2 Coríntios 8 - Tradução Bíblica Pacaas Novos

Ca xiram pa' tococwa co howa to nanain Jerusalém

¹ Tomi' hwet xim urut pahu' pain carawa ca ara nonon oro xerexi' co howa to nanain macarain Macedônia ca' xere, pain ca xiram pa' pan cocon Iri' Jam ma'.

² Mija paxi' na oro carawa ca to' i'ina nonon ma', ane tomi' querec te tamana pan caca ne. Ximin nana, om paxi' nonon carawa, ane xiram pa' tamana tococwa oro xucucun co iri' co om nonon carawa quem. Ac ca caramaju caca na pain ca mi' querec te tococwa pain wijimain dinheiro nucucun.

³ Dinheiro ca mi' caca ma', om ca mi' wijimain e' cacain, om na. Mi' hwara' tiquin' ca' nanain dinheiro ca pe ho' nonon quem. Taxi' inonon, je ca tomi' xuhu' ca'. Maqui' nain ximicocon ca mi' xi' caca ma'.

⁴ Tomi' mip ca' nanaparut pane: Ta tomi' in pin maparut pain ca mi' urut cocon pain dinheiro oro xerexi' co to nanain Jerusalém me ta nanaparut. Param tamana urut pain, win ne ca quep xiho' huhun ma', param urut pain quem, quep xiho' xuxun urut cocon ta nanaparut.

⁵ Quep xiho' tamana nana quem. Mi' wijimain e' tatarain xi' ma urut cocon pain dinheiro pane. Ane om mi' e' cocon pain dinheiro ne. Mi' cain' pan xucucun con Taramaxicon nexi' ma', pain ca tomi' ha' cara xut pum ta cocon ma', tomi' ac cacaparut na quem, tomi' ha' xut pahu' pain oro ca tomi' mi' maparut ma', je ca param mi' caparut Iri' Jam ta nanaparut.

⁶ Je ca tomi' ca' urut con Tito cwa' pahu'. In hwet roron oro xerexi' pain Corinto ta urut con pahu'. Quep xiho' roron pain ca cut in xo' cacain dinheiro ca mi' xuxun cocon oro xerexi' pain Jerusalém ta urut con. Win ne ca wara quep xiho' momon pane, pain ca xo' xiram pa' xuxun cocon pain cara pane, quep xiho' mami' roron pain ca cut in awori pin xin cacain dinheiro ca mi' xuxun cocon ta urut con pahu'.

⁷ Je ca tomi' urut pahu'. Win ne ca tama' ara xo' hwein oro ca ara hwe ma': Howa mip hun Cristo. Pijim' taxi' hwein capijacon Iri' Jam. Taraju pa' hwein quem. Jain jain hwe pain ca win xumu hwein oro ca ara xo' wa. Win hwe ma' maparut pain ca om noc camain' urut pahu' quem. Je ta ara xo' ac i ma' qui' hwe pain ca quep xiho' huhun oro xerexi' co om nonon carawa pain Jerusalém quem. Xiram pa' jujun pain ca cut mi' huhun pain dinheiro quem.

⁸ Om paxi' na ca tomi' mi' xuhu' pain ca cut mi' jujun pain dinheiro ta xuhu' ca', om na. Tomi' hwet e' inuhu' cocon oro xerexi' co jain jain nana pain ca win xumu cacain oro ca ara xo' wa ma'. Am an xiho' huhun. Mo ta an xiho' huhun ma', querec pin' ac xihwe tara pain ca tomi' querec te iri'o' huhun oro wari'.

⁹ Win ca Taramaxicon nexi' Jeju Cristo cwa'. Taxi' ara xi' hun pain ca xiram pa' tamana capari'. Caramaju tamana paxi' na pain ca hwara' opa tamana nucun pain ca taramaxicon nucun pane, je pain ca Iri' Jam nucun pane. Ane an pe pin tain pahu' ta capari' ne. An pe pin iri nain ne, wari' pin ac ca na, ximin pin ac ca na quem. Ma' ta to' caramaju pin xuhu' pain ca mi' xim xuhu' pain oro ca awi wa con Te ta napari'.

¹⁰ Ca' na ca coromicat ne ca', pain ca mi' xun huhun pain dinheiro: Awi na pain ca mi' hwein, xi wahu' ara ne co wara coromicat an pe xo' cain' nanain ca cut mi' wa, wahu' co cut in cain' nanain quem.

¹¹ Je ta ara ara awori pin qui' hwein ca wara ara xixi' na hwe pane ta. Cut in xo' jein dinheiro ca mi' xi' hwe ma'. Cut in querec te jein, win ne ca tomi' querec te hwe pain ca xo' coromicat an pe xo' qui' hwein pain cara pane. Cut in xo' ho' jein dinheiro ca ma' nuhu' pain xocori ca'. Co ma' mija non, mija ac ne tara ca cut in xo' ca. Co ma' wijimain non ma' iri na ne, wijimain ac ne tara ca cut in xo' ca quem.

