2 Timóteo 2 - Tradução Bíblica Pacaas Novos

¹ Je ca tomi' xim ca' arain. To' hwara' opa ne pain xumu ca' ron Iri' Jam. Na non pain ca to' hwara' opa quem. Xi om ca Cristo co xiram pa' e' nem ma', pain ca mi' e' quem, pain oro ca param nucun.

² Taraju mapa' pain ca pijim' mi' toton pain capijacon Iri' Jam oro wari' pane. Oro ca pijim' ne ca taraju ma pata' pane, na e' na pain ca an xin tiquin' mi' momon pain oro wari' co ma' ximicocon ma', co iri' wari' nana pain ca an xin tiquin' mi' taxi' cocon pain oro xucucun wari' ma' quem.

³ Quereme rain oro ca to' i'ina nem pain ca taramaja mi' mon Cristo Jeju ma'. Win ta' ca'. Win caca oro soldado co quereme nanain oro carawa ca to' i'ina nonon ma', ac soldado nucun Cristo Jeju ra quem.

⁴ Noro ron soldado pain ca taramaja nucun ma'. Miri'om nain oro ca ara pan nucucun co om soldado nana ma'. Ma' ta om to' i'ina capa' pain ca taramaja ne pain ca soldado ta' ca' na. Je ca win xumu e' cain ca taramaja nucun. Ma' ta tomi' querec te capa' taramaxicon ne ta na.

⁵ Ac i ma' na wari' co mo ma' quem, pain ca mo hwet cain tawirinain wana ca coco' to xi' caca ma', pain ca maji jein xi' caca ma' quem. Mo ta om tomi' ha' ca, mo ta om mo xo' ca, om ca an ac cain caji waji' nein ca wina wa ca an xi' caca ma' quem.

⁶ Noro ron wari' co taramaja tamana pain totacon ma' quem. Paca' pin iri na tocwi ca oin' ca ma' ne, cat pin iri nain ne, na e' na pain ca cao' cain' pan cain quem. Ac i ma' ra quem, an xiho' ron wari' co taramaja tamana pain totacon ma'. Win xumu rain ca taramaja nem pain ca pijim' mi' momon pain capijacon Iri' Jam oro wari' ma'. Ma' ta cut main carawa ca awi ca mi' xim quem Cotere' pain pawin cain.

⁷ Coromicat rain ca xirao' mi' xim ca'. Mi' xim ara xi' nem pain ca taraju pa' wa Taramaxicon nexi'. Taraju pa' taraju pa' pi' pin ac main tara ta.

⁸ Mam' pe wet ron Jeju Cristo co to' e' pin ca Cote ca pane, co iri' hwanana ne non Taramaxicon Davi cara pane. Je ca pijim' ta' pain ca pijim' tain capijacon Iri' Jam ca tomi' hwet napari' pain ca to' witan pin xim capari' Jeju.

⁹ Pijim' inain capijacon Iri' Jam con Jeju. Je ca jain jain ta' ca'. Quep xirac nanapa', ac querec querec ca iri' caxicon wari' co pan tem cwa' inonon pain ca tao' pe cacapa' pain xirinain ca tao' to tao' to to wa ca'. Ane om tao' pe xine capijacon Iri' Jam ne.

¹⁰ Je ca quereme tain oro ca to' i'ina napa' ca'. Ma' ta quep xiho' toton oro wari' co tora' ca Iri' Jam ta ina. Quereme inain oro ca to' i'ina napa' ca'. Ma' ta to' witan pin tococwa pain ca howa cocon Cristo Jeju ma' inonon. Ma' ta mi' tococwa pain ca e' cara wa pain ca to ho' cara cocon Iri' Jam pain pawin cain.

¹¹ Iri'o' na capijacon Iri' Jam ca ca' na taxipa' iri' ca'. Na e' na pain ca howa xin: E' wi xun Cristo, xi wara cono' wi ara xun pain ca an to pin xin ca caracat wa pane.

¹² Taramaxicon wi xun quem, xi momon quereme ara xin oro ca to' i'ina napari' ca'. Mo ta om querec pin' xim ta xun, om ca querec pin' xim ta ac capari' tara quem.

¹³ Om paxi' tara ca ara xin ca wara tomi' pe mi' xun ca'. Ane ara pan tain cain ca wara tomi' pe mi' capari' ne. Xi na con pain ca an in cain ca tomi' nucun ta. Ac i ma' na ca tomi' ne capijacon Iri' Jam ca ca' na taxipa' iri' ca'.

Wari' co hohot non Iri' Jam pain ca taramaja mi' con ma'

¹⁴ Tama' tomi' hwet tomi' hwet pi' pin roron pain oro ca tomi' ne oro xerexi' ma'. Mam' pe wet jein ta roron. Hu mip roron pain, querec napari' Iri' Jam pain ca hu xuhu' ca' roron. Miri'om roron co tomi' caracan xucucun pain ca om taraju pa' xo' cacain ca tomi' nucucun oro wari' ta roron. Xi quep xiho' capari' ca tomi' caracan ximao wa ta. Mo ta tomi' caracan ximama' iri', to' em' e' ururun oro wari' co taraju nanapari' ta.

