2 Pedro 3 - Tradução Bíblica Pacaas Novos

Ca in qui' nucun Taramaxicon nexi'

¹ Je ca tomi' xuhu' pain ca tomi' querec te xuhu' ca'. Wara xirao' mi' inuhu' pain cara pane, je win xirao' mi' mami' xuhu' pain xocori ca' quem. Pain oro ca xirao' ne ca', hu xim inuhu' pain ca mam' pe wet jein oro ca ca' na xo' xihwe ma' xuhu' ca', ma' ta ma' ne xumuhu' pain ca coromicat xo' nuhu' ta inuhu'.

² Mam' pe wet jein ca tomi' nucucun oro profeta nucun Iri' Jam pane, pain ca tomi' pe cacain oro ca hwet pa' xim napari'. Mam' pe wet jein ca ara je capari' Taramaxicon nexi' co to' witan napari' cwa' quem, ca tomi' hwet urut pahu' pain ca apóstolo urut ca'.

³ Tomi' xim inuhu' pain i ca' quem, tomi' mip inuhu', taraju pa' je. Maqui' ta' iri tara oro xec nein ca in qui' ta' ca Cristo Jeju ne, mija ac caca tara oro co ara e' nanain ca param pan nucucun. Tatam' tatam' tomi' xirac ac cucuhu' tara.

⁴ Tomi' ximama' ca' tuturuhu': Win ne ca tomi' pe ca Cristo pane, pain ca main in qui' ta' ina ta ca pane? Mon quem? Je xi in qui' ho' ca quem? Wara winim' paxi' nonon mana cojeo' iri' cocon mana cotere' cara pane, ane cono' ca' cocon ne. Maxinain cara ac ne na oro carawa pain ca xo' tomi' ma' pin qui' xine pain cara pane ta, ac i ma' tara ca tomi' ximama' cucuhu'.

⁵ Ane noc cacain ca mam' pe wet wa ca ara nucun Iri' Jam oro co tomi' ximama' ac i ma' xi' nana ne, pain ca tomi' ma' pin e' cain nanawin pain macan' pain cara pane. Tomi' e' na pane, hwet ca' rain com ta e' nain macan', hwet ca' ac nein na, ximija pe ac nein na oro com.

⁶ Tomi' e' nain com pane quem. We' pa rain macan' ta nain, we' pa' pin ac nein na, to' em' pin ac xine na quem.

⁷ Ac i ma' na pain ca querec wet xo' cain nanawin pain macan' ca querec iri' pain xocori ca' quem. Tomi' ca' e' na: Main maqui' tara xec nein ca wara coromicat an pe xo' ta' ca', pain ca tom pin tain nanawin pain macan', je pain ca wap toton toton oro caracat co miri'om nanapa' quem. To' om to' om pi' pin ac toton tara ta na ca tomi' nucun.

⁸ Je ca tomi' xuhu' pain ca tomi' querec te xuhu' ca'. Ta ji'am pin hwein i ca' ca tomi' xim xuhu' ca' me: Ca xica' pe nein xec ma', je pain ca 1.000 nein cawaxi' ma' quem, an an ari na con Taramaxicon Iri' Jam. Om ca querec pira con ca 1.000 nein cawaxi'. Ac ca xica' pe ne na xec con.

⁹ Xi ma' ara caca oro wari' co coromicat ca' nana: I'ina na Iri' Jam, xi ara pin cain ca wara tomi' pe nucun ta nana. Ane om i'ina ca ne, om ca om om ca. Winim' cara e' nuhu'. Noc noc xam' napari' pain ca pan' ara'am iri' pain ca wap xim capari'. Param e' napari' pain ca cwirin' cwirin' pi' pin xin ca caracat nexi' ta.