¹² Je ca tomi' xuhu' ca'. Mo ta mi' hwara' xin dinheiro pain ca ma' mija capari' ca', mo ta mi' wijimain xin pain ca ma' wijimain capari' ca', je je ari na con Iri' Jam. Mo ta mi' querec te xin, mo ta om mi' xiram pa' xin, hohot ac con na Iri' Jam. Xi mi' hwara' jein capari' pain ca ma' wijimain e' capari' ta.

¹³ Pain ca quep xiho' xun huhun oro xucucun wari' co om nonon carawa ma', om ca na ne pain ca mi' mi' pi' pin hwein oro caramajuhu' pain ca ximin pin hwe ma'. Noc urut pain i ma' pahu'. Awi na pain ca an an ari xujuhu' pain ca ma' ma' xam' cuhu' carawa.

¹⁴ Ane mija cuhu' carawa pain xocori ca' ne. Awi na pain ca quep xiho' huhun pain ca ximin nucucun. Maqui' iri tara xec nein ca ximin pin hwe ne, mo ta mija cocon carawa, quep xiho' ac cucuhu' tara, an an ari ac xujuhu' tara pain ca ma' ma' xam' cuhu' carawa quem.

¹⁵ Win ne ca xirao' pe xine pain capijacon Iri' Jam quem, pain ca cut qui' cacain capam' ca camara' qui' nain pawin pane. Ca' na con: Co cut in tamana ma', hohot non. Co cut in wijimain ma', hohot non quem, om ca ximin ca, ac i ma' na ca xirao' pe xine pain capijacon Iri' Jam pane.

Tito cocon oro win ma' ca co quep xiho' xuxun nonon oro wari' nein Corinto

¹⁶ Tomi' querec te tamana inon Iri' Jam pain ca meo cain ximicon Tito cwa', pain ca to' jain jain con pain ca xiram pa' xim cuhu' ca'. An xiho' napa' pain ca jain jain xuhu' pain ca xiram pa' xuhu' ca' quem.

¹⁷ Xi xin ne hap ara caparut pain ca in hwet roron, quep xiho' roron ta urut con pahu' ta. Om ca hehe ca pahu', wara in hwet toton ta nuhu'. Wara jain jain nuhu', quep xiho' xim nuhu', maqui' nain ximicon ca hwet xim cuhu' ca'.

¹⁸ Ja' ja' ron urut con coxari' cwa' quem, co querec pin' caca oro co cut in xucucun pain ca howa cocon Jeju ma' quem. Querec pin' ta pain ca taramaja nucun ma', pain ca pijim' cain capijacon Iri' Jam con Jeju ma'.

¹⁹ Wirico co tora' wa pain ca ja' ja' xim caparut pain Jerusalém quem, pain ca aram aram cut mi' xuxun urut pain dinheiro ca cut in xo' pan hwe cocon oro co ximin nana pain i cain. Cut mi' xuxun pain urut quem, ma' ta querec pin' cacain ca awi nucun Taramaxicon Iri' Jam, je pain ca querec pin' cacaparut pain ca quep xiho' xuxun urut cocon.

²⁰ Ara xite xin urut pain dinheiro ca mi' querec te hwe pain ca xiram pa' tamana nuhu' ma' quem, pain ca cut to xo' xin urut pain, je pain ca mi' xo' xuxun urut cocon pain. Ma' ta om tomi' ximama' cacaparut oro wari' cwa' urut.

²¹ Ma' na xumuxut pain oro ca ara urut con, ara xo' xixin na urut pain. Ma' ta querec hohot capari' Taramaxicon Iri' Jam pain oro ca ara iri' ca', ma' ta querec hohot cacapari' oro wari' pain oro ca ara iri' ca' quem, ac i ma' na ca coromicat nuxut.

²² Ma' na xucun coxari' cwa' quem, co ja' ja' ron Tito con win ma' ca cwa' urut. Querec ho' querec ho' urut con pain oro ca taramaja nucun. Wara jain jain paxi' na pain ca win xumu cain oro ca ara xo' wa pane, jain jain tamana pin ac ca na pain ca quep xiho' xim cuhu' pain xocori ca' quem. Xi querec pin' ara cuhu' pain ca xiram pa' xuxun huhun oro xerexi' co ximin nana ta. Om ca tara cocon ta'a camain' cuhu'.

²³ Win ma' ne inon Tito cwa' quem, taramaja wi urut pain ca quep xiho' xim urut pahu'. Xerexi' co ja' ja' xun nonon cwa' quem, wiricoco nana co tora' caca oro co cut in xucucun pain ca howa cocon Jeju ma' quem. Ja' ja' jun Tito ta tata, ac ca ja' ja' pan urut con tara pain ca ja' ja' hun ma' tata. An hwet pe nanain ca awi nucun Cristo pain ca xuruxut xo' nucucun quem.

²⁴ Je ca tomi' xuhu' ca'. Tomi' querec te jujun xerexi' cwa' inuhu'. Ma' ta querec pin' cucuhu' oro co howa nonon Cristo pain ca tomi' querec te iri'o' huhun ma'. Querec pin' tataraparut pain ca tomi' iri'o' urut pain ca awi nana, tomi' querec te iri'o' xucucun ta urut cocon pahu' quem.