2 Coríntios 6 - Tradução Bíblica Pacaas Novos

¹ Je ca tomi' mip urut pahu' pain ca taramaja wi urut con Iri' Jam cwa'. Xin ne cara jun pain ca xiram pa' xuhu' ta cuhu' ma'. Ma' ta om werem pa' ne capijacon pahu' ta urut pahu'.

² Xi ma' ara ne ca xirao' pe xine ca tomi' nucun Iri' Jam ta. Ca' na con: Maqui' iri napa' xec nein ca xiram pa' xim xim ne, ha' ac xim na pain ca tomi' mapa' ma'. Maqui' iri napa' xec nein ca to' witan xim xim ne, quep xiho' ac xim na quem, ac i ma' na ca xirao' pe xine ca tomi' nucun Iri' Jam pane. Je ca tomi' xuhu' ca'. Taraju wet je e'. Maqui' pin na xec nein ca xiram pa' pin xim capari' Iri' Jam ca'. Maqui' pin na xec nein ca to' witan pin xim capari' quem.

³ Ara xite xujuxut pain oro ca xuruxut nuxut ca', ma' ta om tomi' em' cacain capijacon Iri' Jam ca pijim' hwet urut cocon. Ma' ta om tomi' in pin cacaparut pain ca pijim' hwet urut pain capijacon Iri' Jam ta urut quem.

⁴ Je ca an hwet pe urut pain ca xuruxut xo' nuxut pain oro ca ara naparut pain ca taramaja mi' urut con Iri' Jam cwa'. Ca' na: Howa cara urut pain oro ca to' i'ina naparut ca'. Jain jain urut, ximin urut pain ca to' i'ina caparut oro carawa, tomi' xaxa' urut quem.

⁵ Ma' nana co to' nanaparut ma', ma' nana co tao' to nanaparut, ma' nana co teretem nana, quep em' quep em' ac cacaparut na quem. Taramaja tamana urut, ma' na xim ca om pi'am xo' urut, pe' tamana urut quem.

⁶ Ca' ac urut na pain ca an hwet pe urut pain ca xuruxut xo' nuxut ca' quem: Om ca quep urut cacam xequem narima'. Taraju pa' urut pain capijacon Iri' Jam. Tomi' pan hot urut cocon oro wari'. Xiram pa' urut cocon quem. Pe ho' naparut Tamataracon Iri' Jam pain xumuxut. Tomi' querec te iri'o' urut cocon oro wari' quem.

⁷ An hwet pe urut pain ca xuruxut xo' nuxut pain ca pijim' hwet urut pain capijacon Iri' Jam ca iri'o'. Mam' taramaja urut pain ca hwara' opa nucun Iri' Jam quem. Xuruxut xo' iri urut ne, ac soldado co cut nain ca mam' mixita nucun urut, ha' ac caparut na pain ca mixita xo' urut pain oro ca om awi wa, ha' ac caparut na pain ca narain ho' xujuxut cocon oro co to' quiji' pin xun nanaparut ma'.

⁸ Ma' nana wari' co tomi' querec te nanaparut, awi hwe awi hwe ta nanaparut. Ma' ac caca na oro xucucun co noc nanaparut, tomi' napat nanaparut. Ma' nana co mixein hwe ta nanaparut quem. Ane tomi' iri'o' urut ne.

⁹ Ma' paxi' nana co om querec pin' nanaparut, ane ma' caca oro xucucun co querec pin' nanaparut ne. Ac ca cono' xi' urut na, ane e' e' wet urut ne. To' paxi' nanaparut, ane om to' parapa' pin cacaparut ne.

¹⁰ Ja' tomi' xaxa' paxi' nanaparut, ane tama' tomi' querec te urut ne. Ximin paxi' urut pain ca om caparut carawa ca', ac ca to' caramaju pin urut cocon na pain ca howa nucucun. Om paxi' naparut carawa ca', ane mene mene pi' pin urut pain oro carawa ne.

¹¹ Je ca tomi' xuhu' ca', pain ca to hwein Corinto ma'. Om ca tomi' capijacon e' urut pahu' pain ca tomi' hwet urut pahu' pain ca coromicat nuxut ca', pain ca om noc camain' urut pahu' ca'.

¹² Om ca hehe camain' urut pain ca tomi' querec te urut pahu' ca'. Tomi' querec te iri'o' urut pahu'. Wahu' ma' iri na ne, hehe pan hwe, om ca tomi' querec te homa maparut.

¹³ Win urut pahu', tomi' inuhu' pain ca ac ca mana panxita' xuhu' ne ca'. Tomi' querec te tamana xut me inuhu'.

Ca om na ne pain ca taxipa' tococwa co om howa nonon Iri' Jam

¹⁴ Ta taxipa' huhun oro wari' co om howa nonon Jeju me, xi jimama' ca' ara huhun ta. Je ca tomi' xuhu' ca'. Ma' tara ca wanan ac xine ca awi wa pain ca pan tem wa ra? Ma' tara ca wanan ac xine xec pain xim ra? Om na ta!

¹⁵ Ma' tara ca xin ne ac xucucun Cristo con Belial ra? Ma' tara ca coromicat an xiho' ac xucucun wari' co howa non Cristo con wari' co om howa non quem ra? Om na quem.

¹⁶ Tomi' xin xiricon Iri' Jam ma' quem. Ma' tara ca an an ari ac xijein xiricon Iri' Jam pain caji pacun ca Iri' Jam xi' ma caca oro wari' ra? Om na ta! Je ca tomi' xuhu' ca'. Xiricon Iri' Jam co e' cara cwa' iri'. Win ne ca tomi' pan ca pain cara pane: Pe ho' toton oro wari' ne cwa'. Pe ho' cara toton. Iri' Jam ne tatarapa', oro wari' ne ac toton tara quem. Ac i ma' na ca tomi' ca Iri' Jam pain cara pane.

¹⁷ Je ca xirao' pe xine i ca', pain capijacon quem: Tomi' ca' inuhu' pain ca Taramaxicon Iri' Jam ta' ca'. Paca' jujun oro co om howa nanapa'. In ca' jujun. Ein jein oro ca em' wa, ta wixicam camain' hwein me. Mo ta tomi' ha' mahu' pain ca tomi' xuhu' ca', tomi' querec te ac xuhu' tara ta. Ac i ma' na ca xirao' pe xine pain capijacon.

¹⁸ Xirao' pe ca' na quem: Te ac mahu' tara, mana panxita' ac xuhu' tara pain ca tarama' nuhu' ma', je pain ca narima' hwe ma' quem. Je ca tomi' xuhu' pain ca Taramaxicon Iri' Jam ta' ca', pain ca hwara' opa pan ta' ca'. Ac i ma' na ca xirao' pe xine pain capijacon.