2 Pedro 1 - Tradução Bíblica Pacaas Novos

¹ Simão Pedro ina pain ca xirao' mi' xuhu' ca'. Taramaja mi' inon Jeju Cristo. Apóstolo ra napa' pain ca tomi' hwet roron pain capija oro wari' capa' pane. Xirao' mi' inuhu' pain ca win ma' ne xijexi' pain ca howa xun Jeju Cristo. Wirico co Iri' Jam ne iri' cwa', co to' witan napari' cwa'. Om ca tomi' querec te paxica' capari', mi' mi' pi' pin napari' pain ca howa xun ca'. An an ari xijein ca howa nexi' quem.

² Taxi' inuhu' pain ca querec pin' mip hun Iri' Jam con Taramaxicon nexi' Jeju ma'. Je ca param ton Iri' Jam pain ca quep xiho' tamana cuhu' pain ca mi' cuhu' pain ca param nucun. Param inon pain ca mi' hwara' cuhu' pain ca om toron ne xumuhu' quem.

Ca horon horon tiquin' je pain ca hohot mahu' ta capari' Iri' Jam

³ Quep xiho' tamana napari' Iri' Jam, xi om ne ca hwara' opa ara ca pain ca mi' mi' pi' pin capari' pain oro ca to' xuruxut xo' napari' pain ca win xumu e' xin ca param nucun. Ha' napari' pain ca xuruxut xo' wa quem, xi mi' ara capari' pain ca querec pin' xo' xun Jeju Cristo. Wirico co wari' ne napari', ma' ta jao jao ma' mahu' pain ca hwara' opa ne ca', je pain ca awi tamana ne ca' quem napari'.

⁴ Je ca mam' ara mi' capari' pain oro ca wara tomi' pe ca pane. Awi tamana na oro ca wara tomi' pe nucun, om ca em' camain' ne, hohot tamana na oro ca param mi' capari'. Ma' ta witan ca' hwein oro ca to' em' nuhu' ma', ca maqui' nein oro ca param pan tem wa pain macan' ca' napari'. Ma' ta an xiho' mahu' pain ca ara xo' ne pain ca Iri' Jam ne ta napari' quem.

⁵ Je ca tomi' ca' xuhu' ca'. Ara jein ca tomi' mi' xuhu' ca', win xumu jein. Howa iri jun Jeju Cristo ne, awi ac hwe tara, xuruxut xo' ac hwe tara quem. Xuruxut xo' iri je ne, taraju pa' ac hwe tara, querec pin' ac hun tara Iri' Jam.

⁶ Querec pin' iri jun Iri' Jam ne, miri'om ac hwein tara ca param pan nuhu'. Miri'om iri jein ca param pan nuhu' ne, quereme cara ac hwein tara oro ca to' i'ina nuhu'. Quereme cara iri jein oro ca to' i'ina nuhu' ne, xuruxut xo' ac hwe tara pain ca win xumu hwein ca param pan nucun Iri' Jam.

⁷ Win xumu iri jein ca param pan nucun Iri' Jam ne, tomi' querec te caracan ac xujuhu' tara pain ca xere xujuhu'. Tomi' querec te caracan iri xujuhu' pain ca xere xujuhu' ne, tomi' querec te querec te pi' pin ac huhun tara oro wari'.

⁸ Je ca tomi' xuhu' ca', mo ta xuruxut xo' ac i ma' hwe, mo ta ara ara tiquin' hwein oro ca tomi' mi' xuhu' ca', querec pin' iri'o' ac hun tara Taramaxicon nexi' Jeju Cristo, ha' ac cuhu' tara pain ca taramaja mi' hun, je pain ca quep xiho' caracan xujuhu' ma' quem.

⁹ Wari' co om ara nain ca tomi' mi' xuhu' ca' iri na ne, ac ca om ne na tocon, ac ca paxi' pe ca na, xi taraju pa' ca ta. Ji'am pin nain ca ara nucun Iri' Jam pane, pain ca xic am pin qui' cain ca caracat nucun pane.

