2 Timóteo 3 - Tradução Bíblica Pacaas Novos

Ca caracat tamana nucucun oro wari' pain oro xec nein ca in qui' ta' ca Cristo Jeju

¹ Taraju pa' rain i ca' quem: Maqui' ta' iri tara oro xec nein ca in qui' ta' ca Cristo Jeju ne, ximin tamana ac caca tara oro wari'. Mija tara ca to' i'ina ximama' xucucun.

² Xi ma' xi' ara caca wari' co miri'om nanain carawa ca param caca oro win ma' caca ma', win xumu e' tatarain ca param pan nucucun. Narain ho' ac xucucun tara pain carawa pain ca param ximama' nucucun ma'. Tomi' xec xec taxipa' tatara. Om ta wixipa' caca pain ca xin to nucucun. Tomi' napat totoron oro win ma' caca. Om ta tomi' ha' cocon mana cote caca cacam waram jicocon. Om ta tomi' querec te cocon oro win ma' caca co xiram pa' paxi' nonon. Miri'om tatarain oro caramaxicon Iri' Jam.

³ Noc totoron oro wari', oro ca nari nucucun quem, om ta xiram pa' camain' cocon. Om ta mana' mana' om je na cocon oro win ma' caca co ara cup nonon. Tomi' em' totoron. Ara e' tatarain oro ca param pan nucucun, om ta an in cacain ca param nucucun. Quep xirac tamana totoron oro win ma' caca. Noc taxipa' tatarain oro carawa ca awi.

⁴ Mixein totoron oro win ma' caca co taxipa' paxi' caca. Tamanain to tatara pain ca om coromicat xo' nucucun. Mija tara ca xin to caca pain ca wata' co awi ta caca. Noc totoron Iri' Jam, param e' tatarain ca waraju wa.

⁵ Howa urut con Iri' Jam paxi' tatara pain ca ara xin urut pain carawa ca hohot non ta caca ma'. Ane om iri'o' xi' caca ne. Om ta ha' je na cacain Tamataracon Iri' Jam pain ca mam' to' xucun wari' ton cocon pain ca hwara' opa nein. Je ca tomi' xim ca': Miri'om pan roron oro wari' co ac i ma' nana ma'. Ta wixicam camain' momon me ta.

⁶ Wari' co ac i ma' nana ma', tomi' querec te mixein nana, ac ca iri'o' xi' ca' tara me nana, corom corom hwet ac tococwa na oro wari' pain xiricocon, pijim' pan teretem ac tacacama na oro narima' co om coromicat xo' nana ma', co to' i'ina nanam oro ca caracat nequequem. Om ca i'ina tomi' na pin tacacama, xin ne xin ne ac cacama na pain oro ca param ximao wa ca om awi.

⁷ Taraju pa' xixi' na paxi' nanain oro xocori ca pijim' wa quem. Ane om querec pin' taxi' cacamain iri' capijacon Iri' Jam ca iri'o' ne.

⁸ Wari' co pijim' pan teretem nana ma', ari pan nanain capijacon Iri' Jam ca iri'o'. Win caca Janes con Jambres cara pane, co ari nonon Moisés pane, ac i ma' nana oro wari' co pijim' pan teretem nana ma'. Ari nanain capijacon Iri' Jam ca iri'o'. Em' pin na ca coromicat nucucun, om ca coromicat xo' taxi' mami' caca. Om ca hohot hwe, xi howa iri'o' hwe ta pan nonon Iri' Jam quem.

⁹ Na paxi' nonon pain ca tomi' tomi' na pin cacam oro narima' co om coromicat xo' nana ma', pain ca pijim' pan teretem cacam ma', na paxi' nonon pain xocori ca'. Ane om na cara xun tococwa pain ne. Main maqui' tara xec nein ca querec pin' tococwa pain ca tamanain nucucun, ame hwe e'. Win caca Janes con Jambres cara pane, pain ca aram aram querec pin' tococwa pain ca tamanain nucucun pane.

Ca howa cara rain ca ca' na xima pain capijacon Iri' Jam ta con Timóteo Paulo

¹⁰ Ac i ma' nana co pijim' pan teretem nana ma'. Wum iri na ne, taxi' mapa' pain ca pijim' ne ca'. Taraju pa' mapa' pain. Taxi' mapa' pain ca xut xo' ne ca'. Taxi' mapa' pain ca param ne ca wara coromicat an pe xo' ta' pane, pain ca pijim' tain ta' capijacon Iri' Jam pane. Taxi' mapa' pain ca howa ton Cristo cwa', je pain ca tomi' pan hot toton oro wari' ma', je pain ca om noc toton ma' quem. Taxi' mapa' pain ca quereme tain oro ca to' i'ina napa' ca'.

¹¹ Taxi' mapa' pain ca jain jain ta' pane, pain ca quep em' cacapa' oro wari' co noc nanapa' pane, taxi' mapa' pain ca quep em' pe cacapa' pain oro xijein cidade pain i cain pane, pain Antioquia, je pain Icônio, je pain Listra pane. Ximin tamana ina pain ca quep em' cacapa' pane. Ane quereme tain ne. To' witan ca' ac capa' cocon na Taramaxicon nexi' pane.

¹² Je cwerein ta. Quep em' quep em' xam' tata oro wari' co win xumu xin nanain carawa ca hohot non Iri' Jam ma', pain ca howa cocon Cristo Jeju ma'.

¹³ Oro wari' co caracat nana ma' iri na ne, oro wari' co mixein nana pain ca ac ca iri'o' xi' ca' tara me caca ma' iri na ne, caracat caracat mao ac ne ma' tara cocon, caracat mip pin ac caca tara quem. Mija tara ca mixein caca, mija tara ca mixein tococwa quem.

¹⁴ Wum iri na ne, howa howa tiquin' rain capijacon Iri' Jam ca ca' na mi' xima ma', ca taxi' ma pain ca iri'o' nein ma' quem. Xi querec pin' ara momon pain ca xuruxut xo' nucucun oro wari' co pijim' xo' nenem pain ta. Warut quem, taxi' maparut pain ca pijim' xo' urut pum pain quem.

¹⁵ Taxi' main capijacon Iri' Jam ca xirao' je tococwa oro hwanana pane quem. Wara taxi' qui' ma pain ca pije' nem pane. Je capijacon Iri' Jam ca to' coromicat xo' nem ma'. Mi' nem pain ca querec pin' mon Cristo Jeju ma', pain ca to' witan ne mon, xi om ne ca howa ara xim ta mon ma'.

¹⁶ Oro capijacon ca xirao' to caca oro hwanana pane, maqui' maqui' pi' pin nain ca coromicat nucun Iri' Jam. Quep xiho' napari'. To' querec pin' napari' pain oro ca iri'o' wa. Pan to' nain tarajixi' pain ca pan teretem nexi'. Tomi' xo' napari', an to pin jein ca caracat nuhu' ta napari'. Hu napari', an hwet mi' napari' pain ca param nucun Iri' Jam pain ca xuruxut xo' je capari' quem. Ma' ta hohot mahu' ta napari'.

¹⁷ Je ca mi' capari' pain capijacon. Tomi' ca' napari' pain ca wari' ne capari' ca': Mo ta noro hwein capija ca', mo ta tomi' ha' hwein quem, na ac cuhu' tara pain ca ara ara pi' pin hwein oro ca awi wa ca ara je xuhu' ca' napari'.