2 Coríntios 9 - Tradução Bíblica Pacaas Novos

¹ Hohot paxi' na pain ca om xirao' mi' xuhu' ca', pain ca quep xiho' xun tococwa oro wari' nucun Iri' Jam pain Jerusalém ma'.

² Querec pin' inuhu' pain ca quep xiho' xuxun huhun ma'. Je ca tomi' hwet toton oro xerexi' co to nanain Macedônia cwa' pahu', tomi' ca' inonon pahu': Tomi' querec te tamana inonon oro xerexi' co to nanain macarain Acaia ma', wara awori to nana pain xijein cawaxi' pane, pain ca quep xiho' xuxun cocon oro xerexi' co to nanain Jerusalém, ac i ma' na ca tomi' hwet toton pahu'. Taxi' pin iri nunuhu' pain ca jain jain hwein ca quep xiho' wa ne, mija pin ac caca na co win caca ne nunuhu'. Ac i ma' xixi', quep xiho' xuxun oro xerexi' co to nanain Jerusalém ta pin ac caca na pahu'.

³ Querec pin' ac i ma' paxi' inuhu' pain ca quep xiho' xi' hwe ma', ane hohot ne pain ca mam' xuhu' cocon xerexi' cwa' ne. Hwet jujun, quep xiho' jujun pain ca cut in xo' cacain dinheiro ca mi' xi' caca ma' inonon pahu'. Ma' ta om werem pa' ne capija pain ca win ne ca tomi' xuhu' pain ca wara awori to nana pain ca quep xiho' xi' caca ta toton pahu'.

⁴ Je ca tomi' xuhu' ca'. Mo ta hwet xuhu' pain Corinto ma', mo ta ja' ja' xim cacapa' win ma' nexi' co to nanain Macedônia ca', mo ta maqui' pa' urut pahu' pain ca om wara cut in xo' hwein dinheiro ca mi' xi' hwe ma', wixipa' ac ta' tara, wixipa' ac hwe tara quem. Xi tomi' hwet ara toton pahu' pain ca wara cut in xo' tatarain ta toton pahu' ta.

⁵ Je ca hohot capa' pain ca tomi' toton xerexi' cwa', pain ca wara hwet jujun ta toton pahu'. Quep xiho' jujun pain ca wara cut in xo' xin cacain dinheiro ca mi' xi' caca ta inonon pahu'. Querec pin' ac xihwe tara pain ca mi' querec te hwein ma', je pain ca om tomi' ha' e' maparut pain ca tomi' tomi' na urut pahu' pain quem.

⁶ Mam' pe wet jein i ca' quem: Mo ta oin' xin tocwi trigo pain totaxi' ma', mo ta oin' wijimain e' xin, caracat wijimain ac xin tara. Mo ta oin' tamana xin, caracat tamana ac xin tara quem.

⁷ Je ca na e' ne pain ca mi' mi' xam' hwein dinheiro ca wara coromicat an to xo' hwe pain xumuhu' ma'. Ta mi' xiram pa' hwein me. Om ca na ne pain ca mi' e' hwein pain ca tomi' tomi' na pin xujuhu' ma'. Wari' co mi' querec te ma', wirico ara xi' na co tomi' querec te pan ca Iri' Jam ma'.

⁸ Hwara' opa na Iri' Jam. Ha' non pain ca mi' cuhu' pain oro ca param hwe pain oro ca ximin hwe ma'. Mi' hwara' tiquin' ca' tarain ca param nuhu' pain ca ximin nuhu' quem. Ma' ta tama' ma' cuhu' ta nuhu', ma' ta hwara' tiquin' ca' nein ca param nuhu', ma' ta ha' cuhu' pain ca mi' mi' tiquin' hwein pain ca quep xiho' xujuhu' ta nuhu' quem.

⁹ Je ca xirao' pe xine pain capijacon Iri' Jam ma': Mi' hwara' taxipa' nonon pain carawa oro wari' co ximin nana ma'. Om ta pi' ra ha' camain' ne ca ara xo' nucun pain ca xiram pa' cocon ta. Ac i ma' na ca xirao' pe xine ma'.

¹⁰ Noro jun co ma', pain ca mi' cain oro tocwi ca oin' wa ma', je pain ca mi' cain carawa ca cao' wa ma' quem. Ac i ma' na pain ca mi' hwara' mi' hwara' tiquin' cuhu' pain oro carawa ma' quem. Ha' ac cuhu' tara pain ca xiram pa' xiram pa' tiquin' huhun oro co ximin nana pain ca om cocon carawa ma' quem.

¹¹ Mi' tamana ac xihwe tara pain oro carawa, ma' ta ha' cuhu' pain ca xiram pa' xiram pa' tiquin' huhun oro co ximin nana ma', pain ca mi' querec te huhun pain dinheiro ma' quem. Aram aram mi' xuxun iri urut cocon pain dinheiro nuhu' xerexi' co to nanain Jerusalém ne, tomi' querec te ac cocon Iri' Jam tara pain ta.

¹² Pain ca quep xiho' xuxun huhun oro wari' nucun Iri' Jam co to nanain Jerusalém ma', pain ca mi' xuxun huhun pain dinheiro ma', om ca xica' quep xiho' e' huhun pain ca ximin nucucun pain ca om cocon carawa ma'. Ja' tomi' querec te tamana xuxun huhun quem, tomi' querec te tamana ac cocon tara Iri' Jam pahu'.

¹³ Quep xiho' iri jujun ne, querec pin' ac cucuhu' tara pain ca tomi' ha' hun Iri' Jam ma', je pain ca an hwet pe hwein ca howa nuhu' pain ca tomi' ha' hwein capijacon con Cristo. Tomi' querec te totoron pain ca quep xiho' xuxun huhun cocon oro xucucun co ximin nana ma' quem.

¹⁴ Tomi' mi' iri tuturuhu' con Iri' Jam ne, tomi' querec te tamana ac cucuhu' tara pain ca om noc tamana cucuhu' ma'. Xi wirico ara ca Iri' Jam co mi' nuhu' pain ca xiram pa' tamana huhun oro co ximin nana ta.

¹⁵ Je ca tomi' xuhu' ca'. Tomi' querec te xun Iri' Jam pain ca xiram pa' e' capari' ca', pain ca mi' e' capari' pain ca param nucun. Awi tamana na, om ca tomi' ac xine ca awi tamana nein ta.