2 Timóteo 4 - Tradução Bíblica Pacaas Novos

¹ Maqui' iri tara Cristo Jeju pain ca taramaxicon pe pin tain cain macan' ca' ne, tomi' hwet tomi' hwet xam' ac tococwa tara oro wari' pain oro carawa ca ara caca ma'. Co e' e' wet nana ma', co wara cono' pin nana ma' quem, tomi' xo' tomi' xo' xam' totoron. Hohot hwe ta totoron co hohot nana ma', em' hwe ta totoron co em' nana ma' quem. Je ca tomi' xim ca'. Taraju napa' Iri' Jam con Cristo Jeju pain ca tomi' mip xim ca':

² Pijim' mi' roron pain capijacon Iri' Jam oro wari'. Am taraju wet xin cacain, am om taraju wet xin cacain. Je i ma' ira, wara awori xo' ra pain, pijim' mi' roron pain. Mo ta caracat caca, tomi' roron pain taraxicocon pain ca pan teretem nucucun. Cwirin' jein ta roron. Hu roron, tomi' pan hot roron pain ca pijim' momon pain capijacon Iri' Jam ma'.

³ Xi maqui' ta' ara ne xec nein ca om taraju wet je na cacain capijacon Iri' Jam ca iri'o' oro wari'. Param e' tatarain oro xijein ca tomi' wa, taraju wet e' totoron oro wari' co tomi' cut in pan caca. Pijim' xut pain ca capija wa ca ac pan naparut ta totoron.

⁴ Om ta taraju wet je na cacain capijacon Iri' Jam ca iri'o'. Taraju wet e' tatarain oro ca pijim' ximama' wa ca pijim' caca oro hwanana.

⁵ Ac i ma' tatara co noc nanain capijacon Iri' Jam. Wum iri na ne, ma' tara xumum ta Timóteo. Tama' coromicat xo' ra pain oro carawa ca ara nem. Quereme rain oro ca to' i'ina nem ma'. Pijim' mi' roron pain capijacon Iri' Jam oro wari', pijim' mi' roron pain capijacon Iri' Jam ca tomi' hwet napari' con Cristo Jeju co to' witan xim napari'. Ara ara pi' pin rain oro ca ara ra quem Iri' Jam pain ca taramaja mi' mon ma' quem.

⁶ Je ca tomi' xim ca'. Xi wixicam pin ara ne xec pain ca mi' pin ta' ne. To' pa' pin tatarapa'. Om ta nain ho' xije quem, mi' pan xije con Iri' Jam ta.

⁷ Pain ca taramaja mi' ton Iri' Jam ca', om ca nain ho' camain' tain cwere pain ca taramaja ne. Om ca taramaja nene camain' ta'. Ara ara pi' pin inain oro ca taramaja ne ca mi' capa' pane. Howa cara inon quem, om ca an pe camain' ton.

⁸ Wara an pe xo' mi' napa' pain carawa ca awi ma', ca an xiho' paxi' nain caji waji' nein ca wina wa ca an ca wari' co ganhar pain ca maji jein xi' caca oro wari' ma'. Maqui' iri tara xec nucun Taramaxicon nexi' co Juiz ma' ne, co ara xo' taxipa' ma', mi' ac capa' tara pain carawa ca awi. Xi om ne ca hohot ara mapa' pain ca xut xo' nem pane tarapa'. Om ta xica' pe ta' pain ca mi' xim capa' pain quem, mi' mi' xam' totoron pain oro wari' co winim' nonon pain ca jain jain cacain ca in qui' nucun.

Ca tomi' hwet con pain carawa ca ara non, je pain ca tomi' xo' con pain ca param nucun ca ara mi' ne pain con quem

⁹ Maqui' hap ra me. Ta om om ma me, miri'om rain oro ca to' i'ina nem pain ca hwet hap xim mapa' me.

