2 Coríntios 5 - Tradução Bíblica Pacaas Novos

¹ Taxi' ara xi' irin i ca' quem: Em' pin iri tara cwerexi' ca an xiho' nain caji xirim ca to ximama' e' iri' pain ca e' e' wet nexi' ca' ne, cono' pin iri xi' ne, mi' ac capari' tara pain xocori cwerexi' Iri' Jam quem. Ac iri' xirim tara xocori cwerexi' pain pawin cain. Om ta quep cain wari', wirico Iri' Jam tara co quep pan tain nain. To wet cara tara quem, om ta pi' ra ha' ne ta.

² Pain ca e' e' wet iri' pain macan' ca', wa ina me ac iri' na pain ca jain jain ne ximixi' pain ca param xin xocori cwerexi' ca mi' xim capari' pain pawin cain.

³ Mi' iri tarapari' pain xocori cwerexi' ne, om ta hwet pe e' ne tamataraxi'.

⁴ Xi jain jain tamana ara ne ximixi' pain ca e' e' wet iri' pain macan' ta. Jain jain iri', wa ina me iri' pain ca to' i'ina capari' oro carawa ca'. Om paxi' na ca mi' pin ne cwerexi', ane jain jain e' irin xocori cwerexi' ca mi' xim capari' Iri' jam pain pawin cain. Ma' ta e' cara xi' iri' ta.

⁵ Wirico Iri' Jam co coromicat an to xo' napari' pain ca mi' xim capari' pain xocori cwerexi' ca'. Mi' napari' pain Tamataracon quem. Ma' ta taxi' pin mahu' pain ca ara tain ta' oro ca wara tomi' pe mi' xuhu' ta napari'.

⁶ Je ca tama' hwara' opa urut pain ca howa nuxut ca'. Om ca hehe camain' urut. Taxi' ara xi' urut pain i ca' quem, pain ca e' e' wet urut pain macan' ca' quem. Om ca to ho' querec urut con Taramaxicon nexi'.

⁷ Ane om tara con ta'a camain' urut con pain ca e' nexi' ne. Om paxi' na ca querec urut con, ane howa urut con ne. Main mi' tarapari' pain oro ca tomi' pe mi' capari'.

⁸ Je ca tomi' xuhu' ca'. Hwara' opa urut pain ca howa xin ca mi' xim capari' xocori cwerexi' ca om pi' ra ha' ne ta. Hohot paxi' xira pain ca paca' urut pain cwerexi' pain macan' ca', ma' ta to ho' cara pin xun Taramaxicon nexi' ta urut.

⁹ Je ca win xumu e' urut con pain ca hohot xuxun na urut con ca'. Mo ta e' e' wet urut, mo ta cono' pin urut, win xumu e' urut con pain ca hohot xuxun na urut con quem.

¹⁰ Xi na e' ara ne pain ca main coco' quima hwet xun Cristo ta. Coco' quima hwet coco' quima hwet pi' pin xun, tomi' xo' ac capari' tara pain oro ca ara iri' pain ca e' e' wet nexi' ca'. Mi' mi' xam' ac capari' tara pain oro carawa ca taramaja mi' iri' ca'. Wari' co ara nain oro ca awi wa, mi' ac tocwa tara pain ca awi wa. Wari' co ara nain oro ca om awi wa ma' iri tara ne, mi' ac tocwa tara pain ca om awi wa quem.

Ca taxipa' pin xun Iri' Jam, taxipa' pin ac capari' na quem

¹¹ Je ca tomi' xuhu' ca'. Taxi' urut con Taramaxicon nexi' pain ca na e' ne pain ca in ac tocwa pain ca tomi' ha' tocwa ca'. Xi om ne ca tomi' querec xim capari' pain oro ca wara ara nexi'. Je ca tomi' mip urut cocon oro wari' cwa', pain ca howa jun Cristo taxipa' urut cocon ca'. Querec pin' naparut Iri' Jam, querec pin' naparut pain ca coromicat xo' nuxut pain ca howa xirara na urut cocon oro wari' cwa'. Param urut pahu' pain ca querec pin' maparut pain iri' xumuhu' ma' quem, querec pin' xiraraparut pain ca coromicat xo' nuxut na urut pahu'.

