2 Coríntios 1 - Tradução Bíblica Pacaas Novos

¹ Paulo ina pain ca xirao' mi' xuhu' ca'. Apóstolo ra napa' Cristo Jeju pane, pain ca tomi' hwet roron pain capija oro wari' capa' pane. Xi om ne ca wirico ara ca Iri' Jam co param mi' napa' pain ta. Wata', wirico coxari' Timóteo cwa', ac i ca' urut pain ca xirao' mi' urut pahu' ca'. Xirao' mi' urut pahu' pain ca cut in xujuhu' pain Corinto ma', pain ca howa hun Iri' Jam ma'. Xirao' mi' xirao' mi' pi' pin urut cocon oro wari' nucun Iri' Jam co to nanain oro xijein macan' pain Acaia ma' quem.

² Param urut con Cotere' Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param urut cocon pain ca mi' cucuhu' pain ca om toron ne xumuhu' quem.

Ca wirico Iri' Jam co to' hwara' opa napari' pain ximixi' ta tococwa

³ Tomi' hwet xin ca awi tamana nucun Iri' Jam co Te ca Taramaxicon nexi' Jeju Cristo ta. Xiram pa' tamana napari', to' hwara' opa napari' pain ximixi' quem.

⁴ To' i'ina iri napari' oro carawa ne, to' hwara' opa ac capari' na pain ximixi'. Ma' ta to' hwara' opa to' hwara' opa tiquin' huhun oro xucucun wari' co ma' nonon oro ca to' i'ina nonon quem napari'. Win ne ca to' hwara' opa pan xuhu' ca' napari' quem.

⁵ Je ca tomi' urut pahu' ca'. Jain jain tamana ara xi' urut pain oro ca to' i'ina caparut ca', ac ca jain jain wi urut con na Cristo ma', xi om ne ca win cwere ara urut con ta. To' hwara' opa tamana naparut pain xumuxut ca' quem, mam' to' hwara' opa naparut con Cristo.

⁶ Jain jain iri urut ne, to' hwara' opa pan ac xihwe na pain xumuhu' ma', witan ac hwe na, e' cara ac hwe tara quem. Ac i ma' na pain ca to' hwara' opa caparut pain xumuxut Iri' Jam quem. To' hwara' opa iri naparut ne, to' hwara' opa ac cuhu' na quem, mi' ac cuhu' na pain ca quereme hwein oro ca to' i'ina nuhu' ma' quem. Oro ca jain jain nuhu' ma', an xiho' ara xi' nain oro ca jain jain nuxut ca' quem.

⁷ Taxi' urut pahu' pain ca quereme cara xin hwein oro ca to' i'ina nuhu' quem, xi taxi' ara urut pain i ca' quem: Jain jain iri hwe ne, to' hwara' opa ac cuhu' na pain xumuhu' Iri' Jam. Win urut pain ca jain jain urut ca'. To' hwara' opa ac caparut na pain xumuxut ca' quem.

⁸ Tomi' hwet xim urut pahu' pain i ca' quem xere. To' i'ina tamana nanaparut oro co to nanain macarain Ásia pane. Jain jain tamana urut cocon, ximin tamana urut cocon pane. Om ta witan ca' ac xuxun ta urut cocon ira, to' parapa' pin xim nanaparut ira.

⁹ Ac i ma' ara xi' na ca coromicat nuxut cocon, to' parapa' pin xim tatarapari' xi' ma urut cocon. Ane ximin e' urut cocon ne, ma' ta om howa pan xujuhu' pain ca witan ca' xuxun ta hwe ma' naparut Iri' Jam, ma' ta howa pan mahu' ta naparut quem. Xi wirico ara ca co to' e' mami' nonon oro co cono' nana ta.

¹⁰ To' witan ca' naparut cocon quem. To' witan cara ca' taraparut cocon oro co to' parapa' pin xim nanaparut. Howa pan urut con Iri' Jam ta, taxi' urut con pain ca to' witan cara xim caparut ca'.

¹¹ Na e' na pain ca quep xiho' maparut quem. Tomi' mi' xut con Iri' Jam me. Mija ac caca tara co tomi' querec te nonon Iri' Jam parut, tomi' querec te totoron pain ca quep xiho' caparut ca', je pain ca ha' cocon pain ca tomi' mi' caparut con quem.

Ca tomi' xo' cocon Paulo pain ca om hwet ho' xuhu' ta cocon pane

¹² Tomi' querec te urut, xi om ne ca taxi' ara xujuxut pain ca tomi' iri'o' urut ta. Xuruxut xo' urut cocon oro wari'. Xuruxut xo' pan urut pahu' quem, om ca tomi' mixein camain' urut pahu'. Wirico Iri' Jam co mi' naparut pain ca xuruxut xo' nuxut, wirico co mi' naparut pain ca tomi' iri'o' nuxut quem. Om ca maqui' nein ca coromicat nein ca wari' wa, om na. Wirico Iri' Jam pan na co mi' naparut pain ca xuruxut xo' nuxut, xi xiram pa' ara caparut ta.

