2 Coríntios 7 - Tradução Bíblica Pacaas Novos

¹ Je ca tomi' urut pahu' pain ca tomi' querec te urut pahu' ca'. Tomi' ac i ma' napari' Iri' Jam pain ca tomi' an pe mi' capari' pain ca tomi' nucun ca'. Na e' na pain ca an to pin xin oro ca to' pan teretem napari' pain cwerexi', je pain ca coromicat nexi' ca'. Na e' na pain ca tomi' ha' xun pain ca in ac xun quem. Win xumu xun pain ca to' hohot pin xim capari' ca'. Ca win xumu ac xun tara, ca win xumu ac xun tara, to' hohot mip ac capari' tara quem.

Ca tomi' querec te tococwa pain ca cwirin' pin nucucun pane

² Ta hehe maparut me, tomi' querec te tamana xut me, xi ara cup urut pahu' ta. Om ca to' em' urut pahu', om ca mixein camain' urut pahu'.

³ Om ca tomi' em' xuhu' pain ca pan to' tain tarajuhu' ca', om na. Wara tomi' hwet ara xi' inuhu' pain ca tomi' querec te tamana urut pahu' ca'. Pain ca e' e' wet nexi' ca', pain ca aram aram cono' xi' iri' quem, om ta pi' ra ha' ne ca om noc urut pahu' ta.

⁴ Om ca hehe camain' xuhu' pain ca tomi' xim xuhu' ca'. Tomi' querec te tamana inuhu' quem. To' hwara' opa tamana mahu' pain xumu quem. To' i'ina paxi' napa' oro carawa ca', ane tomi' querec te tamana ta' ne.

⁵ Tan' qui' iri urut pain macarain Macedônia ca' ne, om ca xao to wa camain' urut pain xumuxut. Jam' tamana urut pane. Mija ara xi' na oro carawa ca to' i'ina naparut pane. Jain jain urut cocon oro co noc nanaparut pain ca tomi' in pin tamana cacaparut. Toron tamana na xumuxut pahu' quem.

⁶ Ane to' hwara' opa taxipa' con wari' co tomi' xaxa' Iri' Jam ne. To' hwara' opa naparut pain ca wa' qui' ca Tito cwa' quem.

⁷ Om ca to' hwara' opa e' caparut pain ca wa' qui' nucun ca', to' hwara' opa naparut pain ca tomi' hwet caparut pain ca to' hwara' opa pan hun quem. To' hwara' opa napa' pain ca tomi' ca' capa' quem: Coromicat nenem, tomi' xaxa' nana pain ca pan teretem nucucun, xiram pa' nenem pain ca quep xiho' xim quequem ta napa' pahu'. Je ca tomi' querec te tamana ta' ca'.

⁸ Ja' tomi' xaxa' paxi' inuhu' pain ca xirao' mi' qui' xuhu' pane, ane hohot ne pain ca xirao' mi' xuhu' ne. Om ca tomi' xaxa' ta' pain ca xirao' mi' xuhu' pane. Iri'o' paxi' na pain ca tomi' xaxa' ta' pain ca xo' xirao' mi' qui' xuhu' pane, om xi xirao' mi' toton ta paxi' inuhu' ira, xi querec pin' ara xuhu' pain ca ja' tomi' xaxa' xuhu' ta. Ane taxi' xuhu' pain ca om tomi' xaxa' cara hwe pain ne.

⁹ Je ca tomi' xuhu' ca', tomi' querec te pin ina pain xocori ca' pahu'. Om ca tomi' querec te ta' pain ca ja' tomi' xaxa' xuhu' pain ca xirao' ne pane, om na. Tomi' querec te pin ina, xi om ne ca tomi' xaxa' tomi' xaxa' cwirin' pin ara hwe ta. Je ca param mi' cuhu' Iri' Jam quem, wirico co mi' nuhu' pain ca tomi' xaxa' nuhu'. Om ca to' ara urut pahu' pain ca xirao' mi' qui' urut pahu' pane quem.

¹⁰ Je ca tomi' xuhu' ca'. Ja' tomi' xaxa' iri napari' pain ca caracat nexi' Iri' Jam ne, cwirin' pin ac iri' na, coromicat ni pin ac iri' na, witan pin ac iri' na, e' pin ac iri' na quem. Hohot hohot pi' pin napari' ca ja' tomi' xaxa' ac i ma' capari' Iri' Jam ta. Ane om ac i ma' ne cocon oro wari' co om howa nonon ne. Tomi' xaxa' iri nana pain ca caracat nucucun ne, om ca cwirin' cacain. Aram aram cono' pin e' ac caca na quem.

¹¹ Je ca tomi' xuhu' ca', taraju wet je e'. Ja' tomi' xaxa' iri nuhu' Iri' Jam pane ne, meo ac cuhu' na pain xumuhu'. Jain jain ac hwe na pain ca win xumu pin hwein ca ara xo' wa. An hwet pe mi' ac maparut na pain ca om quep xiho' hun co caracat ma', om ca miri'om urut con pain ca caracat nucucun ta ac hwe na quem. Jin' pin ac hwe na pain ca wap wi tarapari' xi' ma hun Iri' Jam pain ca aram aram wap ton con quem. Xiram pa' tamana ac maparut na pain ca coromicat maparut, toron ac ne na xumuhu', pan to' mip ac hwein na taraxicon quem. Querec pin' ac xihwe na pain ca om caracat wi hwe con.

¹² Je ca tomi' xuhu' ca'. Xirao' mi' iri inuhu' pane ne, om paxi' na ca pan to' tain ta' taraxicon co caracat ma' pahu'. Om paxi' na ca quep xiho' ton ta' co ara cup ca ma' quem. Xirao' mi' inuhu', ma' ta querec pin' xujuhu' pain ca om noc maparut ta. Je ca xirao' mi' xuhu' pane. Taxi' napa' Iri' Jam pain ca tomi' iri'o' xuhu' ca' quem.

¹³ Je ca to' hwara' opa maparut ma'. Om ca xica' to' hwara' opa maparut quem. To' hwara' opa naparut Tito quem. Ja' tomi' querec te tamana naparut pain ca querec pin' urut con pain ca tomi' querec te nucun pahu'. Xi om ne ca to' hwara' opa to' hwara' opa pi' pin ara hun ta, toron toron om pin ac ne na ximicon pahu'.

¹⁴ Wara tomi' hwet inon Tito pahu' pain ca om hwet querec cuhu' pane. Awi nana, ma' pin na ximicocon ta, ac i ma' na ca tomi' hwet xuhu' con. Iri'o' na ca tomi' ton quem. Om ca to' wixipa' mahu', xi querec pin' ara cuhu' pain ca ma' pin ne xumuhu' ta. Win ne ca iri'o' iri'o' pi' pin ne oro ca tomi' xuhu' pane, ac i ma' na ca iri'o' ne oro ca tomi' hwet ton pahu' quem.

¹⁵ Tomi' querec te tamana nuhu' Tito cwa' quem. Mam' pe wet iri nuhu' pain ca taraju wet taraju wet pi' pin hun pane ne, je pain ca tomi' querec te hun pain ca tomi' ha' hap hun pata', tomi' querec te mip ac cuhu' na quem.

¹⁶ Tomi' querec te inuhu' quem, xi om ne ca taxi' ara xuhu' pain ca ara e' hwein ca param nucun Iri' Jam ta.