¹⁵ Taramaja tamana ra, win xumu rain ca taramaja nem, ma' ta hohot ma ta quem Iri' Jam. Win ca wari' co taramaja xo' ma', co om wixipa' pain ca taramaja nucun ma', ac i ma' ra quem. Pijim' xo' rain capijacon Iri' Jam ca iri'o'.

¹⁶ Ta taraju wet momon oro wari' co tomi' ximama' nana me, pain ca miri'om cacain oro caramaxicon Iri' Jam. Oro wari' co tomi' ximama' ac i ma' nana ma', pan teretem mip pin ac caca tara quem.

¹⁷ Ca tomi' ximama' nucucun ma', ac caji nan ca quep quep xam' nain curucun wari' na. Ca tomi' ximama' nucucun ma', ca to' ara tamana ac tococwa na oro wari' co taraju nonon ma'. Ca tomi' ximama' nucucun ma', ca to' ara tamana to' ara tamana ac tococwa na, mija pin ac caca tara co to' ara wawa cocon. Noro roron Himeneu con Fileto ma'. Tomi' ximama' ac i ma' nana quem.

¹⁸ Pijim' xo' pijim' xo' om pin nanain capijacon Iri' Jam ca iri'o'. Pijim' ni ac i ca' nanain: Oro wari' co howa nonon Jeju ma', wara e' mami' nana. Om ta e' mami' caca pain ca in qui' ta' nucun ta, xi wara e' mami' ara caca pain xocori ca', ac i ma' na ca pijim' ximama' caca ma'. Ma' nana wari' co to' em' pin caca, howa xo' howa xo' om pin ac caca na quem.

¹⁹ Pijim' ac i ma' paxi' nana, ane om ac i ma' ne capijacon Iri' Jam ne. Taxi' irin pain ca iri'o' cara ne. Om ca mixein camain' capari'. To wet cara na, om ca an in ac xine. Tomi' ca' napari': Wata' pain ca iri' Taramaxicon ta' ca', querec pin' inonon oro wari' ne ta na. Tomi' ca' napari' quem: Oro wari' co howa inem ta nanapa' ma', na e' na pain ca an to pin cacain ca caracat wa ta na ca tomi' nein.

²⁰ Tomi' xin cote ne xirim ca awi ma', xiricon wari' co caramaju. Mija na oro prato ca mam' cao' ca ma'. Oro prato ca awi ma', ca hwara' dinheiro nein ma', an to xo' nain waximain. Maqui' iri na xec nein ca cao' querec te xi' cocon oro win ma' ca ne, mam' cao' ac cacain na. Oro prato ca om awi ma' iri na ne, ca om hwara' dinheiro nein ma', mam' cao' e' nain pain oro xijein xec.

²¹ Je ca tomi' xim ca': Wari' pain ca howa xun Cristo Jeju cwa', mo ta an to pin xin oro ca caracat wa, an xiho' ac xin tara oro prato ca mam' cao' e' ca waximain pain ca tomi' querec te wi cocon oro win ma' ca ma'. To' hohot ac capari' tara Taramaxicon nexi', mam' taramaja ac capari' tara quem. Xi wara awori to ara xi' pain ca ara xin irin oro ca awi wa ta.

²² Je ca tomi' xim ca'. Mo ca' rain ca caracat wa ca param taxipa' caca co xo' horon nana ma'. Win xumu e' rain carawa ca hohot non Iri' Jam. Howa cara ron quem. Ta noc camain' momon oro win ma' ma me. Ara xite roron, tomi' querec te roron. Na e' na pain ca ac i ma' ma quem, na e' na pain ca ac i ma' caca oro wari' co in ac nonon Taramaxicon nexi' pain iri' ximicocon ma' quem.

²³ Ta taraju wet camain' momon oro wari' co tomi' caracan ximama' xucucun pain ca om taraju pa' nucucun me ta. Xi taxi' ara momon pain ca tomi' ximama' tomi' ximama' mana' caracan pin xucucun co tomi' caracan ac i ma' nana ta.

²⁴ Pain ca taramaja mi' xun Taramaxicon nexi' cwa', om ca na ne pain ca mana' caracan iri'. Na e' na pain ca ara xite ara xite xam' xuxun oro wari'. Na e' na pain ca pijim' mi' taxi' xuxun pain capijacon Iri' Jam. Na e' na pain ca tomi' toto xuxun pain ca aram aram tomi' in pin cacapari' quem.

²⁵ Na e' na pain ca hu wixite xuxun co tomi' in pin nanapari'. Am mi' ton cocon pain ca cwirin' wa Iri' Jam ma'. Am mi' ton cocon pain ca taraju pa' wa capijacon ca iri'o' ma' quem.

²⁶ Mo ta ara ac i ma' cocon Iri' Jam ma', ma' pin ac ne tara ximicocon, witan ca' ac cocon tara Caxicon Jam co quep xat nonon ma', pain ca tomi' ha' xine cocon ma'.