2 Pedro 2 - Tradução Bíblica Pacaas Novos

Oro co ca' na mixein nanain capijacon Iri' Jam

¹ Om paxi' na ca maqui' nein ca coromicat nucun wari' oro ca tomi' nucucun oro profeta pane. Ane ma' taxipa' caca oro co profeta urut mixein nonon oro wari' nucun Iri' Jam pain cara pane ne. Ac i ma' tuturuhu' oro wari' co ca' na mixein xim nunuhu' pain xocori ca' quem. Iri'o' na ca ca' na urut pahu' ca' tuturuhu', to' em' to' em' ac tococwa tara co taraju wet xun nonon. Tomi' ha' urut con Jeju ta paxi' tatara, ane om tomi' ha' xun cocon ne. Om ta tomi' ha' mami' cocon Taramaxicon nexi' co to' witan nonon pane. Ame hwe e', ane ane wap xun ac tococwa tara, to' em' pan ac tococwa tara ta.

² Mija tatara co an xiho' xun nonon pain ca pan teretem nucucun, je pain ca quep ximama' nucucun. Oro co om howa nana ma', co querec xun nonon pain ca pan teretem nucucun ma', tomi' napat ac cocon tara co pijim' xo' nanain capijacon Iri' Jam ca iri'o'.

³ Pain ca ca' na mixein xim cucuhu' ma', mixein ac cucuhu' tara, pijim' ximama' e' ac cucuhu' tara, xi jain jain ara cacain oro caramajuhu' ta, param e' nanain. Ane wap ho' xun tococwa ne. Wara awori xo' na Iri' Jam, wara coromicat an pe xo' nain ca wap xun tococwa pain cara pane. Querec na, om ca pi'am ca' cocon, wap ho' toton ta na.

⁴ Taxi' urun Iri' Jam pain ca wap toton cocon ma', xi xiram pa' tococwa oro jam co caracat nana pain ca taramaja mi' cocon pane. Wixicaracao' mi' tata pain cote ne man ca om tawirinain cain, ca jitacat tamana xim nein cain. Pao' to tata, to wet iri caca ma' ac tococwa na. Winim' e' jein xec nein ca wap xim xuhu' ta tata.

⁵ Om ca xiram pa' tococwa oro hwanana pain cara pane quem. Mi' tata pain cote ne xowi', we' pa' ac cocon na com, cono' cono' pi' pin ac caca na, xi caracat ara caca pain ca miri'om cocon Iri' Jam ta. Noé iri na ne, pijim' taxipa' nonon oro win ma' ca pane. Howa jun Iri' Jam ta nonon. Je ca to' witan tocwa pane. To' witan 7 tata ca nari nucun pane quem.

⁶ Wap tata oro wari' nein Sodoma je Gomorra quem. To' om pin ta cidade nucucun pane. Oro xiricocon, wiricoco quem, topacon pi' pin nana. Wap ac i ma' toton oro wari' co caracat nana pain ca miri'om cacapa' ta ac cocon na.

⁷ Ane to' witan tocwa Ló ne, co ara xo' taxipa' pane. Toron tamana na ximicon cocon oro win ma' ca co om ximicocon pane, co quep ximama' e' nana pain ca om tomi' ha' nucucun.

⁸ Ca pe ho' pe ho' qui' cocon pane, ca querec querec ca' ac cain na ca pan teretem nucucun, ca taraju taraju ca' ac cain na oro ca ara ximama' nucucun pain ca pan teretem nucucun pane. Toron tamana na ximicon pain oro xec. Xi ara xo' taxipa' pan ara ca pane ta.

⁹ Mam' pe wet iri irin oro ca ara ca Taramaxicon Iri' Jam pane ne, querec pin' ac urun na pain ca xiram pa' taxi' cocon oro co win xumu nanain ca param pan nucun ma', je pain ca to' witan ca' taxi' cocon pain oro ca to' i'ina nonon ma', querec pin' ac urun na pain ca pao' to taxi' cocon oro caracat co miri'om nonon quem. Pao' to pao' to maqui' pa' ac tococwa tara xec nein ca wap toton cocon pain ca caracat nucucun.

¹⁰ Wap xun paxi' tata oro caracat, ane wap tamana pan xun tococwa oro co xuruxut pan teretem nana pain ca win xumu e' cacain ca quep ximama' wa ne, je pain ca tomi' napat cocon Iri' Jam pain ca om tomi' ha' jun na caca ma' quem. Oro co ca' na mixein nunuhu' ma', tomi' xec xec e' nana. Om ca ara jin' cacain ca param pan nucucun. Tomi' napat nonon oro jam co hwara' opa nana cwain, co to nanain pawin cain. Om ca jin' cocon quem.

¹¹ Oro jam co taramaja mi' nonon Iri' Jam ma' iri nana ne, hwara' opa tamana nana, hwara' opa tiquin' ca' nonon oro co ca' na mixein nunuhu' pain capijacon Iri' Jam ma'. Ac i ma' paxi' na ca hwara' opa nucucun ma', ane tacana to pan caca pain ca coco' quima hwet cocon Taramaxicon Iri' Jam ne. Om ca tomi' napat camain' cocon oro win jam caca quem.