¹³ Je ca tomi' xuhu' ca'. Oro ca xirao' mi' urut pahu', om ca i'ina noro hwein, om ca i'ina taraju pa' hwein quem. Param inuhu'

¹⁴ pain ca querec pin' maparut pain ca xuruxut xo' nuxut ca'. Taxi' paxi' inuhu' pain ca querec pin' wijimain e' maparut pain ca xuruxut xo' nuxut pane. Ame hwe e', main maqui' tara xec nein ca ha' pin xim cuhu' pain ca querec pin' iri'o' maparut pain ca xuruxut xo' nuxut ca'. Win ne ca tomi' querec te tamana xim urut pahu' pain xec nein ca in qui' ta' nucun Taramaxicon nexi' Jeju quem.

^15-16 Taxi' inuhu' pain ca tomi' querec te maparut ma'. Je ca mo querec xim xuhu' pane. Ca' paxi' na ca coromicat ne ira: Mao tain macarain Macedônia iri ta' ne, hwet ac xuhu' tara, quep xiho' ac xuhu' tara pain ca pe ho' wijimain xuhu'. Paca' ac xuhu' tara, mao ac tain tara Macedônia cain. In ca' iri tain ne, in hwet iri xuhu' ne, quep xiho' mami' ac xuhu' tara. In hwet iri xuhu' ne, quep xiho' ac mahu' tara pain ca mao tain ta' pain Judeia quem. Ac i ma' paxi' na ca coromicat ne ira.

¹⁷ Ane om hwet xuhu' ne. Cain' ca coromicat mi' mahu' quem? Tomi' ximao na pain ca hwet xim capari', ac i ma' tara ca coromicat mi' mahu' ra? Am coromicat mi' ca' mahu' quem, an xiho' nain ca wari' wa ca coromicat ximao ma', pain ca tomi' pe cain capijacon ma', pain ca an in an in cain ca coromicat pe nucun, ac i ma' tara ca coromicat mi' mahu' ra?

¹⁸ Ane om tomi' ximao xuhu' ne. Tomi' iri'o' urut pahu'. Win ne ca tomi' iri'o' taxipa' ca Iri' Jam cwa'. Om ca an in an in urut pain ca tomi' urut pahu' quem.

¹⁹ Tomi' iri'o' taxipa' na Panxica Iri' Jam ma', wirico Jeju Cristo co pijim' hwet mi' xuhu' cwa', co pijim' hwet mi' cuhu' Silvano con Timóteo cwa' quem. Om ca an in camain' cain ca tomi' pe nucun Jeju Cristo pane. Ara taxipa' nain oro ca tomi' pe nucun, ac i ma taxipa' urut quem.

²⁰ Xi wirico Jeju Cristo ara ca co ara nain oro ca wara tomi' pe nucun Iri' Jam ta. Je ca tomi' ca' urut pahu' ca': Amém, iri'o' na ca tomi' nuxut ta urut pahu' pain ca an hwet pe urut pain ca awi tamana nucun Iri' Jam.

²¹ Je ca tomi' xuhu' ca'. Wirico Iri' Jam co to' hwara' opa naparut pain ca win cwere urut con Cristo. Wirico co to' hwara' opa nuhu' con quem, to' hwara' opa to' hwara' opa pi' pin napari' pain ca win cwere xun Cristo. Wirico co tora' napari'.

²² Wari' ne napari' quem, ac ca xirao' capari' na pain wixicon ca', pain ca wari' ne xuhu' ta capari'. An pe mi' napari' pain Tamataracon pain ximixi' ca' quem. Je ca to' taxi' napari' pain ca aram aram mi' xim capari' pain oro ca wara tomi' pe mi' capari' quem.

²³ Je ca tomi' xuhu' ca'. Om ca in hwet querec xuhu' pain Corinto ma'. Xi noc ara xuhu' pain ca tomi' xaxa' tamana wa pain ca pan to' mami' tain tarajuhu' ta. Tomi' iri'o' ina, taxi' napa' Iri' Jam pain ca xiram pa' xuhu' pain ca tomi' xaxa' tamana nuhu' pane.

²⁴ Om ca cuc cuc urut pahu' pain ca howa xo' howa xo' je urut pahu'. Quep xiho' e' xim urut pahu'. Ma' ta tomi' querec te hwe urut pahu'. Xi wara hwara' opa ara hwe pain ca howa nuhu' ta.