2 Tessalonicenses 1 - Tradução Bíblica Pacaas Novos

¹ Paulo, Silvano, Timóteo, ca' urut pain ca xirao' mi' mami' urut pahu' ca'. Xirao' mi' urut pahu' pain ca cut in xujuhu' pain Tessalônica ma', pain ca win cwere hun Cotere' Iri' Jam con Taramaxicon nexi' Jeju Cristo ma'.

² Param urut con Cotere' Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param urut cocon pain ca mi' cucuhu' pain ca om toron ne xumuhu'.

Ca tomi' mi' cocon con Iri' Jam, je pain ca tomi' querec te urut con Iri' Jam pahu' ta cocon quem

³ Na e' na pain ca tama' querec te urut con Iri' Jam pahu' ta xere. Hohot non Iri' Jam pain ca tama' tomi' querec te urut con pahu' quem, xi om ne ca howa cara ara hun ta. Win xumu win xumu tiquin' hun pain ca howa hun ma'. Mija pin na ca tomi' querec te tomi' querec te xam' xujuhu' ma' quem.

⁴ Je ca tomi' hwet urut cocon oro win howa iri' cwa' pahu'. Hwet iri urut cocon pain ca cut in to nucucun pain ca howa cocon Iri' Jam ne, tomi' hwet tomi' hwet ac urut cocon na pain ca hwara' opa nuhu' pain ca quereme hwein oro ca jain jain wa ma'. Quep em' paxi' nunuhu' oro wari' co noc nunuhu' ma'. To' i'ina paxi' nuhu' oro carawa ma' quem. Ane quereme hwein ne. Howa cara hun Iri' Jam ma' quem.

⁵ Oro ca ara nuhu' ma', je ca to' querec pin' cuhu' con Iri' Jam ma', pain ca hohot hohot pi' pin ne oro ca ara nucun ma', pain ca mi' toton cocon pain oro ca taramaja mi' caca oro wari' ma'. To' querec pin' nuhu' pain ca param nucun ma' quem, pain ca to' hohot inuhu', param inuhu' pain ca to ho' mahu' pain ca taramaxicon pe ta' ca' toton cuhu' ma' quem. Je ca jain jain hwe cocon oro wari' co quep em' nunuhu' pain ca pijim' mi' huhun con Iri' Jam co taramaxicon ma' quem.

⁶ Hohot na oro ca ara nucun Iri' Jam ma', tama' ara xo' na. Je ca taxi' xun pain ca to' i'ina toton cocon oro wari' co to' i'ina nunuhu' ma'.

⁷ Ara xo' na pain ca to' om pin tain cain ca jain jain nuhu' pain ca quep em' xihwe ma' quem. To' om pin tarain ca jain jain nuhu', to' om pin tarain ca jain jain nuxut ca' quem, pain ca aram aram quiji' qui' tain cain pawin Taramaxicon nexi' Jeju. Maqui' wi tara pain ca weo nein xe. Ja' ja' totoron oro jam co taramaja mi' nonon ma', co hwara' opa nana ma'.

⁸ Oro wari' co noc nonon Iri' Jam ma', co om tomi' ha' je na nanain capijacon ca tomi' hwet napari' con Taramaxicon nexi' Jeju ma', wap ac tococwa tara pain ca win hwe pane tococwa ma'.

⁹ Em' hwe, mama' jein cote ne xe cain xun iri tata ne, jain jain cara ac caca tara. Om ta pi' ra ha' ne cocon. To ni ca' totoron Taramaxicon nexi'. Om ta querec camain' cacain ca toc meremem nucun ca to' querec pin' napari' pain ca hwara' opa tamana nucun.

¹⁰ Wap ac i ma' totoron Taramaxicon nexi' pain xec nein ca in qui' ta' nucun. Tomi' querec te pan ac xun tara pain ca wari' nucun iri' quem. Awi ma, xi om ne ca to' witan ara maparut ta ac xun tara, tomi' ac i ma' tomi' ac i ma' xam' xun. In ac in ac xam' xun pain ca howa xun quem. Wahu' tara quem, in ac in ac xam' jun, xi om ne ca howa ara hwein capijacon ca pijim' hwet urut pahu' pane ta.

¹¹ Je ca tama' tomi' mi' urut pahu' con Cotere' Iri' Jam quem. Tomi' ca' urut con pahu': Quep xiho' roron, mi' roron pain ca hohot quequem pain ca xuruxut nucucun urut con pahu'. Win ne ca xuruxut xo' je momon pain ca xo' howa xine qui' momon pane urut con pahu'. Mam' quep xiho' roron pain ca hwara' opa tamana nem quem urut con pahu'. Ma' ta ara ara pi' pin cacain oro ca awi wa ca ara xi' caca pain ca howa cocon Jeju ta urut con pahu'.

¹² Tomi' ac i ma' urut con pahu'. Ma' ta awi na awi na cocon Taramaxicon nexi' Jeju oro wari' pain ca querec pin' cucuhu' pain ca to' witan pan cuhu' ma'. Ma' ta awi hwe awi hwe cuhu' Taramaxicon nexi' quem. Ha' taraparut quem. Om paxi' xira ca awi hwe capari' Cotere' Iri' Jam con Taramaxicon nexi' Jeju Cristo ma'. Ane xiram pa' pan cacapari' ne. Mi' taxipa' nanapari' pain oro ca param nucucun ta.