¹⁰ Ac ca om om ca paxi' na Taramaxicon nexi' ma', ane maqui' ta' ca ne. Ane ane maqui' tara xec nein ca in qui' ta' nucun. Ac pain ca ane ane maqui' ca wari' co an noc xa tain nain carawa ma' tara pain ca om winim' tocwa ma', ac i ma' tara ca ane ane maqui' ta' ne xec nucun Taramaxicon nexi'. Taraju ac xine tara ca coc irija' wa, ac jam tara, ane ane om pin ac ne tara pawin. Wiran mao ac ca tara xina con panawo' con pijo', wiran mao tara macan' je oro carawa ca to nain quem. Om om pi' pin ac ne tara ta.

¹¹ Ac i ma' tara ca om pin ta' ne oro carawa. Je ta ma' qui' ne xumuhu' ta. Xuruxut xo' je. Ta caracat hwe me. Win xumu e' jein oro ca param nucun Iri' Jam

¹² pain ca winim' hwein xec nucun. Ma' ta maqui' hap ca. Maqui' iri tara xec nucun ne, wiran mao ac ne tara pawin, om om pi' pin tara. Xain tamana tara xajinain, om pin ac ne tara oro coximinain.

¹³ Ane winim' pan xin xocori pawin je xocori macan' ne. Win ne ca wara tomi' pe mi' capari' pain. Ara e' ac cacain tara ca awi wa oro wari' co to xin nanain i cain ta.

¹⁴ Je ca tomi' xuhu' pain ca tomi' querec te xuhu' ca'. Pain ca winim' xin hwein xec nucun Taramaxicon nexi' ma', xuruxut xo' e' je, win xumu jein. Ma' ta querec hohot cuhu' Iri' Jam pain ca om toron ne xumuhu' ma', je pain ca om cuhu' ca caracat wa ma', je pain ca om ma' camain' cuhu' oro ca tomi' em' xihwe pain ca caracat wa pain ca aram aram coco' quima hwet xun hun ma'.

¹⁵ Mam' pe wet jun Taramaxicon Iri' Jam ma', pain ca winim' cara cocon oro wari'. Ma' ta ha' cocon pain ca witan ca' cacain ca wap wa ta tata. Ac i ma' na ca xirao' mi' cuhu' cwajiri' Paulo ma', co tomi' querec te iri' ma'. Wirico Iri' Jam co mi' non pain, xirao' mi' ac cuhu' pain na quem.

¹⁶ Xirao' ac i ma' taxipa' na pain oro ca xirao' nucun ma', pain ca tomi' mi' cain xec nein ca in qui' ta' ca Taramaxicon nexi'. Ma' paxi' na ca xirao' nucun ca i'ina napari' pain ca taraju pa' wa. Oro co om taraju pa' nana cocon oro co om hwara' opa nana pain ca howa nucucun ma', tomi' ni ca' nanain ca tomi' mao nein oro ca xirao' nucun Paulo. Om ca xica' pe ne ca tomi' mao nein oro ca xirao' nucun Paulo ca tomi' ni ca' caca ma', tomi' ni ca' nanain ca tomi' mao nein oro xijein capijacon Iri' Jam quem. Je ta wap xun tococwa ta.

¹⁷ Je ca tomi' xuhu' pain ca tomi' querec te xuhu' ca'. Wara taxi' huhun caram ma' co ca' na mixein xim nunuhu' ma'. Je ta ma' qui' ne xumuhu' cocon. Ma' ta om tomi' tomi' na cucuhu' pain ca pan teretem nucucun pain ca quep ximama' nucucun ma', je pain ca om ne ximicocon pain ca howa ni ca' jein oro ca howa nuhu' pane ta cucuhu' ma'. Ma' ta om camara' hwe pain ca caracat wa, ma' ta howa xo' cara hwein capijacon Iri' Jam ca ca' na xihwe ma', ca taraju pa' hwe ma'.

¹⁸ Xuruxut xo' xuruxut xo' tiquin' e' je, ma' ta querec pin' hun Taramaxicon nexi' Jeju Cristo co to' witan napari' cwa', co xiram pa' e' napari' cwa'. Tomi' hwet xin ca awi nucun pain xocori ca', tomi' hwet cara xin ca awi nucun pain oro xec ca maqui' ta' ma' quem. Amém, iri'o' na ca tomi' ne ta. Je i ca' ca xirao' ne ca'.