co Alfa cwa', wata' co Ômega cwa'. Wata' co ma' cara cwa', wata' co wara ma', pain cara pane, wata' co maqui' ta' ma' quem. Wata' co hwara' opa pan. Ac i ma' na ca tomi' ca pane.

Ca hwet pa' con João Cristo co e' mami'

⁹ João ina pain ca xirao' mi' xuhu' ca'. Xere xijexi' pain ca howa xun Jeju. Win ma' ne xijexi' pain ca jain jain wi iri' cocon oro wari' co quep em' nanapari', xi om ne ca taramaxicon ne ara xun Iri' Jam ta. Win ma' ne xijexi' pain ca quereme cara xin oro ca to' i'ina napari' pain ca howa xun Jeju quem. Pe inain xixi pan nein macan' Patmos. An mao nanapa' pain i cain pane, xi om ne ca pijim' ara tain capijacon Iri' Jam pane, xi om ne ca tomi' hwet ara toton con Jeju oro wari' pane quem.

¹⁰ Xec nein ca mam' pe wet xine ca e' mami' ca Taramaxicon nexi' pin iri na ne, pain domingo pain cara pane, pe ho' mip ac capa' na Tamataracon Iri' Jam. Taraju ac tain na ca tomi' wa ma', pain wara ma'. Tomi' mip na. Ac ca on xine caji taracom napa'.

¹¹ Tomi' ac capa' na: Xirao' pe ra pain tapari carawa oro ca querec ta' ma ma'. Mam' ac momon pain tara oro co howa nanapa' ma', co cut in xucucun pain oro cidade ma', ca ma' 7 ma'. Mo na oro cidade nucucun: Éfeso ma', Esmirna ma', Pérgamo ma', Tiatira ma', Sardes ma', Filadélfia ma', je Laodiceia ma' quem. Ac i ma' na ca tomi' capa' pane.

¹² Noro in ac ta' na, querec ton co tomi' napa' ma' ina ira. Noro in iri ina ne, querec ac tain na oro ca mam' tom pe ne naran ma', ca mam' quep xine pain ouro ma'. Ma' 7 na.

¹³ Ximija pe nain oro naran wari' ma'. Ac wari' paxi' na. Pe non cote ca wom co hwet nain caximacon. Tucu pan xucun pain quimacon, mam' quep ta pain ouro ca mam' tucu pan xucun ma'.

¹⁴ Towo' tamana na tununucun pain winacon ma', towo' mip na. Joc xec na tocon ma', ac ca tom ne xe na.

¹⁵ Toc meremem na caximacon ma', an xiho' nain bronze ca an tom pe xine pain xe ma', ca xic mip ac xine na quem, querec ac i ma' na caximacon. Ca tomi' nucun ma' quem, ac ca xain ne pacun pain ca weweweo tamana ne com na.

¹⁶ Cut 7 non pijo' pain micon ma', pain iri' curucun ma'. Hwet qui' nain capijacon cote ne quit ca ma' 2 quirinain ma', ca xa xa pi' ma'. Toc meremem na tocon quem, an xiho' non xina pain ca toha mip ca ma'.

¹⁷ Querec iri inon ne, pan' hwet ac ton na pain caximacon. Ac wari' co mi' pin ma' ina pain ca pan' hwet ton pain caximacon. Quep ac capa' na pain micon ma', pain iri' curucun ma'. Tomi' ac capa' na: Ta jin' mapa' me ta. Wata' co ma' cain' pane, pain ca om om wet ne oro carawa pane. Wata' co ma' cara ta' ma' quem, pain ca win pi' pin ta' ne oro carawa quem.

¹⁸ Wata' co e' cara cwa'. Mi' pin paxi' ina pane, ane e' cara ta' pain xocori ca' ne. Om ta pi' ra ha' ne ca e' ne ta. Wata' co taramaxicon hwara' opa tiquin' ca' nain ca cono' wa. Taramaxicon pe ho' inonon oro co cono' nana ma' quem, to ho' napa' oro ca mam' pa xine ca to pan caca ta, ac i ma' na ca tomi' capa' ma'.

¹⁹ Je ca tomi' xim ca' ac capa' na. Xirao' pe ra pain tapari carawa pain oro ca querec ma cara ne, je pain oro ca querec ta' ma pain xocori ca', je pain oro ca maqui' ta' pa'ao' ma' quem, xirao' xirao' pi' pin rain.

²⁰ Tomi' xo' xim inem con oro pijo' pain oro ca mam' tom pe ne naran ca' quem. Ma' na ca tomi' mao nucun oro pijo' co ma' 7 cwa', co querec ma cwa', co cut ta' pain mu pain iri' cwere ca'. Ma' na ca tomi' mao nein ca mam' tom pe ne naran ca' quem, ca ma' 7 ca'. Oro pijo' cwa', co ma' 7 cwa', tomi' joc mam' mi' nonon co an xin tiquin' mi' nonon pain ca tomi' ne oro co howa to nanain oro cidade ca ma' 7 ma'. Oro ca mam' tom pe ne naran ca' iri na ne, ca ma' 7 ca' quem, tomi' joc mam' mi' nonon oro co cut in xucucun pain ca howa cacapa' ma', co to nanain oro cidade nucucun ca ma' 7 ma'. Ac i ma' na ca tomi' capa' ma'.