1 Timóteo 6 - Tradução Bíblica Pacaas Novos

Ca tomi' xo' con cocon co taramaja mi' e' nonon taramaxicon nucucun

¹ Tomi' xo' ho' inonon xerexi' co taramaja mi' e' nonon taramaxicon nucucun ma'. Na e' na pain ca querec pin' cocon pain ca taramaxicon nucucun. Tomi' ha' totoron quem. Ma' ta om tomi' xirac cocon Iri' Jam oro wari'. Ma' ta om tomi' xirac cacain capijacon Iri' Jam ca ca' na iri' quem.

² Mo ta howa cocon Cristo Jeju taramaxicon nucucun co taramaja mi' caca ma', om ca na ne pain ca tomi' ximama' ca' cocon quem: Om na, ac ca aji' ton na, xi howa howa pi' pin ara iri' ta, hohot na pain ca om taramaja hap ta' ca', om ta mana' capa' ta. Om ta tomi' ximama' ac i ma' camain' caca ta. Taramaja xo' pan xi' tatara. Xi howa pan ara caca taramaxicon nucucun co quep xiho' caca pain ca taramaja mi' e' cocon ta. Om ca noc cocon quem. Tomi' xo' ac i ma' roron. Tomi' ha' xine pain roron quem.

Ca na e' ne pain ca hohot pan capari' oro ca ma' napari'

³ Ma' nana wari' co pijim' ni ca' nanain capijacon Iri' Jam ma'. Om ca xin ne cacain ca pijim' xo' nucun Taramaxicon nexi' Jeju Cristo. Om ca howa cacain ca pijim' nucun ca ca' na napari' pain ca xuruxut xo' wa pain ca ara e' xine ca param nucun Iri' Jam quem.

⁴ Wari' co pijim' ac i ma' nana ma', xec xec nana. Om ca taraju pa' camain' caca. Ac ca ma' cocon na nan pain ximicocon pain ca param e' cacain ca tomi' caracan wa pain ca om taraju pa' xo' xine ca tomi' nucucun oro wari'. Oro wari' co taraju nonon pain ca pijim' nucucun ma', aram aram noc mi' ac xucucun na pain oro carawa. Mana' caracan ac xucucun na, tomi' napat ac xucucun na, coromicat mi' ac xucucun na pain oro ca om awi wa.

⁵ Tama' teretem caracan ac xucucun na, xi em' pin ara ne ca coromicat nucucun ta. Om ca coromicat xo' taxi' mami' caca. Om ca taraju pa' mami' ac cacain capijacon Iri' Jam ca iri'o'. Coromicat ca' nana: Pain ca ac ca xut xo' ta' ca', pain ca pijim' ta' ca', caramaju tamana ac ta' tara ta na ca coromicat pan teretem nucucun.

⁶ Mo ta xuruxut xo' iri' pain ca win xumu e' xin ca param nucun Iri' Jam ca', ac ca caramaju iri' na. Iri'o' na ta. Mo ta hohot capari' carawa ca mi' capari' Iri' Jam ca', mo ta om jain jain ximama' xin oro carawa ma' quem, je i ma' tara ca caramaju tamana qui' iri' con Iri' Jam.

⁷ Xi wara ma' capari' carawa pain ca xo' camara' iri' pane. Om ta cut mama' xin caramajixi' pain ca aram aram cono' xi' iri' quem.

⁸ Je ca tomi' xim ca': Mo ta ma' e' capari' carawa ca cao' wa, mo ta ma' e' capari' wom co to' iri' quem, na e' na pain ca hohot na ta iri' ta.

⁹ Oro wari' co caramaju tamana xixi' na nana ma', caracat ac caca na pain ca tomi' querec tococwa pain oro ca om awi wa. Ac ca quep cocon na oro carawa ca param ximama' caca ma'. To' ara nonon, to' i'ina nonon, aram aram to' om pin ac cocon na quem.

¹⁰ Param tamana iri irin dinheiro ne, je ca maqui' ne oro ca om awi wa ma'. Ma' nana wari' co param tamana nanain dinheiro pane, howa howa om pin ac cocon na Cristo Jeju. To' ara pan ac xucucun na pain oro carawa ca param caca ma'. Mija na ca jain jain caca pane ta.

Ca hu con Timóteo Paulo

¹¹ Ac i ma' nana oro wari' co param ximama' nanain dinheiro. Wum iri na ne, wari' nucun Iri' Jam ma. Mo ca' rain oro ca ara nucucun co om awi camain' nana. Win xumu e' rain carawa ca hohot non Iri' Jam. Xut xo' ra pain ca win xumu e' main ca param nucun quem. Howa cara ron Cristo Jeju. Tomi' querec te cara roron oro wari'. Quereme rain oro ca to' i'ina nem. Tomi' wixite roron oro wari'.

