2 Timóteo 1 - Tradução Bíblica Pacaas Novos

¹ Paulo ina pain ca xirao' mi' xim ca'. Apóstolo ra napa' Cristo Jeju pane, pain ca tomi' hwet roron pain capija oro wari' capa' pane. Wirico Iri' Jam co param mi' napa' pain. Pijim' roron oro wari' napa' Cristo Jeju, pijim' hwet roron pain ca to' e' cara toton ta' oro wari' co howa nanapa' ta napa'.

² Xirao' mi' mami' inem ta Timóteo. Ac ca panxita' xim na. Tomi' querec te tamana inem ta arain. Param inon Cotere' Iri' Jam con Taramaxicon nexi' Cristo Jeju pain ca quep xiho' quequem pain ca mi' quequem pain ca param nucucun. Param inonon pain ca xiram pa' quequem, je pain ca mi' quequem pain ca om toron ne xumum quem.

Ca tomi' querec te con Iri' Jam Paulo, je pain ca hu toto con Timóteo quem

³ Tomi' querec te inon Iri' Jam co in ac ta' cwa', pain ca tomi' ha' iri'o' ton pain iri' xumu pain ca taramaja mi' ton ca'. Win caca oro hwanana nexi' pain cara pane, ac i ma' na pain ca in ac ton Iri' Jam ca'. Tomi' querec te inon pain ca tomi' mi' xim con. Tama' an hwet mi' inon pain wuxum, pain xec je pain xim quem. Tomi' querec te inem con ta inon pum.

⁴ Coromicat inem quem. Mam' pe wet inain ca aca nem pain ca paca' xim pane. Querec mami' xixim na inem. Ma' ta tomi' querec te awi tamana ta' ina ta.

⁵ Mam' pe wet inem pain ca howa nem quem. Howa iri'o' mon Iri' Jam. Win cama copa' ma Loide cam jim Eunice co howa cain' nana pane. Howa iri'o' nana pane, howa ac i ma' mon Iri' Jam quem, taxi' inem.

⁶ Je ca tomi' xim ca'. Mam' pe wet rain ca taramaja xo' taxi' nem ca mi' quem Iri' Jam pane, pain ca xo' quep qui' tain winam pain mu pane. Ta miri'om main me. Win xumu cara rain. Ac ca ara nem pane tara ta.

⁷ Ta taramaja jin' ma me. Xi mi' capari' pain ca jin' wa Tamataracon Iri' Jam ta. Mi' iri napari' pain Tamataracon ne, to' hwara' opa ac capari' na, mi' ac capari' na pain ca om noc xijexi', mi' ac capari' na pain ca coromicat xo' wa quem, pain ca om ara e' xin ca param nexi'.

⁸ Je ca tomi' xim ca'. Ta wixipa' ma pain ca tomi' hwet momon con Taramaxicon nexi' oro wari' me. Ta wixipa' ma pain ca tao' pe cacapa' pain xirinain ca tao' to tao' to to wa quem me. Tao' pe e' nanapa', xi om ne ca taramaja mi' ara ton Taramaxicon nexi' ta. Je i ma' ira, ta wixipa' ma pata' me ta. Quereme rain ca jain jain wa pain ca pijim' hwet main capijacon Iri' Jam ca tomi' hwet napari' con Cristo ta. Win ta' ca'. To' hwara' opa terem pain Iri' Jam ta.

⁹ Wirico co to' witan napari', wirico co tora' napari', iri' wari' ne napari' quem. Om ca mam' to' witan capari' pain carawa ca awi ca ara xi' paxi' iri', om na. Mam' to' witan napari' pain ca param pan nucun. Mam' to' witan napari' pain ca xiram pa' pan capari' quem. Om xi xiram pa' capari', xi iri' wari' iri' ta. Ane wara xiram pa' qui' capari' pain cara pane ne, pain ca om tomi' ma' pin querec cain macan' pane, wara coromicat an pe xo' mi' napari' pain ca xiram pa' nucun. Main to' witan turuhu' Cristo Jeju cwa' napari', ac i ma' tara ca xiram pa' xuhu' ta napari' pane.

¹⁰ Je win an hwet mi' capari' pain ca xiram pa' nucun quem. Xi maqui' pin ara ca Cristo Jeju co to' witan pin napari' cwa'. To' om pin nain ca hwara' opa nein ca mi' pin wa. An hwet mi' ac capari' na pain ca e' nucun quem. To' querec pin' napari' pain i ca' quem: Mo ta howa xin capijacon Iri' Jam ca tomi' hwet napari' pain ca to' witan xim capari' Cristo Jeju cwa', e' cara ac iri' tara pain pawin ta.

¹¹ Capijacon ca tomi' hwet napari' con Cristo Jeju ca', je ca pijim' ra capa'. Apóstolo ra, tomi' hwet roron pain capija oro wari' napa' pane. Tomi' xo' roron pain oro capija ca iri'o' quem napa' pane.

¹² Je ca jain jain ta' ca', pain ca tao' pe cacapa' pain xirinain ca tao' to tao' to to wa ca'. Ane om wixipa' ta' ne. Om ca naro ta'. Xi querec pin' ara ton Cristo co howa ta' cwa'. Taxi' inon pain ca ha' con ca querec wet cain ca taramaja ne ca mi' capa' ca'. Querec wet querec wet maqui' pa' ac capari' tara xec nein ca in qui' ta' nucun.

¹³ Capijacon Iri' Jam ca iri'o' ca', ca pijim' hwet xim pane, tama' mam' pe wet rain me. An xiho' rain ca pijim' ne. Howa cara ron Cristo Jeju. Tomi' querec te cara roron oro wari' quem. Wirico Cristo co mi' napari' pain ca howa cara xun, je pain ca tomi' querec te cara xuxun oro wari' quem. Xi om ne ca win cwere ara xun ta.

¹⁴ Querec wet rain capijacon Iri' Jam ca pijim' ra quem ma'. Ta an in camain' main me ta. Mam' querec wet rain pain Tamataracon Iri' Jam ca pe ho' napari' pain ximixi' ca'.

¹⁵ Taxi' mapa' pain ca an pe pin cacapa' oro xerexi' co maqui' nanain oro xijein cidade pain macarain Ásia ca'. Wirico Fígelo con Hermógenes quem, noc noc pi' pin nanapa'.

¹⁶ Onesíforo iri na ne, quep xiho' napa' quem. Param inon Taramaxicon nexi' pain ca xiram pa' cocon oro ca nari nucun cocon oro wari' co to ho' nonon pain xiricon ma' quem. Xi quep xiho' ho' quep xiho' ho' ara capa' ta, to' wa' to' wa' napa' pain xumu quem. Om ca wixipa' ca pain ca tao' pe cacapa' pain xirinain ca tao' to tao' to to wa ca', om na.

¹⁷ Wa' qui' iri nain Roma ca' ne, pirao' ac capa' na, pirao' pirao' mam' ac capa' na quem.

¹⁸ Param inon Taramaxicon nexi' pain ca xiram pa' con pain xec nein ca in qui' ta' nucun. Taxi' mon Onesíforo pain ca quep xiho' capa' pain Éfeso pane. Taxi' mon ma' ira.