¹⁰ Xi paca' ara capa' Demas cara pane. Win xumu ara xi' nain oro caramaji macan', paca' ac capa' na, mao ac cain na Tessalônica. Mao nain Galácia Crescente, mao nain Dalmácia Tito quem.

¹¹ Pe ho' xica' pe napa' Lucas cwa'. Hwet xim iri ne ne, o qui' ac mon tara Marcos quem. Quep xiho' ara xi' napa' pain ca taramaja ne ta.

¹² Mao rain Éfeso inon Tíquico.

¹³ Hwet xim iri ne ne, an qui' ac mon tara to' om capin' ne co pin ta' pain xiricon Carpo pane, pain Trôade pane. Cut qui' rain oro livro ne ma' quem, je oro tapari carawa ca joc top ma', ca xirao' pe xine ma' quem, je ca param tamana ta' quem.

¹⁴ To' i'ina tamana napa' Alexandre co quep quep jami carawa nain too ma'. Wap ma' toron Taramaxicon nexi' ne. Xi to' i'ina ara capa' pane ta.

¹⁵ Querec ron me. Xi mija ara ne ca ari tamana caparut pain ca pijim' nuxut pane.

¹⁶ Pain ca tomi' nain ho' xije pain ca tomi' em' cacapa' pane, pain ca xo' tomi' querec cacapa' oro taramaxicon pane, om na wari' co quep xiho' napa', om nana oro win ma' ne co tomi' in pin nonon pain ca tomi' em' cacapa' pane. Wara paca' paca' pi' pin nanapa'. Je i ma' ira, tomi' mi' inonon con Iri' Jam quem. Ta mana' momon pain me ta inon cocon.

¹⁷ Paca' pin paxi' nanapa' pane, ane pe ho' pan capa' Taramaxicon nexi' ne. To' hwara' opa napa' quem. Ma' ta ara ara pi' pin main ca taramaja nem pain ca pijim' main oro capija ta napa', ma' ta taraju cacain ca pijim' nem oro wari' co om judeu nana ta napa' quem. To' witan napa' quem. Om ca to' pa' pin cacapa'. Ac ca to' witan ca' capa' na con copacao' ta.

¹⁸ To' witan napa' Taramaxicon nexi'. To' witan ca' tarapa' pain oro carawa ca om awi ca ara xim napa' quem. Querec wet tarapa', querec wet querec wet an mao ac capa' tara pain ca taramaxicon pe ca pain pawin cain. Na e' na pain ca tomi' querec te cara xun co awi tamana ta! Amém, iri'o' na ca tomi' ne ta.

Ca pi' pin ne ca xirao' nucun Paulo

¹⁹ Mam' pe wet nuhu' Paulo ta raram Priscila con Áquila ma'. Oro ca nari nucun Onesíforo ma' quem, mam' pe wet nuhu' Paulo ta raram.

²⁰ To wet nain Corinto Erasto cara pane. Trófimo iri na ne, an pe pin inon pain Mileto quem. Xi om ne ca caxi ara ca pane ta.

²¹ Maqui' hap ra me. Ta om om ma me, miri'om rain oro ca to' i'ina nem pain ca hwet hap mapa' pain ca om maqui' querec ne oro xec ca xio tamana ma'. Mam' pe wet urut pum ta nenem xerexi' cwa', Êubulo con Prudente con Lino cwa', wiricam Cláudia cwa' quem. Oro xucucun xerexi' cwa' quem, mam' pe wet urut pum ta nenem.

²² Param inon Taramaxicon nexi' pain ca pe ho' quem pain iri' xumum ma'. Param inon pain ca quep xiho' quem pain ca mi' e' quem pain ca param nucun. Wum, oro xerexi' co to ho' nenem ma' quem, param inon Taramaxicon nexi' pain ca quep xiho' quep xiho' xam' cuhu' pain mi' cuhu' pain oro ca param nucun. Je i ca' ca xirao' ne ca'.