2 Coríntios 2 - Tradução Bíblica Pacaas Novos

¹ Je ca an pe xo' ac i ca' tain ca coromicat ne pahu' pane. Om ta in hwet toton pain xocori ca', ma' ta om ja' tomi' xaxa' mami' toton ta inuhu'.

² Mo xi ja' tomi' xaxa' pan xuhu', ma' xira wari' co ja' tomi' querec te pin napa' quem? Ha' xuruhu' pain ca ja' tomi' querec te pin mahu' quem? Xi wata' pan ara ne co ja' tomi' xaxa' nuhu' ta, ac i ma' na ca coromicat ne pahu' pane.

³ Je ca xirao' mi' e' xuhu' pane. Ca' na ca coromicat ne pane: Mo ta in hwet ho' toton, am ja' tomi' xaxa' cacapa' ma', ac i ma' na ca tomi' xuhu'. Ja' tomi' querec te xirarapa' na inonon ta ac xuhu' na quem. Taxi' inuhu' quem, mo ta tomi' querec te xuhu' pain ca aram aram in hwet xuhu' ma', tomi' querec te ac hwe tara quem.

⁴ Tomi' xaxa' tamana ina pain ca xirao' mi' xuhu' pane. Mija na ca toron capa' xumu, aca tamana ina pahu'. Om paxi' na ca ja' tomi' xaxa' xim xuhu' pain ca xirao' ne pane ira. Param e' inuhu' pain ca querec pin' mahu' pain ca om noc camain' xuhu' ta.

Ca mana' mana' om pin jun pain ca caracat nucun co tomi' taparam' nuhu' ta tococwa

⁵ Win ma' nuhu' co caracat ma' iri na ne, om ca ja' tomi' xaxa' e' capa', om na. Ja' tomi' xaxa' ja' tomi' xaxa' pi' pin nuhu' quem. Ac je paxi' na, ac ca ja' tomi' xaxa' ja' tomi' xaxa' pi' pin cuhu' na.

⁶ Xam' paxi' hwe pain ca tomi' mi' hun pain ca wap wa pane, pain ca xin hwet pin hun pane. Awi na, an hwet mi' ho' jun pain ca om noc hun ma'.

⁷ Je ca tomi' xuhu' ca'. Na e' na pain ca mana' mana' om pin hun pain ca caracat nucun pain xocori ca'. To' hwara' opa pin jun pain ximicon. Ma' ta om naro pin ca pain ca tomi' xaxa' tamana nucun. Ma' ta om tomi' xaxa' tomi' xaxa' an pe pin ton Iri' Jam ta ca ma' quem.

⁸ Je ca tomi' mip xuhu' ca'. Tomi' xo' jun, an hwet pe mi' jun pain ca om noc hun ma'.

⁹ Je ca xirao' mi' xuhu' pain cara pane, pain ca xo' hu qui' xuhu' con pane. Ma' ta querec pin' xuhu' ta inuhu'. Am tomi' ha' hwein oro ca hu qui' xuhu' pane inuhu' ira.

¹⁰ Je ca tomi' xuhu' ca'. Mana' mana' om pin iri hun pain ca caracat nucun win ma' nuhu' ma' ne, mana' mana' om pin ac ton na quem. Ara cup iri napa' ne, mana' mana' om pin ac ton na pain carawa ca ara mi' capa' quem. Tomi' iri'o' ina, taxi' napa' Cristo, mana' mana' om pin inon pain, xi param ara xuhu' pain ca tomi' querec te caracan xujuhu' ta inuhu'.

¹¹ Je ca na e' ne pain ca mana' mana' om pin xun pain ca caracat nucun ma', ma' ta om mixein capari' Satanás. Querec pin' ara xi' urun pain oro ca param ximao nucun pari'.

Ca toron ne ximicon Paulo pain ca winim' pe con Tito pain Trôade

¹² Wa' mao iri inain macarain Trôade ne, pijim' tain capijacon Iri' Jam con Cristo ta ac ta' na. Wara meo nain ximicocon oro wari' Taramaxicon nexi' quem. Param tamana nanain ca taraju wa capijacon Iri' Jam.

¹³ Param paxi' nanain ca taraju wa, ane toron capa' xumu con coxari' Tito ne. Xi mam' ton pain i cain ta. Je ca mao ta' ina ta toton pane, maqui' ac tain na macarain Macedônia ca'.

¹⁴ Ane tomi' querec te ton Iri' Jam ne. Ac ca tama' o mama' caparut na pain ca ja' ja' urut con ca', pain ca win cwere urut con Cristo cwa'. Wirico co mi' naparut pain ca an hwet pe urut pain ca hwara' opa nucun ma', pain ca pijim' hwet urut cocon oro wari' con Cristo cwa'. Ac ca hu xain ne na ca pijim' nuxut quem, hu xain hu xain pi' pin tata oro wari' pain ca to' querec pin' tococwa con Cristo.

¹⁵ Xi an xiho' ara urut pain caji towaxi' ca hu xain tamana con Cristo ta, ac i ma' na ca coromicat mi' capari' Iri' Jam. Pijim' iri irin capijacon con Cristo ma' ne, ac ca nac cacain na oro wari'. Nac nanain co witan pin nana, nac nanain co pan' ara'am xi' nana quem.

¹⁶ Nac iri nanain ca pijim' nuxut oro co pan' ara'am xi' nana ne, ac ca cunu ne na ca pijim' nuxut cocon, ac ca to' parapa' pin urut cocon na quem. Ane om ac i ma' ne cocon co witan xi' nana ma' quem. Ac ca hu xain urut cocon na, ac ca to' e' urut cocon na quem. Wa ina me. I'ina tamana na ca taramaja nuxut pain ca pijim' urut pain capijacon Iri' Jam con Cristo ta. Ma' na ca ara ac urut pain ca taramaja nuxut ra?

¹⁷ Ane om an xiho' urut cocon oro co om pijim' xo' nana ma' ne. Mija ara xi' nana co pijim' pan teretem nana ma', ac ca vender xin cacain na capijacon Iri' Jam pain ca caramaju xixi' na caca ma'. Om ca an xiho' urut cocon quem. Xi pijim' jein capija ta ara caparut Iri' Jam ta. Taxi' naparut pain ca pijim' xo' nuxut quem. Wirico Cristo co mi' naparut pain ca pijim' nuxut ta.