2 Tessalonicenses 3 - Tradução Bíblica Pacaas Novos

Ca tomi' mi' xut con Iri' Jam quem cocon

¹ Tomi' xim urut pahu' pain i ca' quem xere. Tomi' mi' xut con Iri' Jam me. Ma' ta na caparut pain ca pijim' pijim' tiquin' xut pain capijacon con Taramaxicon nexi'. Ma' ta mija mija tiquin' hap caca oro wari' co taraju nanain ma'. Tomi' querec te tatarain pain ca howa cacain quem. Win hwe pane.

² Tomi' mi' xut con, ma' ta to' witan ca' caparut cocon oro caxicon wari' co caracat tamana nana ma'. Xi howa howa pi' pin caca oro wari' ta.

³ Ane om mixein capari' Taramaxicon nexi' ne. Tama' ara mi' napari' pain oro ca tomi' pe mi' capari' ca'. To' hwara' opa turuhu' pain iri' xumuhu'. Narain ho' turuhu' con Caxicon Jam quem.

⁴ Taxi' urut con Taramaxicon nexi' pain ca quep xiho' cuhu' ma', pain ca mi' cuhu' pain ca tomi' ha' cara maparut pain ca pijim' nuxut pain ca hu urut pahu' pane.

⁵ Tomi' mi' urut pahu' con, ma' ta mi' cuhu' pain ca querec pin' cara hun Iri' Jam pain ca om noc cuhu' ma', je pain ca querec pin' cara hun Cristo pain ca to' hwara' opa cuhu' pain xumuhu' ma' quem.

Ca taramaja xo' je tococwa oro wari' co howa nonon Jeju Cristo

⁶ Tomi' mip xim urut pahu' pain i ca' quem xere. Wirico Taramaxicon nexi' Jeju Cristo co mi' naparut pain ca tomi' mip ca' urut pahu' ca': To ni ca' jujun oro xerexi' co jam' curucucun ma', co om taramaja je na nana ma'. Om ca tomi' ha' cacain ca tomi' nucun Jeju Cristo ca an xin tiquin' mi' urut pahu' pane, pain ca tomi' ac i ca' napari' Jeju Cristo ta urut pahu' pane.

⁷ Xi taxi' ara hwein i ca' ta, pain ca na e' ne pain ca an xiho' maparut pain ca xuruxut nuxut pane, pain ca taramaja tamana urut pane. Om ca jam' ne curuxut pain ca to ho' urut pahu' pane.

⁸ Om ca wajim' e' urut pahu' pain carawa ca cao' wa quem. Taramaja tamana pan urut pane, pagar pagar ac urut pahu' pain na quem. Pain xec je pain xim quem, jam' tamana urut pain ca taramaja nuxut pane. Ma' ta om to' i'ina xut pahu' pain ca tama' wajim' xut pahu' pain carawa ca cao' wa ta urut pahu' pane.

⁹ Hohot paxi' xira pain ca wajim' urut pahu' pain carawa ca cao' wa pane. Ane noc urut pain ta urut ne. Taramaja pan e' urut pane, ma' ta win caca ne maparut ta urut pahu' pane. Na e' na pain ca an xiho' maparut pain ca taramaja nuxut quem.

¹⁰ Je ca tomi' urut pahu' pain ca to ho' to ho' wet urut pahu' pane, hu ca' urut pahu' pane: Wari' co noc nain ca taramaja wa ma', om ta cao' ca quem, ac i ma' na ca hu urut pahu' pane.

¹¹ Je ca xirao' mi' ac i ma' urut pahu' ca'. Xi taraju ara urut cocon oro win ma' hwe co jam' e' curucucun ma'. Noc nanain ca taramaja wa, to' i'ina e' nonon oro win ma' caca pain ca taramaja pan nucucun ta nanaparut co tomi' hwet nanaparut cocon.

¹² Tomi' mip urut cocon co ac i ma' nana ma' pahu'. Wirico Taramaxicon nexi' Jeju Cristo co mi' naparut pain ca hu ca' urut cocon ca': Na e' na pain ca taramaja xo' hwe. Mam' cut ac hwein tara carawa ca cao' wa je oro ca param hwe ma' quem.

¹³ Wahu' quem xere, pain ca wara taramaja xo' hwe ma': Om ta jam' camain' ne curuhu' pain ca ara wa ca awi wa me ta. Ara cara jein ta.

¹⁴ Mo ta ma' ca win ma' nuhu' co om tomi' ha' naparut pain ca hu urut con pain ca xirao' nuxut ca', pain ca taramaja xo' ra urut con ca', tomi' hwet jein wixicon pain ca cut in xujuhu' ma'. Om ac ne tara ca taxipa' hun ma', ma' ta wixipa' pin ca pain ca om taramaja xo' nucun.

¹⁵ Ta noc hun me ta. Hu pan e' jun. Win ne ca xere xujuhu' ma'.

Ca pi' pin ne ca xirao' nucucun

¹⁶ Tomi' mi' urut pahu' con Taramaxicon nexi' co mi' napari' pain ca om toron ne ximixi'. Wirico co mi' pan napari' pain. Mi' roron pain ca om toron ne ximicocon ma' urut con pahu'. Ma' paxi' tara oro ca ara nuhu' ma', pain ca to' i'ina cuhu' ma'. Je i ma' ira, mi' roron pain ca om toron ne ximicocon ta urut con Taramaxicon nexi' pahu'. Param urut con pain ca pe ho' pe ho' xam' cuhu' ta.

¹⁷ Wata' pain ca Paulo ta' ca', xirao' pan inain wuxu pain tawirinain ca xirao' ne ca'. Je cwere pain oro ca xirao' ne ta. Xirao' taxipa' inain wuxu pain tawirinain oro ca xirao' ne, ma' ta querec pin' mahu' pain ca wata' pan ne co xirao' nain ca' inuhu'. Tomi' querec te inuhu' pain ca mam' pe wet xuhu' ca', pain ca xirao' mi' xuhu' pain wuxu ca'. Ac i ca' na ca xirao' ne ca'.

¹⁸ Param urut con Taramaxicon nexi' Jeju Cristo pain ca quep xiho' quep xiho' xam' cuhu' ma', pain ca mi' e' cuhu' pain ca param nucun ta. Je i ca' ca xirao' nuxut ca'.