2João 1 - Tradução Bíblica Pacaas Novos

¹ Wata' pain ca querec wet toton oro co howa nonon Jeju cwa', wata' pan co xirao' mi' xim ca' we. Tora' pan nem Iri' Jam. Xirao' mi' inonon humajum ma' quem. Om ca noc camain' xuhu', tomi' querec te iri'o' inuhu'. Om ca xica' pe ta' pain ca om noc xuhu' ca', tomi' querec te tomi' querec te pi' pin nunuhu' co taraju pa' nanain capijacon Iri' Jam ca iri'o' con Jeju ma' quem.

² Om ca noc urut pahu', xi om ne capijacon Iri' Jam ca iri'o' ta. Pe ho' napari', pe ho' cara tarapari' quem.

³ Quep xiho' tarapari' Cotere' Iri' Jam con Panxica Jeju Cristo ma', pain ca mi' xim cacapari' pain ca param nucucun. Xiram pa' tatarapari', mi' tatarapari' pain ca om toron ne ximixi' quem. Quep xiho' ac i ma' tatarapari' pain ca howa xin capijacon ca iri'o' ma', je pain ca om noc caracan xijexi' quem.

Ca om noc xijexi', je pain ca na e' ne pain ca ma' ne ximixi' cocon oro co pijim' mixein nana ma'

⁴ Ma' nana humajum co querec ta' pane. Tomi' querec te tamana inonon, xi xuruxut xo' ara caca pain ca howa cacain capijacon Iri' Jam ca iri'o'. Tomi' ha' nonon Cotere' pain oro ca ara je capari' quem. Je ca tomi' querec te tamana toton ca'.

⁵ Tomi' xim inuhu' pain i ca' quem we. Ta noc caracan xijexi' me. Pain ca hu ac i ma' capari' Iri' Jam ma', om ca xocori ne ca hu nucun. Wara hu ac i ma' napari' pain cara pane, pain ca xo' pijim' ten qui' xin capijacon con Jeju pane.

⁶ Xuruxut xo' iri iri' pain ca tomi' ha' xin oro ca ara je capari' Iri' Jam ne, om ac ne na ca noc xun, om ac ne na ca noc xijexi' quem. Win ne ca wara hu capari' pain cara pane, pain ca xo' taraju ten qui' xin ca pijim' xine capijacon con Jeju pane. Xuruxut xo' je pain ca om noc mahu', je pain ca om noc caracan pan xujuhu' ta capari' ca' ira.

⁷ Mija ara xi' nana co mixein nana ma', co hwet nonon oro co om howa nana ma', pijim' mixein pijim' mixein ac cocon na quem. Om ca an tan pan capari' pain ca wari' nexi' Jeju Cristo ta nana pain ca pijim' mixein nucucun. Wari' co pijim' ac i ma' ma', wirico co mixein taxipa' ma', co ari mip non Cristo pain ca noc tamana con ma'.

⁸ Ma' tara xumuhu' me. Mo ta ha' huhun co pijim' mixein ac i ma' nana ma', waraju ac hwein tara oro ca taramaja nexi' pain ca taramaja mi' xun Iri' Jam. Howa cara iri jein oro ca pijim' mi' xihwe pain capijacon Iri' Jam ne, cut mi' cut mi' pi' pin ac cuhu' tara pain oro ca an to xo' mi' cuhu' Iri' Jam pain pawin cain.

⁹ Oro wari' co om howa cara nanain capijacon Iri' Jam ca ca' na ca Cristo pane, co tacan hwara' nanain ca coromicat pan nucucun pain ca ca' na cacain ma' quem, om ca win cwere cocon Iri' Jam. Oro wari' co howa cara nanain ma' iri nana ne, win cwere nonon Cotere', win cwere nonon Panxica quem.

¹⁰ Mo ta hwet cuhu' wari' co ca' na mixein nain capijacon Iri' Jam con Cristo ma', om ac ne tara ca tomi' querec te hun ta. Ta corom ra hun pain xuruhu' me, ta maqui' ma ra aji' camain' hun me ta.

¹¹ Xi taramaja wi pin ara con wari' co tomi' querec te non pain oro ca ara pan tem nucun ta.

Ca pi' pin ne ca xirao' nucun João

¹² Mija paxi' na oro ca tomi' hwet xim xuhu' ca', ane noc tain ca xirao' mi' xuhu' pain ne. Hwet pan xim inuhu', tomi' ac xijexi' tara. Ma' ta tomi' querec te tamana xijexi' ta inuhu'.

¹³ Mam' pe wet urut pahu' ta nunuhu' humaxicam cowe ma cwa', co tora' ca Iri' Jam cwa'. Je i ca' ca xirao' ne ca'.