¹² Oro co ca' na mixein nunuhu' ma' iri nana ne, an xiho' nanain oro carawa nein mi ca om ximi ma', ca ara e' nain ca param pan ne cwerein. Hohot na pain ca quep xine, hohot na pain ca to' om pin xine quem. Ac i ma' na ca om ne ximicocon oro co ca' na mixein nunuhu' ma'. Tomi' napat ximama' nanain oro ca om taraju pa' caca. To' om pin totoron Taramaxicon Iri' Jam quem, win ne ca to' om pin xine carawa nein mi ca om ximi ma' quem.

¹³ Win hwe pane ac tococwa tara, to' i'ina ac tococwa tara, xi om ne ca to' i'ina pan ara cocon oro wari' ta. Mija nana, hohot tamana nonon ca tamanain to wa pain ca quep ximama' wa ma'. Om ca ara e' caca pain xim, ara nana pain xec quem. Corom hwet iri nunuhu' pain ca cut in xujuhu' ne, pain ca cao' querec te wi xijexi' hwe ma', tamanain to ac caca na, ja' wixipa' ac cucuhu' na pain ca mixein nucucun.

¹⁴ Tama' querec param nanam oro narima' ma', quep xitatam na nanam, om ca maho' camain' cacain ca caracat wa. Mixein nonon co om hwara' opa nana pain ca howa nucucun, hohot na pain ca caracat hwe ta tata. Param taxipa' nanain oro caramaxicocon oro win ma' caca, win xumu nanain. Iri' caxicon wari' nana! Wap pan totoron Iri' Jam ta.

¹⁵ Xuruxut xo' xuruxut xo' om pin nana, xuruxut ni ca' ac cacain na wana ca mao xo' ma', xuruxut ximama' ac caca na. Ac ca ja' ja' cocon na Balaão panxica Beor cara pane, co param nain dinheiro ca pagar xun tocwa pain ca pan tem nucun pane.

¹⁶ Profeta paxi' na Balaão pane, ane pan to' xine taraxicon ne. Burro nucun ca pan to' nain taraxicon. Om paxi' na ca tomi' taxi' ne burro ma', ane tomi' pan ne ne, tomi' ac wari' na. Para caracat ma ma' quem non, na ra ac ca na, an pe pin ac cain na ca om coromicat xo' wa pane.

¹⁷ Oro co ca' na mixein ac i ma' xim nunuhu' ma', an xiho' e' nanain manain com ca am pin ne comi ma'. An xiho' nanain ca mixem ne tajain nanawin ca nuru om pin nain camana'. Wara an pe xo' mi' tata pain ca jitacat nein xim ta.

¹⁸ Xi tomi' xec xec ximama' ara cocon oro co witan ca' xun paxi' nonon oro win ma' caca co pan teretem nana ma'. Hohot na pain ca ara hwein ca param ximama' ne curuhu' ta tata.

¹⁹ Tomi' pe ac tococwa na: Mo ta xin ne maparut, witan ca' ac huhun tara oro co hu xim nunuhu' ma', ha' ac cuhu' tara pain ca ara e' hwein oro ca param nuhu', ac i ma' na ca tomi' pe mixein tococwa ma'. Ane om ha' pan cocon pain ca witan ca' cacain oro ca ara xi' caca ta, taramaxicon ne nanain oro ca to' em' pin nonon ma'. Je cwerein pain ca wari' nexi' ca', pain ca quep xat capari' carawa ca om awi ca ara taxipa' iri'. To' quiji' pin napari', taramaxicon ne irin carawa ca quep xat napari' ca'.

²⁰ Je ca tomi' xuhu' ca'. Oro wari' co witan ca' paxi' nanain oro ca to' em' nonon ma', ca maqui' nein oro ca param pan tem wa pain macan' ca', co mam' witan ca' nanain pain ca querec pin' paxi' cocon Taramaxicon nexi' Jeju Cristo co to' witan napari' cwa', mo ta in hwet cacain oro ca pan teretem wa ma', mo ta quep xat mami' tococwa, ximin tamana ac caca tara. Ximin paxi' nana pain cara pane, pain ca om querec pin' querec cocon Jeju pane. Ane ximin tamana pan caca pain ca in hwet cacain ca pan teretem nucucun ne.

²¹ Awi xira pain ca om querec pin' cacain ca xuruxut xo' wa con Iri' Jam ta. Ane querec pin' cacain ne. Xin in ca' ac cacain na oro ca hu pan cocon Iri' Jam pane.

²² Oro ca ara caca ma', an xiho' nain ca tomi' joc mam' mi' taxipa' caca oro wari' ma'. Tomi' ca' nana: Cao' pin iri na oromijac ma' ne, we' pin ac cain na, in hwet ac cain na xicawiricon, cao' pin mami' ac cain na quem, ac i ma' na ca tomi' joc mam' mi' taxipa' caca ma'. Ma' na xijein quem: Ja' iri ta pain com caji mijac ne, xuc in hwet ac nein na horowa nein, ac i ma' na ca tomi' joc mam' mi' taxipa' caca oro wari' ma'.