¹² Om ca tomi' xec xec urut pahu' pain ca warut co pijim' xo' nana cwa' urut pahu', om na. Tomi' hwet e' urut pahu' pain ca coromicat nuxut ca', ma' ta ha' cuhu' pain ca tomi' querec te maparut pain ca coromicat xo' nuxut ca'. Ma' ta tomi' in pin taxi' huhun oro wari' co xin to e' nana pain oro ca ara nucucun ma', co om coromicat xo' nana pain iri' ximicocon ma' quem.

¹³ Am coromicat mi' ca' cacaparut wari' ma', pain ca tamanain nana ta cacaparut ma'. Je i ma' ira, xi param ara urut con Iri' Jam pain ca in ac tocwa ta. Mo ta om tamanain hwe ta maparut, je i ma' ira, xi param ara urut pahu' pain ca quep xiho' xihwe quem.

¹⁴ Ac ca cuc cuc caparut na Cristo cwa', pain ca pijim' xixi' na urut ca', xi querec pin' ara urut con pain ca om noc tamana capari' ta. Taxi' urut con pain ca mi' pin caho' capari'. Xica' pe xat paxi' na, ane mi' pin caho' mi' pin caho' xam' capari' ne. Je ca ac ca cono' cono' pi' pin iri' ne quem.

¹⁵ Mi' pin caho' mi' pin caho' xam' napari', ma' ta om mam' ara e' hwein ca param pan nuhu' pain xocori ca e' nuhu' ma' napari'. Ma' ta ara e' hwein ca param pan nucun co ma' co mi' pin caho' nuhu' ma', co e' mami' ma' quem napari'.

¹⁶ Je ca coromicat jimama' pin urut ca'. Om ca noro mami' urut pain oro ca ara caca oro wari' pain xocori ca', om ca an xiho' urut cocon wari' co tocojin' e' nonon oro win ma' caca pain xocori ca', om na. Xi coromicat ac i ma' ara ne ca wari' wa ta. Coromicat mi' ac i ma' paxi' urut con Cristo pane, wari' tara ma' urut con pain cara pane, an xiho' tarapari' xi' ma urut con pain cara pane. Ane om coromicat mi' ac i ma' mami' urut con pain xocori ca' ne.

¹⁷ Je ca tomi' xuhu' ca'. Pain ca win cwere pin xun Cristo cwa', xocoricon wari' pin iri'. Om pin na wara cwerexi' ca xuruxut pan teretem pain cara pane. Ma' pin na xocori cwerexi' ca xuruxut xo' pin pain xocori ca' quem.

¹⁸ Wirico Iri' Jam co to' xocoricon wari' pin napari' cwa'. Wirico co taxipa' pin xijexi' ta napari', xi om ne ca mi' pin caho' ara capari' Cristo ta. Mi' naparut pain ca taramaja nuxut ca' quem, pain ca tomi' xo' jujun oro wari', ma' ta wari' ne toton, je pain ca taxipa' pin cacapa' ta naparut.

¹⁹ Je ca pijim' urut ca'. Wirico Iri' Jam pan co taxipa' pin xijexi' ta napari', xi om ca Cristo co mi' pin caho' napari' ta. Om ca mam' pe wet mami' cain ca caracat nexi'. Je ca pijim' je caparut quem. Ma' ta wari' ne pin toton oro wari' ta naparut.

²⁰ Je ca tomi' hwet jujun pain capija oro wari' ta caparut Cristo cwa'. Ac ca mam' tomi' caparut na Iri' Jam cwa', pain ca tomi' mip urut pahu' ca'. Ac ca tomi' mip pan cuhu' na Cristo pain ca tomi' urut pahu' ca'. Ha' jun Iri' Jam pain ca taxipa' xijexi' ta cuhu' ta.

²¹ Om paxi' na ca caracat ca Cristo pane, ane cut mi' pan con pain ca caracat nexi' Iri' Jam ne. Ac wari' co caracat pin ma ta non pari'. Ma' ta to' hohot pin xuhu' ta napari'. Win cwere iri jun Cristo ne, querec hohot ac xuhu' tara, ac ca om caracat camain' hwe tara con ta napari' quem.