2 Coríntios 13 - Tradução Bíblica Pacaas Novos

Ca hu mam' tococwa oro co to nanain Corinto

¹ Hwet xim inuhu', je win 3 pin ta' ne ca hwet xim xuhu' ca'. Je i ca' ca xirao' pe xine pain capijacon Iri' Jam: Mo ta coromicat mi' tocwa pain ca caracat wa wari' ma', mo ta caracat na co ma' ta tocwa ma'. Na e' na pain ca tocwan caca co querec urut con pain ca caracat nucun ta nana ma'. Am ma' 2 caca, am ma' 3 caca, taxi' urut con pain ca caracat ca ma' tatara.

² Wara hu inuhu' pain ca pe ho' qui' xuhu' pain cara pane, pain ca ma' 2 pin ne ca hwet qui' xuhu' pane. Pe ni ca' paxi' inuhu' pain xocori ca', ane xirao' mi' ho' toton oro co wara caracat nana pahu' pane ne, xirao' mi' inonon oro xucucun co caracat nana ma' quem: In hwet iri xuhu' ne, om ta xiram pa' toton ta.

³ Tomi' mip ca' ara xi' mahu': To' querec pin' xut pain ca tomi' wi quem Cristo pain oro ca tomi' nem ta mahu'. Je i ma' ira, querec pin' pan jun pata' ta, xi hehe xim cuhu' pain ca pan to' cain tarajuhu' pata'. An hwet mi' ac cuhu' tara pain ca hwara' opa nucun quem.

⁴ Iri'o' paxi' na ca om an hwet pe cain ca hwara' opa nucun Cristo pain ca tatatain mi' qui' tocwa pain pana pane, ane mam' e' mami' ca pain ca hwara' opa pan nucun Iri' Jam ne. Ac i ma' urut quem. Om paxi' na ca hwara' opa pan urut pain ca win cwere urut con Cristo cwa', ane mam' e' wi urut con pain ca hwara' opa nucun Iri' Jam ne. Mi' ac caparut tara pain ca hwara' opa nucun pain ca quep xiho' xim urut pahu' quem.

⁵ Noro pan jein xumuhu' ta. Am howa iri'o' hun Jeju, querec pin' pan ac xujuhu' tara. Am xuruxut xo' hwe, am tomi' ha' hun. Om ca querec pin' hun Cristo Jeju pain ca pe ho' cuhu' pain xumuhu' ra? Tara pahu', am om howa iri'o' hun, am om hohot hun quem.

⁶ Param urut pahu' pain ca querec pin' maparut pain ca hohot urut con quem.

⁷ Je ca tomi' mi' urut pahu' con Iri' Jam quem. Mi' roron pain ca om pan teretem camain' caca ta urut con pahu'. Om paxi' na ca param urut cocon oro wari' pain ca querec pin' cacaparut pain ca hohot urut con Iri' Jam pain ca taramaja nuxut ca', om na. Param e' urut pahu' pain ca xuruxut xo' hwe ma'. Hohot paxi' naparut pain ca tomi' ximama' cacaparut oro wari' pain ca om ca taramaja xo' hwe ta cacaparut pahu'. Je i ma' ira urut ta.

⁸ Xi ha' caparut pain ca ari urut pain capijacon Iri' Jam ca iri'o' ta. Ha' e' na pain ca pijim' hwet xo' urut pahu' pain ta.

⁹ Je ca tomi' xuhu' ca'. Om paxi' tara ca hwara' opa pan urut. Je i ma' ira, tomi' querec te cara urut pain ca xuruxut xo' pan nuhu' ma'. Je ca tomi' mi' urut pahu' con Iri' Jam quem. Mi' roron pain ca horon horon tiquin' wa pain ca xuruxut xo' nucucun ta urut con pahu'.

¹⁰ Je ca xirao' mi' xuhu' pain ca pe ni ca' xuhu' ca'. Ma' ta wara xuruxut xo' hwe pain ca aram aram hwet xim xuhu' ca'. Ma' ta om na e' ne pain ca an hwet mi' xuhu' pain ca hwara' opa ne pain ca pan to' tain tarajuhu' ta inuhu'. Wirico Taramaxicon nexi' ara xi' na co mi' napa' pain ca hwara' opa ne ca'. Ma' ta quep xiho' momon, ma' ta om quep em' momon ta napa' pahu'.

Ca pi' pin ne ca xirao' nucucun

¹¹ Je i ca' ca xirao' ne ca' xere. Tomi' querec te je me. Win xumu jein ca xuruxut xo' hwe. Tomi' ha' xine pain ca hu xuhu' ca'. Ac je ac je ari tara ca coromicat nuhu'. Tomi' querec te xujuhu' pain ca to ho' xujuhu' ma' quem. Pe ho' ac cuhu' tara Iri' Jam. Wirico co mi' napari' pain ca om noc xijexi' ca', wirico co mi' napari' pain ca om toron ne ximixi' ca' quem.

¹² An hwet mi' xujuhu' pain ca tomi' querec te xujuhu' ma'. Tomi' tomi' xam' nunuhu' oro wari' nucun Iri' Jam cwa', pain ca mam' pe wet urut pahu' ta cucuhu' ca'.

¹³ Param inon Taramaxicon nexi' Jeju Cristo pain ca xiram pa' cuhu' ma', pain ca mi' e' cuhu' pain ca param nucun. Param inon Iri' Jam pain ca to' querec pin' cuhu' pain ca om noc camain' cuhu' ma'. Param inain Tamataracon pain ca mi' cuhu' pain ca jao jao ma' xujuhu' pain ca to ho' cuhu' ma' quem. Je ca param mi' param mi' xam' xuhu' ma'. Je i ca' ca xirao' ne ca'.