2 Coríntios 11 - Tradução Bíblica Pacaas Novos

Ca toron ne ximicon Paulo cocon oro co howa to nanain Corinto

¹ Momon taraju wet ximahu' na inuhu' pain ca tomi' ho' xim xuhu' ca', pain ca ac ca om coromicat xo' ta' ne ca'. Momon taraju wet xine me.

² Xi jain jain ara xuhu' pain ca querec wet xo' xuhu' ta. Wirico Iri' Jam co mi' napa' pain, jain jain pan nuhu' pain ca querec wet xo' xim cuhu' quem. Querec querec ac xojam' co om quep xirac cwa' mahu', wara tomi' an pe mi' inuhu' con Cristo, co ac iri' tarama' nuhu' ma' quem. Xica' pe tara Cristo co tarama' ne hwe ta inuhu' quem.

³ Je ca toron capa' xumu pahu'. Am mixein xim cucuhu' oro co pijim' ximama' nunuhu' ma', am to' em' xin cacain ca coromicat nuhu', am param param om pin hun Cristo, am win xumu win xumu om pin hun quem. Win cama Eva cara pane, pain ca ha' con em' pain ca tomi' mixein cam pane. Noc inuhu' pain ca an xiho' hwem ta.

⁴ Toron napa' xumu pahu', xi i'ina taraju wet huhun oro co pijim' ni ca' nanain ca pijim' nuxut pain ca pijim' hwet urut pahu' con Jeju pane. Xin ne huhun pain ca pijim' ni ca' cacain Tamataracon Iri' Jam ca howa hwe pane, xin ne huhun pain ca pijim' ni ca' cacain capijacon Iri' Jam ca wara howa hwe con Jeju pane quem.

⁵ Cain' cain' xirara quem? Taxi' tiquin' ca' nanapa' ra? Om ca taxi' tiquin' ca' cacapa' ta, ac i ma' na ca coromicat ne ca'.

⁶ Am i'ina ta' pain ca tomi' ta' ca', pain ca pijim' tain capijacon Iri' Jam ca'. Ane taxi' tain ne. Taraju pa' inain quem. Wara querec pin' ara xi' maparut pain oro ca taraju pa' nuxut ca', je pain oro ca ara nuxut pain oro xijein xec pane.

⁷ Pijim' hwet mi' iri inuhu' pain capijacon Iri' Jam con Jeju pane ne, ac wari' co taramaja mi' non xucun wari' pan ina pain ca taramaja mi' e' xuhu' pane. Ma' ta to' witan pin xihwe ta inuhu'. Cain' ca coromicat mi' mahu' pain quem? Caracat ina pain ca om mi' xine pain dinheiro ta xuhu' pain ca taramaja mi' e' xuhu' ra? Om na ta!

⁸ Ane xiram pa' pan cacapa' oro xucucun co cut in xucucun pain ca howa cocon Jeju pain oro wirain cidade ne, mi' ac cacapa' na pain dinheiro. Ac ca an noc xa toton a xira ta, ma' ta ha' capa' pain ca quep xiho' xuhu' ca'.

⁹ Pe ho' iri inuhu' pane ne, maqui' pa' ac capa' na xec pain ca ximin ta' pain ca om capa' carawa pane. Ane om to' i'ina xuhu' pain ca mi' xine pain dinheiro xuhu' pane ne. Xi xiram pa' ara cacapa' oro xerexi' co maqui' nanain Macedônia ta, mi' ac cacapa' na pain oro carawa ca om napa' pain ca ximin ne pane. Om ca mi' xine pain dinheiro camain' xuhu' pane, om ta mi' xine pain xuhu' pain oro xec ca maqui' ta' ma' quem.

¹⁰ Iri'o' na ca tomi' ta' ca', win ne ca pe ho' capa' ca iri'o' nucun Cristo. Hwet iri toton oro wari' co to nanain oro macarain Acaia ma', om ta mi' xine pain dinheiro pain ca pijim' hwet mi' xuhu' pain capijacon Iri' Jam ta toton. Om ta narain ho' ac cacapa' pain ca miri'om ac i ma' tain dinheiro nucun ta.