¹² Pain ca howa cara mon Cristo Jeju ma', ma' mija tara oro ca to' i'ina nem ma'. Je i ma' ira, na e' na pain ca momon hwara' opa tiquin' ca' main ta. Querec pin' ron Iri' Jam pain ca pe ho' cara ne ta quem, pain ca mi' xim pain ca om pi' ra ha' ne ca e' wa ta quem. Wara tomi' pe ara xi' nem pain ca e' cara wa pain ca xo' tora' qui' quem pane ta. Mija nana wari' co taraju nenem pain ca tomi' hwet main ca howa nem pane quem.

¹³ Je ca tomi' xim ca', tomi' mip inem. Taraju napa' Iri' Jam co to' e' nain oro carawa ma', co to' e' napari' quem. Taraju napa' Cristo Jeju co om tomi' jin' non taramaxicon Pôncio Pilatos pain ca tomi' hwet con pain ca Taramaxicon ina con pane quem. Taraju nanapa' pain ca tomi' mip xim ca':

¹⁴ Tomi' ha' rain oro ca tomi' ha' ra quem Iri' Jam ta. Ac ca querec wet main tara capijacon, ma' ta om to' jimao pin cacain co pijim' pan teretem nanain ma'. Ma' ta om tomi' napat xine quem. Querec wet cara rain. Aram aram in hwet ac capari' tara Taramaxicon nexi' Jeju Cristo.

¹⁵ Maqui' iri tara xec nucun Iri' Jam pain ca in mao rain macan' ton con Panxica ne, in qui' ac ca tara. Wirico Iri' Jam co awi tamana cwa', co in ac iri' cwa'. Xica' pe na Iri' Jam co taramaxicon hwara' opa. Wirico co tomi' ha' xine nonon oro taramaxicon.

¹⁶ Xica' pe na Iri' Jam co om mi' pin ra ha' ma'. Pe ho' nain naran ca toc meremem tamana. Je ca om xut hwet ac tocwa. Om na wari' co querec non. Om ca querec ac tocwa quem. Na e' na pain ca querec pin' xun pain ca awi cara nucun ma', je pain ca hwara' opa cara nucun ma' quem. Amém, iri'o' na ca tomi' ne ta.

¹⁷ Hu mip roron co howa nana ma', co caramaju nana pain macan' pain xocori ca'. Ta xec xec hwe pain caramajuhu' me ta roron. Ta howa hwein me roron. Main om pin ta' ara xi' na oro caramajixi' ta. Howa e' jun Iri' Jam ta roron. Wirico pan na Iri' Jam co mi' mi' pi' pin napari' pain oro carawa ca om napari' ca'. Ma' ta tomi' querec te hwe ta napari'.

¹⁸ Hu mip ca' roron quem: Tama' ara jein oro ca awi wa. Ta xiram pa' hwein caramajuhu' quem me. Wara awori to je pain ca mi' mi' tiquin' hwein pain ca quep xiho' huhun oro wari' co om nonon carawa ta roron. Oro carawa ca awi ca ara caca ma', je i ma' iri' caramaxicocon pain ca caramaju caca ma'.

¹⁹ Mo ta ara ac i ma' caca co caramaju nana pain macan' pain xocori ca', ac ca cut in xo' tamana cacain na iri' carawa ca awi tamana pain pawin cain. Om ta pan' ara'am camain' ne caramaxicocon pain pawin quem, to wet cara tara ta. Mi' ac tococwa tara pain iri' ca e' wa pain ca e' cara caca quem.

²⁰ Je ca tomi' xim ca' Timóteo: Ta waraju main ca taramaja nem ca mi' quem Cristo Jeju me. Querec wet rain capijacon, ma' ta om to' jimao pin cacain co pijim' pan teretem nanain ma'. Ta taraju wet camain' momon co tomi' ximama' nana me, pain ca miri'om cacain oro caramaxicon Iri' Jam. Ma' ara xi' nana wari' co taxi' urut pain capijacon Iri' Jam paxi' nana ma'. Ane om taxi' cacain ne. Ta taraju wet camain' momon me ta.

²¹ Ma' nana wari' co taraju wet nonon quem. Howa howa om pin ac cacain na capijacon Iri' Jam ca howa iri' ca'. Param inon Iri' Jam pain ca quep xiho' cuhu' ma', pain ca mi' e' cuhu' pain ca param nucun ma'. Je i ca' ca xirao' ne ca'.