2 Coríntios 12 - Tradução Bíblica Pacaas Novos

Ca tohwein' nucun Paulo, je carawa ca to' caxi non quem

¹ Na e' na pain ca tomi' cara xuhu' pain ca ac ca tomi' xec xec xuhu' ne pain carawa ca ara napa' pane. Om paxi' na ca quep xiho' pan xuhu' pain, ane tomi' hwet xim xuhu' con wari' co tohwein' pane ne. Wirico Taramaxicon nexi' co ara mi' non pain, an hwet mi' ac con na pain carawa ca querec pin' ra con pane. Ac ca tohwein' ca na pain ca tomi' tocwa pane.

² Wari' co tomi' xim xuhu' cwa', querec pin' inon. Win cwere non Cristo. Ma' 14 pin na cawaxi' pain ca an mao tocwa pain iri' pawin ca pe pan ca Iri' Jam. Tara, am an mao iri'o' tocwa pain iri' curucun, am an mao e' tocwa pain tamataracon, om ca taxi' ta'. Taxi' pan na Iri' Jam.

^3-4 Taxi' pan inon pain ca an mao tocwa pain iri' pawin cain. Am an mao iri'o' tocwa pain iri' curucun, am an mao e' tocwa pain tamataracon, om ca taxi' ta'. Taxi' pan na Iri' Jam. Taraju ac cain na ca tomi' wa. Nain ho' ta pain ca tomi' hwet wa pain ca taraju ca ma', om om na wari' co tomi' hwet wawa pain.

⁵ Hohot paxi' na pain ca tomi' hwet xuhu' pain ca an mao tocwa pain iri' pawin pane, ane om hohot ne pain ca tomi' xec xec ta' pain ca tomi' hwet pan xije pahu'. Tomi' hwet e' xuhu' pain ca om hwara' opa ne ca'.

⁶ Mo xi tomi' xec xec ta' pain ca tomi' hwet xuhu' pain carawa ca ara napa' pane, om xi coromicat pan tem ma ta ac cacapa' oro wari', xi tomi' iri'o' ara ta' ta. Ane om tomi' hwet xuhu' pain ne. Noc inuhu' pain ca awi ma awi ma ximama' mahu', param e' inuhu' pain ca querec pin' hwein ca taramaja ne ca', je pain ca pijim' xuhu' pain capijacon Iri' Jam ta.

⁷ Awi tamana na oro ca an hwet mi' capa' Iri' Jam pane. Je ca mi' capa' pain ca caxi wa ca'. Ma' ta om tomi' xec xec ma pain napa'. Jain jain ina pain ca caxi ne, ac jam co taramaja mi' non Caxicon Jam na pain ca to' jain jain capa'. Ac ca mam' xucun' capa' na pain pi pain cwere ca'.

⁸ Tomi' paxi' inon Taramaxicon nexi' pain ca an ca' ne pain ca caxi ne quem ton ca'. Ma' 3 na ca tomi' mip ton ca'.

⁹ Ane tomi' ca' capa' ne: Om na, hohot nem pain ca quep xiho' pan xim ca' napa'. Xi querec pin' pan ara xine ca hwara' opa ne pain ca quep xiho' ton wari' co om hwara' opa ta, ac i ma' na ca tomi' capa'. Je ca tomi' querec te ta' ca'. Tomi' xec xec ta' paxi' inain ca om hwara' opa ne ca', xi hwara' opa pe ho' ara capa' Cristo ta.

¹⁰ Je ca tomi' querec te ta' pain ca om hwara' opa ne ca'. Tomi' querec te ina pain ca tomi' xirac cacapa' ca', je pain ca ximin ta' pain ca om capa' carawa ca', je pain ca quep em' cacapa' ca', je pain ca jain jain ta' pain oro ca to' i'ina napa' ca' quem. Ximin ac i ma' paxi' ina pain ca taramaja mi' ton Cristo cwa', ane tomi' querec te ta' ne. Om iri na ca hwara' opa pan ta' ne, je win hwara' opa ta' ta.

Ca toron ne ximicon Paulo cocon oro co howa to nanain Corinto

¹¹ Ac ca om coromicat xo' ta' paxi' a xira pain ca tomi' xec xec ne ca', ane wahu' pan co cuc cuc nanapa' pain ne. Wahu' pan xirara co taramaja xo' ma ta nanapa' ma'. Om paxi' na ca taxi' pan ta' ca', ane om taxi' tiquin' ca' cacapa' oro co iri' apóstolo urut xi' ma nana pahu' ne. Om ca taxi' tiquin' camain' ca' cacapa' ta.

