2 Coríntios 3 - Tradução Bíblica Pacaas Novos

¹ Tomi' querec xim urut pahu' pain i ca' quem: Cain' ca coromicat mi' maparut pain ca pijim' xo' urut ta urut pahu' quem? Tomi' xec xec mami' nanapari' xi' ma maparut ra, ac i ma' na ca coromicat mi' maparut ra? Cain' cain' xira quem? Na e' na pain ca an hwet pe mi' urut pahu' pain ca xirao' nucucun oro win ma' nuxut ca to' querec pin' nuhu' pain ca pijim' xo' nuxut ra? Na e' na pain ca an hwet pe mi' urut cocon pain ca xirao' nuhu' ca to' querec pin' nonon oro xucucun wari' pain ca pijim' xo' nuxut ra? Win caca oro xucucun co pijim' mama' nanain oro xijein macan' ma', ac i ma' na ca coromicat mi' maparut ra? Om na ta!

² Xi wahu' pan ara ne co to' querec pin' nonon oro wari' pain ca pijim' xo' nuxut ta. Ac ca xirao' to xihwe na pain xumuxut ca' quem. Querec iri nunuhu' oro wari' ne, querec pin' ac cucuhu' na pain ca xuruxut xo' nuhu' ma', querec pin' ac cacaparut na pain ca pijim' xo' nuxut ca' quem.

³ Howa pin iri hwein capijacon Iri' Jam ca pijim' hwet urut pahu' pane ne, ac ca xirao' nucun Cristo hwe na pain ca howa pin hwein capijacon Iri' Jam ca pijim' hwet urut pahu' pane. Wirico pan co xirao' nain pahu', ac je na. Ane om mam' xirao' cain pain iri' ca mam' xirao' wa ne, om na. Mam' xirao' nain pain Tamataracon ca e' cara ma'. Om ca xirao' pe ca pain pacun quem. Xirao' pe na pain iri' xumuhu' ma' ta.

⁴ Coromicat mi' ac i ma' urut pahu', xi om ne ca taxi' ara urut con Iri' Jam pain ca querec hohot caparut pain ca pijim' urut pain capijacon. Wirico Cristo co to' taxi' naparut con.

⁵ Warut pain ca apóstolo urut ca', om ca meo taxi' urut pain ximicon wari'. Ca taramaja nuxut ca', om ca maqui' pan nein ca coromicat nuxut. Wirico pan na Iri' Jam co mi' naparut pain.

⁶ Wirico co mi' naparut pain ca taramaja mi' taxi' urut con ca', pain ca pijim' hwet taxi' urut pain xocori ca tomi' an pe xo' nucun. Xocori ca tomi' an pe xo' nucun ca', om ca maqui' nein ca xirao' nucun Moisés cara pane, om na. Maqui' nain Tamataracon Iri' Jam. Mo xi win xumu e' xin ca xirao' nucun Moisés ma', mama' ac xin xira cote ne xe, xi tomi' ha' taxi' iri' ta. Ane to' e' capari' Tamataracon Iri' Jam ne.

Ca hwara' opa tamana pan ne xocori ca tomi' an pe xo' nucun Iri' Jam

⁷ Tomi' xin ca wara tomi' xo' nucun Iri' Jam pane, ca xirao' pe xine pain pacun pane. Om ca to' witan ac tococwa oro wari' co tomi' ha' xin paxi' nanain ma', xi tomi' ha' taxi' cacain ta. To' cono' pin tata. Ac i ma' paxi' na cocon, ane awi pan ne ca wara tomi' xo' nucun pane ne. Hwara' opa na quem. Tomi' xo' mi' iri non pain Moisés Iri' Jam pane ne, toc meremem pan ac ca na pain ca hwara' opa nucun. Toha mi' non Moisés, toc meremem pan ac ne na tocon quem. Om paxi' na ca toc meremem cara ne con Iri' Jam pane. Ane om ha' cocon ca noro cacain tocon oro wari' nein Israel quem ne.