¹¹ Para om mi' xine pain dinheiro nuhu' xuhu' quem? Noc pan inuhu' ra? Om na ta. Taxi' napa' Iri' Jam pain ca om noc xuhu' ca'.

¹² Je ca tomi' xuhu' ca', om ta mi' xine pain dinheiro camain' xuhu' pain ca taramaja mi' xuhu' ta. Wara taramaja ac i ma' ina, mao ac ne ma' tara pata'. Ma' ta om ha' cocon oro co tomi' xec xec nana pain ca taramaja an xiho' urut con Paulo cocon oro win ma' ca cwa' ta caca ma'.

¹³ Xi iri' apóstolo caca ta. Mixein e' nana pain ca taramaja nucucun. Iri'o' xi' ca' tara me e' nana pain ca apóstolo nucun Cristo urut ta caca ma'.

¹⁴ Je i ma' ira, om ca na ne pain ca wa wa xuxun pain, xi ac i ma' pan ara ca Satanás ta. Ha' ara xi' non pain ca to' jimao pan xucun ma', pain ca mixein capari' pain ca querec querec ac jam co toc meremem cwa', co taramaja mi' non Iri' Jam ma' quem.

¹⁵ Je ca tomi' xuhu' ca'. Je xi om wa wa qui' xuxun caram ma' co taramaja mi' nonon Caxicon Jam ma', co an xiho' nonon pain ca iri'o' xi' ca' tara me caca pain ca ac ca ara xo' taxipa' caca ne ma'. Ame hwe e', main maqui' tara xec nein ca cut xin cacain carawa ca taramaja mi' caca ma', wap ac tococwa tara ta.

¹⁶ Je ca tomi' xuhu' ca', tomi' mami' xim inuhu': Ta coromicat mi' camain' mahu' pain ca coromicat pan tem ma ta mahu' me inuhu'. Mo ta coromicat pan tem ma ta mahu', je i ma' ira, je xi tomi' querec te qui' mahu' quem? Win ne ca tomi' querec te taxipa' hun wari' co om coromicat xo' ma' quem. Ac i ma' xine, ma' ta tomi' xec xec wijimain ta' ca' inuhu'.

¹⁷ Om paxi' na ca tomi' an xiho' ton Taramaxicon nexi' pain ca tomi' xec xec ta' ca'. Tomi' an xiho' e' inon wari' co om coromicat xo'.

¹⁸ Mija ara xi' nana co tomi' xec xec an xiho' nanain ca coromicat nein ca wari' wa ma'. Ac i ma' ta' quem, tomi' xec xec ac i ma' ta' quem.

¹⁹ Coromicat xo' urut xi' ma paxi' a xihwe ta, je ca tomi' querec te huhun oro co tomi' xec xec nana pain ca om coromicat xo' nucucun ma'. Momon taraju wet huhun quem.

²⁰ Xi tomi' pan hot ara huhun oro co quep xirac nunuhu' ta. Mo nana: Co taramaja mi' e' xut nunuhu' pain ca tomi' ha' xut ta cucuhu' ma'. Co mixein nunuhu' pain ca cut noc xa cacain caramajuhu' ma'. Co tomi' xec xec nunuhu' pain ca xin to nucucun. Co tomi' xirac nunuhu', to' to' ac cucuhu' na pain tucuhu' ma' quem.

²¹ Warut iri na ne, om ca quep xirac ac i ma' camain' urut pahu'. Mo xi an xiho' urut cocon pain ca quep xirac cucuhu' ma', wixipa' ac urut xira pain ca ara an xiho' toton. Mija ara xi' nana caram ma' co om hehe nana pain ca tomi' xec xec caca ma'. Je i ma' ira, tomi' xec xec an xiho' toton quem. Ac ca om coromicat xo' ta' a xira ta!

²² Cain' cain' caca quem? Om ca hebreu urut caca ra? Wata' quem, hebreu ina quem. Om ca waram winacon Israel urut caca ra? Wata' quem, winacon Israel ina quem. Om ca hwanana ne cocon Abraão caca ra? Wata' quem, hwanana ne inon Abraão ina quem.