¹⁰ Je ca tomi' xuhu' ca' xere. Ara ara tiquin' jein ca tomi' mi' xuhu' ca', win xumu mip jein. Ma' ta querec pin' xihwe pain ca wari' ne cuhu' Iri' Jam ma', pain ca tora' iri'o' cuhu' ma'. Mo ta ara ara tiquin' hwein, om ta an pe camain' hwein ca howa wa Iri' Jam.

¹¹ Tomi' querec te tamana ac cuhu' tara Taramaxicon nexi' Jeju Cristo co to' witan napari' ma', pain ca aram aram corom xi' hwein ca taramaxicon pe ca pain pawin cain. Corom je, to ho' cara xine ta ac cuhu' tara. Om ta pi' ra ha' ne ca taramaxicon pe ca pain pawin cain.

¹² Je ca tomi' xuhu' ca'. Wara taxi' paxi' hwein oro ca tomi' mi' xuhu' ca'. Taxi' paxi' inuhu' pain ca howa hwein capijacon Iri' Jam ca ca' na xihwe pane. Taxi' paxi' inuhu' pain ca om tara ta'a camain' hwein. Ane tama' mam' pe wet jein ta xuhu' ne.

¹³ Ca' na ca coromicat ne ca', pain ca e' e' wet ta' ca': Hohot tamana napa' pain ca tama' to' mam' pe wet xuhu' pain oro capijacon Iri' Jam ca ca' na xihwe pane, ac i ma' na ca coromicat ne ca'.

¹⁴ Xi taxi' ara xije pain ca mi' pin ta' ta' ca'. Om ta pain homa ne, mi' pin ac ta' tara. Win ne ca wara tomi' hwet capa' pain Taramaxicon nexi' Jeju Cristo pane.

¹⁵ Je ca win xumu tain ca taramaja ne ca', pain ca xirao' mi' xuhu' ca'. Jain jain inain. Ma' ta ha' cuhu' pain ca tama' mam' pe wet hwein pa'ao' inuhu', pain ca aram aram mi' pin ta' ta' ca'.

¹⁶ Xi tomi' ximama' urut pain ca pijim' urut pahu' pane ta, om ca maqui' nein ca coromicat ximama' pan nuxut. Tomi' hwet iri urut pahu' con Taramaxicon nexi' Jeju Cristo pain ca hwara' opa nucun pain ca in qui' ta' nucun ne, tomi' iri'o' ac urut pahu' na. Querec urut con pain iri' ca hwara' opa tamana nucun.

¹⁷ Wirico Cotere' Iri' Jam co mam' tomi' non Panxica pain ca hwara' opa tamana pan nucun pain ca an hwet pe cain ca awi nucun pain ca mi' con pain ca toc meremem nucun pane. Tomi' ca' non: Mon cwa' panxita' co om noc camain' ta' cwa'. Hohot tamana napa' ta na ca tomi' con.

¹⁸ To ho' urut con pain tamain pacun pane, pain iri' pacun nucun Iri' Jam, taraju urut pain ca tomi' nucun ca maqui' nain pawin quem.

¹⁹ Je ca taxi' xuxun oro profeta pain ca pijim' xo' nucucun pane quem. Iri'o' na ca pijim' nucucun, om ca tara ta'a camain' xuxun. Awi na pain ca taraju wet hwein ca pijim' nucucun quem. Xi an xiho' ara nein naran ca toha pe nain xim ta. Toha toha xec pa' ac cuhu' tara, hwet pa' ac cuhu' tara pijo' nein xo' xec pain xumuhu' ma'.

²⁰ Tomi' xim inuhu' pain i ca' quem, tomi' mip inuhu', taraju pa' je. Oro ca xirao' nucucun oro profeta pain ca xirao' pe cacain capijacon Iri' Jam pane, om ca maqui' pan nein ca coromicat nucucun pain ca tomi' xo' cacain ca taraju pa' pan nucucun.

²¹ Xi maqui' camain' nein ca coromicat nucun wari' oro ca tomi' nucucun oro profeta ta. Maqui' pan non Iri' Jam. Je Tamataracon Iri' Jam ca tomi' nonon pain ca tomi' nucucun, an xin tiquin' jein ca tomi' ne ta ac tococwa na oro wari' co tomi' hwet nanain ta.