2 Coríntios 4 - Tradução Bíblica Pacaas Novos

Ca quereme cacain oro ca to' i'ina wa pain ca taramaja mi' cocon Iri' Jam

¹ Wirico Iri' Jam co xiram pa' naparut pain ca mi' caparut pain ca taramaja mi' urut con ca'. Je ca om naro urut ca'.

² Pain ca taramaja mi' urut con ca', noc urut pain oro ca ara joc xim xine ca pan teretem wa ma', ca to' wixipa' ma'. Om ca pijim' mixein urut pain capijacon Iri' Jam, om ca tomi' ni ca' urut pain ca tomi' mao nein quem, om na. Pijim' iri'o' e' urut pain, ma' ta taraju pa' caca oro wari' ta urut. Querec pin' xut pain ca pijim' iri'o' nuxut ca' urut cocon. Taxi' naparut Iri' Jam pain ca taramaja ac i ma' urut quem.

³ Ma' paxi' nana oro wari' co om taraju pa' nanain capijacon Iri' Jam ca pijim' urut ca'. Co pan' ara'am xi' nana ma', wiricoco nana co om taraju pa' nanain.

⁴ Wirico Caxicon Jam co ac Iri' Jam nonon oro co om howa nonon Cristo ma', wirico co to' i'ina nonon pain ca coromicat xo' nucucun. Ac ca to' om pin cain na tococon pain ca om coromicat nucucun. Ma' ta om taraju pa' hwe ta nonon. Ma' ta om querec pin' hwein naran nein capijacon Iri' Jam ca an hwet pe nain ca toc meremem nucun Cristo pain ca hwara' opa tamana nucun ma' nonon. Wirico Cristo ara xi' na co an tan pan non Iri' Jam ma', iri' wirico na.

⁵ Om ca pijim' urut pahu', ma' ta tomi' ha' maparut ta urut pahu', om na. Pijim' urut pahu', ma' ta tomi' ha' hun Jeju Cristo co Taramaxicon ne iri' cwa' urut pahu'. Warut iri na ne, taramaja mi' e' urut pahu' pain ca pijim' urut pahu' ca', xi ma' ara caparut Jeju co tomi' ha' urut ta.

⁶ Xi toha mi' ara caparut pain iri' xumuxut Iri' Jam ta. Win ca pain ca xo' tomi' qui' cain ca jitacat nein xim pain ca toha pin ra ta qui' cain xec pain cara pane. Ac i ma' naparut quem, ac ca toha mi' caparut na pain ca toc meremem nucun pain xumuxut pain ca coromicat nuxut. Ma' ta querec pin' hwein ca hwara' opa ne ca toc meremem pe nain tocon Cristo ta naparut.

⁷ Je ca tomi' xuhu' ca'. Querec pin' paxi' urut pain ca hwara' opa nucun Iri' Jam cwa', ane om hwara' opa pan urut ne. Ac tapaxi' e' urut. Ac ca an ho' pe mi' caparut na pain carawa ca awi tamana ca', pain ca mi' caparut pain ca querec pin' urut con pain ca hwara' opa nucun. Ma' ta querec pin' xihwe pain ca om maqui' pan cuhu' ca hwara' opa tamana ne ta naparut. Ma' ta querec pin' cacapa' oro wari' pain ca maqui' pan capa' ca hwara' opa tamana ne pain ca taramaja mi' mahu' ta naparut quem.

⁸ Jain jain paxi' urut pain oro ca to' i'ina naparut ca', ane om to' quiji' pin caparut ne. I'ina paxi' na xumuxut pain ca cain' cain' xixi' ne urut ca', ane om naro urut ne.

⁹ Ma' paxi' nana oro wari' co quep em' nanaparut, ane om ximin urut ne. To' quiji' paxi' nanaparut, ane om to' parapa' pin cacaparut ne.

¹⁰ Tama' jain jain urut pain ca to' parapa' pin xim cacaparut oro wari' co noc nanaparut ma'. Win ca Jeju pain ca jain jain ca pain ca to' pa' pin tocwa pane, ac i ma' na ca tama' jain jain urut quem. Ma' ta querec pin' tocwa Jeju pain ca e' pe ho' caparut pain curuxut ta.

¹¹ Je ca tomi' xuhu' ca'. E' paxi' urut, ane tama' jain jain urut pain ca to' parapa' pin xim cacaparut ne. Xi om ne ca taramaja mi' ara urut con Jeju cwa'. Ma' ta querec pin' tocwa pain ca e' pe ho' caparut pain curuxut pain ca aram aram cono' xi' urut ta.

¹² Je ca cono' xi' paxi' urut pain ca to' i'ina cacaparut oro wari' pain ca taramaja mi' xun Iri' Jam pahu' ta. Je i ma' ira urut, xi om ne ca e' cara pan ara hwe ta urut pahu' pain ca pijim' mi' xuhu' pain.

¹³ Ma' na ca xirao' pe xine pain capijacon Iri' Jam: Howa inon Iri' Jam, je ca tomi' ta' ca', ac i ma' na ca xirao' pe nein. Ac i ma' urut quem, howa ac i ma' urut con Iri' Jam, je ca tomi' urut quem.

¹⁴ Xi taxi' ara urut con Iri' Jam pain ca to' e' mami' con Taramaxicon nexi' Jeju pane. To' e' mami' taraparut quem, xi om ne ca win cwere ara urut con Jeju ta. Cut mama' ac caparut tara. Warut, wahu' tara quem, cut mama' ac capari' tara, to ho' xine pain ca pe pan ta' ca' ac capari' tara quem.

¹⁵ Quereme urut pain oro ca jain jain wa pain ca pijim' urut pain capijacon Iri' Jam cwa'. Ma' ta quep xiho' xim urut pahu', ma' ta querec pin' tocwa Iri' Jam pain ca awi tamana nucun urut quem. Mija mija tiquin' iri tatara oro wari' co howa pin nonon ne, pain ca xiram pa' e' tococwa pain ca to' witan pin xun tococwa ma', tomi' querec te tamana ac cocon tara, an hwet pe ac cacain tara ca awi tamana nucun quem.

¹⁶ Je ca om naro urut ca'. Om paxi' na ca hwara' opa mami' ne curuxut ca', ane to' hwara' opa pan caparut pain xumuxut Iri' Jam ne. To' hwara' opa to' hwara' opa tiquin' naparut pain oro xijein xec quem.

¹⁷ Jain jain paxi' urut, ane to' hwara' opa caparut oro ca jain jain nuxut ne, xi winim' ara urut pain ca awi tamana wa ca mi' xim caparut Iri' Jam ta. Awi tamana tara, om ta pi' ra ha' ne quem. Awi tiquin' ca' tarain oro ca jain jain wijimain nuxut pain macan' ca'.

¹⁸ Je ca tomi' xuhu' ca'. Om ca win xumu urut pain oro ca querec urut ca'. Win xumu e' urut pain oro ca om querec urut. Xi pi' pin hap ne oro ca querec urut ta. Oro ca om querec urut ca' iri na ne, to wet cara na ta.