⁸ Je ca tomi' xuhu' ca', pain xocori ca tomi' xo' nucun Iri' Jam ma', pain ca taramaja pe ho' pin cain ximixi' Tamataracon ca'. Om ca hwara' opa tiquin' ca' nein ca wara tomi' xo' nucun ra? Hwara' opa tiquin' ca' nein ma' ira!

⁹ Hwara' opa paxi' na ca wara tomi' xo' nucun Iri' Jam ca tomi' em' nonon co om tomi' ha' nanain ma'. Awi paxi' na. Ane hwara' opa tamana pan ne xocori ca tomi' xo' nucun ca to' hohot pin napari' ca' ne.

¹⁰ Hwara' opa paxi' na ca wara tomi' xo' nucun Iri' Jam pane, ane tiquin' mao ne ca hwara' opa nein xocori ca tomi' xo' nucun ne. Ac ca om hwara' opa mami' ne na ca wara tomi' xo' nucun ca'.

¹¹ Je ca tomi' xuhu' ca'. Hwara' opa paxi' na ca wara tomi' xo' nucun Iri' Jam pane, aram aram om pin ac ne na ca hwara' opa nein. Ane hwara' opa tiquin' mao ne xocori ca tomi' xo' nucun ne. Om ta pi' ra ha' ne quem.

¹² Je ca tomi' xuhu' ca'. Taxi' urut pain ca om pi' ra ha' ne xocori ca tomi' xo' nucun Iri' Jam pain ca to' witan pin xim capari' ca'. Je ca om pijim' jin' urut pain. Om ca joc xim urut pain, pijim' hwara' opa urut pain.

¹³ Om ca an xiho' urut con Moisés cara pane, pain ca mam' tatep pa' cain tocon con wom pane. Ma' ta om querec cacain ca toc meremem toc meremem om pin ne tucu ca' na ca coromicat nucun cocon oro wari' nein Israel pane.

¹⁴ Ane ari caca ne. Om ca taraju pa' je ha' caca. Ac i ma' ac i ma' wet nana pain xocori ca' quem. Noro iri nanain capijacon Iri' Jam ca wara tomi' an pe xo' mi' tococwa ne, om ca taraju pa' cacain. Ac ca tatep pa' xine na ca coromicat nucucun. Xi taraju pa' xica' to ara caca co win cwere pin nonon Cristo ta.

¹⁵ Ac i ma' ac i ma' wet ara xi' nana pain xocori ca' quem. Noro iri nanain ca xirao' nucun Moisés ne, om om wet na ca taraju pa' caca ma'. Xi howa cocon Taramaxicon nexi' ta.

¹⁶ Je ca tomi' xuhu' ca'. Wari' co howa pin non Taramaxicon nexi' ma', taraju pa' pin ac ca na quem.

¹⁷ Je ca tomi' xuhu' ca'. Taramaxicon nexi' cwa', wirico co Tamataracon Iri' Jam ma'. Pe ho' iri napari' Tamataracon Taramaxicon nexi' cwa' ne, ha' ac capari' na pain ca witan ca' xin ca xirao' nucun Moisés.

¹⁸ Taraju pa' taraju pa' pi' pin irin xocori ca tomi' xo' nucun Iri' Jam quem. Ac ca hot ca' capari' na con wom co tatep pa' nain tocoxi' Taramaxicon nexi' cwa', ac ca toha pan iri' na pain ca toha mi' capari' pain ca awi tamana nucun quem. Je ca ha' capari' pain ca taraju pa' wa. Ca to' jimama' ac capari' na, ca to' jimama' ac capari' na, aram aram an xiho' pin ac xun tara quem. Wirico Taramaxicon nexi' ma', co iri' Tamataracon Iri' Jam ma', wirico co ara mi' napari' pain.