2 Coríntios 10 - Tradução Bíblica Pacaas Novos

Ca tomi' nain ho' xucun Paulo pain ca tomi' xo' cocon oro co tomi' ximama' nonon

¹ Wata' pain ca Paulo ta' ca', tomi' ca' inuhu' pain ca an xiho' ton Cristo pain ca tomi' wixite nucun, je pain ca tomi' pan hot nucun ma' quem. Tomi' mip ca' inuhu' cocon oro win ma' nuhu' co tomi' ximama' ca' nana pata': Tomi' iri napari' pain ca pe ho' capari' ca' ne, tomi' pan hot e' napari'. Pe ni ca' iri napari' ne, pan to' ac cain na tarajixi', ac i ma' na ca tomi' ximama' caca pata'.

² Tomi' mip ca' inuhu': Ma' tara xumuhu' me, ta cuc cuc mahu' pain ca pan to' tain taraxicocon pain ca aram aram hwet xim xuhu' ma'. Om ta hehe ta' pain ca pan to' tain ta' taraxicocon co tomi' ximama' nanaparut pain ca an xiho' e' cocon wari' co om xuruxut xo' nana ma', co ara e' nanain ca param pan nucucun ta nanaparut ma'.

³ Wari' paxi' urut pain ca to urut pain macan' ca', ane om an xiho' urut cocon oro wari' co om howa nonon Iri' Jam ne. Om ca an xiho' urut pain ca coromicat nein ca wari' wa pain ca ari urut cocon oro co ari nanaparut cwa'.

⁴ Ane om mam' ari urut pain ca mam' ari nucucun oro wari' pain macan' ca' ne, om na. Mam' ari urut pain ca hwara' opa nucun Iri' Jam ta. Je ca mam' to' quiji' pin urut pain oro ca hwara' opa nucun Caxicon Jam ma'. Je ca mam' to' quiji' pin urut con quem.

⁵ Je ca mam' to' quiji' pin urut pain oro ca tomi' in pin caracan nucucun oro wari' ma', pain oro ca xin to nucucun pain ca to' i'ina cocon oro xucucun co querec pin' xun paxi' nonon Iri' Jam ma'. Je ca mam' to' quiji' pin urut pain oro ca coromicat pan teretem nucucun, ma' ta aram aram tomi' ha' pin cocon Cristo ta urut cocon.

⁶ Mo ta aram aram tomi' ha' iri'o' pin hun Cristo ma', mo ta ma' ma' wet caca co om tomi' ha' querec nana pahu', om ta hehe urut cocon, pan to' pan to' pi' pin ac urut cocon tara pain taraxicocon ta.

⁷ Noro e' hwein ca cwere wa, om ca noro hwein ca xumu wa. Wari' co wari' nucun Cristo ma', na e' na pain ca coromicat xo' ca. Xi xica' pe ca pain ca wari' nucun Cristo ca ma'. Wari' nucun Cristo urut quem. Win ca ma'.

⁸ Tomi' xec xec paxi' inuhu' pain ca tomi' hwet ho' tomi' hwet ho' xuhu' pain ca mi' caparut pain ca hwara' opa wa Taramaxicon nexi' cwa'. Ane om wixipa' ta' pain ca tomi' ac i ma' xuhu' ca' ne. Mi' capa' pain ca hwara' opa wa ca' ira. Ma' ta quep xiho' momon ta napa' pahu'. Om ca to' quiji' pin roron ta capa' pahu'.

⁹ Noc inain ca coromicat mi' ca' mahu' ma': Ac ca to' jin' e' capari' na pain ca xirao' mi' capari' ca' mahu', ta coromicat mi' ac i ma' mahu' me ta.

¹⁰ Ma' ara xi' nana oro win ma' nuhu' co coromicat mi' ac i ma' nanapa' ma'. Pan to' e' nain ca taraju wa pain oro ca xirao' nucun, tomi' carapita e' na pain ca hu capari' ta. Hwet iri napari' ne, hehe ac ca na, xi pijim' xo' taxi' capari' ta, ac i ma' na ca tomi' caca ma'.

¹¹ Ma' tara ximicocon ta! Oro ca xirao' nuxut pain ca om to ho' urut pahu' ca', je ta ara xin urut pain ca to ho' xim urut pahu' quem.

¹² Om ca an xiho' urut cocon oro co tomi' xec xec ca' nana pain ca warut co awi, awi tiquin' ca' urut cocon oro win ma' nuxut cwa' nana ma'. Om ara xi' na ca coromicat xo' caca pain ca an hwet pe ac i ma' cacain ca pan teretem nucucun ta.

¹³ Warut iri na ne, pain ca tomi' hwet urut pahu' pain ca taramaja nuxut ca', om ca tomi' xec xec ximama' urut pahu', om ca tomi' hwet urut pahu' pain ca taramaja wa ca om mi' caparut Iri' Jam, om na. Tomi' hwet cain' urut cocon oro wari' nein xijein macan', aram aram hwet ac cuhu' na.

¹⁴ Pain ca tomi' ac i ma' urut pahu', om ca tomi' hwet ximama' urut pahu' pain ca taramaja nuxut pahu' quem. Mo xi om wara hwet urut pahu' pane, je xi om hohot qui' ne pain ca tomi' hwet urut pahu' pain ca taramaja nuxut ca' pahu'. Ane hwet pan urut pahu' pane ne. Pijim' hwet mi' ac urut pahu' na pain capijacon Iri' Jam con Cristo.

¹⁵ Je ca om tomi' xec xec ximama' urut ca', pain ca warut co ara nanain ta urut pain ca taramaja nucucun oro xucucun wari' ma' quem. Xi param ara urut pahu' pain ca horon horon tiquin' hwe pain ca howa hun ta. Ma' ta mija mija tiquin' ne ca taramaja nuxut pahu' ta urut pahu'.

¹⁶ Ma' ta ha' caparut pain ca pijim' mama' urut pain oro xijein macan' ca to in mama' pain i cain pahu', pijim' mi' ac urut cocon tara pain capijacon Iri' Jam con Cristo. Om ta tomi' xec xec ximama' urut pain ca warut co taramaja to nanain macan' ca taramaja pe ca xucun wari' urut, om na.

¹⁷ Ma' ara xi' na ca xirao' pe xine capijacon Iri' Jam con wari' co tomi' xec xec ma': Mo ta tomi' hwet tain cain ca awi wa wari' ma', tomi' hwet e' tarain ca awi nucun Taramaxicon Iri' Jam ta. Ac i ma' na ca xirao' pe xine capijacon Iri' Jam.

¹⁸ Xi hohot con Taramaxicon Iri' Jam wari' co tomi' xec xec ximama' ma', pain ca awi ina ta ca ma'. Hohot e' non wari' co awi na ta pan ca ma'. Wirico co querec pin' wa pain ca awi nucun ta.