²³ Om ca taramaja mi' urut con Cristo ta caca ra? Wata' co taramaja mi' pan non Cristo ta. Ac ca tamanain ta' a xira pain ca tomi' ac i ma' ta' ta. Taramaja tamana nana ra? Taramaja tiquin' ca' inonon quem. Tao' to tata pain xirinain ca tao' to tao' to to wa ra? Wata' pan co tao' pe ho' tao' pe ho' wa pain xirinain ca tao' to tao' to to wa ta. Wap tata ra? Wata' pan co wap mip ho' wap mip ho' wa ta. Mija na ca mi' pin ho' mi' pin ho' ta' quem.

²⁴ Ma' 5 na oro xijein xec ca wap mip cacapa' oro win judeu ta' pane quem. Wap iri nanapa' ne, ma' 39 ac ne na ca wap in hwet cacapa'.

²⁵ Ma' 3 na oro xijein xec pain ca mam' wap cacapa' pain pana quem. Ma' xica' pe ac ne na ca to' pa' pin xim cacapa' pain pacun quem. Ma' 3 ac ne na oro xijein xec pain ca pe tain cote ne mam' horoho wa pane quem, caracat pin ac ne na pain ca wap nein com pain camana'. Ma' xica' pe na ca ho mao e' ta' pain cote ne com pane quem. Xim pa' ac capa' na, xec pa' ac capa' na pain ca ho mao e' ta' pane.

²⁶ Pain ca xut mao ho' xut mao ho' tain oro xijein macan' pane, mija na oro ca to' mi' pin xim paxi' napa'. We' pa' napa' com. Cut noc xa ca' nanapa' pain caramaju oro wari' co cut noc xa nana ma'. Quep xirac nanapa' oro win judeu ta', quep xirac nanapa' co om judeu nana quem. Mao iri inain oro xijein macan' ma', je pain mahweri ma', je pain cote ne com ma' quem, mija ara xi' na oro ca to' mi' pin xim paxi' napa' ma'. To' mi' pin xim paxi' nanapa' oro co howa urut con Jeju mixein nana ma' quem.

²⁷ Taramaja tamana ina pane, jam' ina pain. Mija na xim ca om pi'am ta' quem. Pe' ina pain ca om capa' ca cao' wa, je pain ca om capa' ca toc wa quem. Ma' ho' ma' ho' napa' oro xec ca om cao' camain' ta' quem. Capin' ho' capin' ho' ina, xi ma' e' ara capa' caxicon wom ta.

²⁸ Mija na oro xijein carawa ca to' i'ina napa' pain xocori ca' quem. Ma' na oro ca to' toron nain xumu cocon oro co cut in xucucun pain ca howa cocon Jeju ma' quem. Toron ho' toron ho' napa' xumu cocon, pain oro xijein xec quem.

²⁹ Ma' iri na co om hwara' opa ma', xiram pa' ac ton na, ac ca om hwara' opa wi ta' con na. Ma' iri na co ja' camara' wa ne, jain jain ac ta' na, toron tamana napa' xumu con quem.

³⁰ Ac ca na e' ne na pain ca tomi' xec xec ta' ca'. Je i ma' ira, tomi' hwet xica' pe e' xuhu' pain oro ca mam' to' querec pin' mahu' pain ca om hwara' opa ne ta.

³¹ Taxi' napa' Iri' Jam co Te ca Taramaxicon nexi' ma', co awi cara tamana ma'. Taxi' napa' pain ca om tomi' mixein ne ca'.

³² Je ca ara capa' pain ca pe qui' tain Damasco pane quem. Pe iri inain i cain ne, quep xim ac capa' na co ma' co governador ra ca Rei Aretas pane. Coco' caho' jein oro manain cote ne pacun ca tao' caho' nein oro xirixi' ca', pain ca hwerehwet hwerehwet ac wa oro xirixi' ma' ac tococwa na oro soldado. Mo ta hwet mao ta' ca Paulo ma', quep ac hun tara ta, ac i ma' na ca tomi' tococwa pata'.

³³ Ane quep xiho' cacapa' oro win ma' ne ne. An ho' pe nanapa' pain cote ne coco, wara ca' na man pain pacun ca tao' caho' nein oro xirim ma', an quiji' pe ac cacapa' na pain xijein cacarain. Witan ca' ac ton na governador pane.