¹² Pe ho' iri inuhu' pane ne, an hwet mi' ac xuhu' na pain oro ca to' querec pin' mahu' pain ca iri' apóstolo ne ca'. To' i'ina paxi' napa' oro carawa jimao pane, ane quereme tain ne. An hwet mi' ac xuhu' na pain ca hwara' opa nucun Iri' Jam quem, pain ca ara tain ca om ara taxi' ne ca wari' wa, wa wa ac hwein na quem.

¹³ Cain' ca coromicat mi' mahu' quem? Quep xiho' inuhu' pane, quep xiho' ac toton na oro xucucun co cut in xucucun pain ca howa cocon Jeju quem. Ac wiricoco pi' pin mahu' pain ca quep xiho' xuhu' pane, jimama' e' pan hwe pain ca om mi' xine pain dinheiro ta xuhu' pane. Am mana' mahu' pain, am caracat ma mahu' pain ca om xiram pa' xine xuhu' pane ra? Tara pahu', mo ta coromicat mi' ac i ma' mahu' ma', mana' mana' om pin xine pain ca caracat ne me.

¹⁴ Je ca tomi' xuhu' ca'. Je win 3 pin ta' ne ca hwet xim xuhu' pain xocori ca', wara awori ina quem. Om ta mi' xine xuhu' pain caramajuhu' quem, xi param tain ta. Param e' inuhu' pain ca tomi' querec te pan mahu'. Xi na ne pain ca cut mi' cocon pain carawa mana cote caca oro hwijima' ta. Wiricoco pan xirara mana cote caca co cut mi' nonon pain carawa mana panxicaca ta.

¹⁵ Je ca tomi' xuhu' ca'. Tomi' querec te ina pain ca quep xiho' e' xuhu' ca'. Mi' mi' pi' pin xuxuhu' pain oro caramaju na inuhu', tomi' querec te ina pain ca mi' pan xije pain cwere pahu', pain ca quep xiho' xim xuhu' ca' quem, xi noc camain' xuhu' ta. Cain' cain' xihwe quem? Ac ca tomi' querec te wijimain e' mahu' a xira ta.

¹⁶ Je i ma' ira, taxi' paxi' mahu' pain ca om winim' e' xuhu' pain caramajuhu' pane. Ane ma' ma' wet caca oro win ma' nuhu' co mixein na xi' ma nanapa' pahu' ne. Cut noc xa nain dinheiro nexi' pane, mixein taxipa' na ta nanapa'.

¹⁷ Cain' cain' xihwe quem? Ma' na ca mixein ac xuhu' pane ra? Ma' na ca param ac tain caramajuhu' ca cut caca xerexi' co hwet nunuhu' pane pata' ra?

¹⁸ Mam' iri inuhu' con Tito cwa' pane ne, pain ca ja' ja' ron ton coxari' co win howa iri' cwa' quem, hwet ac cucuhu' na. Cain' cain' ca Tito quem? Mixein nuhu' ra? Ma' na ca param ac cain caramajuhu' ra? Om na ta. Xi ac wirico ac wirico ara urut pain ca coromicat xo' nuxut, je pain ca xuruxut xo' nuxut ta.

¹⁹ Am coromicat mi' ca' maparut: Tomi' narain ho' taxipa' e' xucucun pain ca xirao' nucucun ta, am ac i ma' ne ca coromicat mi' maparut ma'. Om na ta, ta coromicat mi' ac i ma' maparut me. Taxi' naparut Iri' Jam pain ca tomi' iri'o' urut ca', xi om ne ca mi' pan ara caparut pain ca tomi' iri'o' nuxut Cristo ta. Je ca tomi' xuhu' pain ca tomi' querec te xuhu' ca' xere. To' hwara' opa e' xim urut pahu'. Je ca taramaja mi' urut pahu' pain oro ca ara nuxut ta.

²⁰ Toron napa' xumu pahu'. Mo ta aram aram hwet pa' xuhu', am om hohot mahu' pain oro ca ara nuhu' ma', am om hohot pan xuhu' pain oro ca ara ne quem. Tara pahu'. Am tomi' mana' caracan xujuhu'. Am noc mi' xujuhu' pain oro ca ara hwe ma'. Am hwerehwet ne mixitahu' pain ca mana' xujuhu'. Am joc in pin xujuhu' pain ca ara e' hwein ca param pan nuhu' ma'. Am tomi' xina hwein waracocon oro win ma' hwe ma'. Am tomi' xec xec hwe pain ca xin to hwe ma'. Am ja' teretem xujuhu' ma' quem.

²¹ Toron napa' xumu pahu'. Mo ta aram aram in hwet xuhu', am to' wixipa' capa' Iri' Jam pahu'. Am tomi' xaxa' ta', am aca ta' cocon oro win ma' nuhu' co caracat nana pane, co om cwirin' querec nanain oro ca quep ximama' nucucun, je pain ca tamanain to nucucun pain ca win xumu cacain oro ca om awi wa ma' quem.