3João 1 - Tradução Bíblica Pacaas Novos

¹ Wata' pain ca querec wet toton oro co howa nonon Jeju cwa', wata' pan co xirao' mi' nem cwa' Gaio. Om ca noc camain' xim, tomi' querec te iri'o' inem.

² Je ca tomi' xim pain ca tomi' querec te xim ca'. Tomi' mi' inem con Iri' Jam. Mi' ron pain ca awi wa, mi' ron pain ca om caxi wa quem inon pum. Mi' ron pain ca hohot hohot pi' pin con oro carawa, mi' ron pain ca awi wa pain iri' ximicon quem inon pum.

³ Ma' nana xerexi' co hwet nanaparut pane. Tomi' querec te tamana ina pain ca tomi' hwet cacaparut pain ca win xumu cara mon Iri' Jam ma', je pain ca xut xo' ma pain ca tomi' ha' cara main oro capijacon ca iri'o' ma' quem.

⁴ Je i ma' ca ja' tomi' querec te tamana napa' ma', pain ca taraju toton oro co ac ca mana panxita' caca ne ma', pain ca xuruxut xo' caca pain ca tomi' ha' cara cacain capijacon Iri' Jam ca iri'o' ta.

⁵ Je ca tomi' xim pain ca tomi' querec te xim ca'. Quep xiho' iri momon oro xerexi' co win howa ma ma' ne, om paxi' na ca wara querec pin' momon pane, ane ara xo' tamana main ca taramaja nem pain ca quep xiho' momon ne.

⁶ Hwet iri nanaparut xerexi' pain ca cut in xujuxut pain ca howa urut con Jeju cwa' ne, tomi' hwet ac cacaparut na pum: Tomi' querec te naparut Gaio, om ca noc camain' caparut ta nanaparut pum. Je ca tomi' xim ca'. In hwet iri tuturuhu' ne, hohot ac ne tara pain ca quep xiho' momon pain ca aram aram mama' xin xijein cidade ta caca ma' quem. Win ne ca hohot con Iri' Jam pain ca ara ac i ma' iri' ta.

⁷ Awi na pain ca quep xiho' tococwa, xi taramaja mi' ara cocon Jeju Cristo pain ca hwet cocon oro wari' pain ca pijim' mi' xuxun pain capijacon Iri' Jam ta caca ma'. Om ca quep xiho' xut ta tococwa oro wari' co om howa nonon Cristo quem.

⁸ Je ca na e' ne pain ca tomi' querec te xuxun oro xerexi' co taramaja mi' ac i ma' nonon Cristo ma'. Quep xiho' xuxun, ma' ta taramaja wi xuxun pain ca pijim' hwet cacain capijacon Iri' Jam ca iri'o' ta.

Diótrefes con Demétrio

⁹ Xirao' mi' paxi' inuhu' pain ca cut in xujuhu' pain ca howa hun Jeju pane, ane om taraju wet capa' pain ca xirao' ne Diótrefes ne. Xi tomi' ximao ara cuhu' ta: Wata' co hwara' opa tiquin' ca' nuhu' ta nuhu', ac i ma' na ca coromicat nucun pahu'.

¹⁰ Je ca tomi' xim ca', hwet iri xuhu' ne, tomi' xo' ac xuhu' tara pain oro ca pan tem nucun ma'. Tomi' napat taxipa' ara xi' naparut ta. Om ca tomi' napat xica' pe caparut, noc noc tata oro xerexi' co pijim' hwet nonon pain capijacon Iri' Jam oro wari' pain oro xijein cidade ma' quem. Noc tata co tomi' querec te nonon quem. Ta tomi' querec te huhun me ac tococwa na co tomi' querec te xuxun pan nonon ma', xin hwerehwet pin ac tococwa na pain ca cut in to xujuhu' ma' quem.

¹¹ Je ca tomi' xim pain ca tomi' querec te xim ca'. Ta an xiho' momon oro co pan teretem taxipa' nana me, an xiho' e' roron co ara nanain ca awi wa. Wari' co ara taxipa' nain ca awi wa ma', wirico co Te non Iri' Jam. Wari' co pan tem taxipa' ma' iri na ne, om ca querec pin' camain' con Iri' Jam.

¹² Win ca Demétrio ma'. Taraju urut cocon oro wari' co awi na awi na pi' pin nonon. Tomi' iri'o' nana quem, querec pin' ara xi' ta pain ca awi nucun, je pain ca xut xo' nucun ta. Taxi' urut con quem, awi na urut con. Taxi' maparut pain ca tomi' iri'o' nuxut ca' quem.

Ca pi' pin ne ca xirao' nucun João

¹³ Mija paxi' na oro ca tomi' hwet xim xim ca', ane noc tain ca xirao' mi' xim pain ne.

¹⁴ Hwet ho' xim inem, om ta om om ta', hwet ho' xim. Tomi' ac xijexi' tara ta.

¹⁵ Param inon Iri' Jam pain ca mi' quem pain ca om toron ne xumum ma'. Mam' pe wet urut pum ta nenem oro win ma' nexi' co to ho' nanapa' cwa'. Tomi' roron oro win ma' nexi' pain i ma' quem. Mam' pe wet mam' pe wet xam' urut cocon. Je i ca' ca xirao' ne ca'.