1 Timóteo 5 - Tradução Bíblica Pacaas Novos

Ca tomi' xo' con Timóteo Paulo ma', cocon co howa nana co querec wet ca ma'

¹ Mo ta ma' cocon carawa ca to' i'ina nonon co howa nana co querec wet ma ma', tomi' xo' ac momon tara pain ca hu toton momon ma'. Ac ca te momon tara pain ca tomi' xo' momon ma'. Tomi' wixite roron co xo' horon nana ma' quem. Ac ca xere momon tara.

² Tomi' xo' raram oro mon horon ma' quem. Ac ca na' mamam tara. Tomi' wixite raram oro mon xojam' ma' quem, ac ca xere mamam tara. Xumu xo' ra cacam. Om ta coromicat ximao camain' ma cacam ta.

³ Querec wet xo' raram oro narima' co cono' ca' nanam waram taxicacam ma', wiricacam co om nana ca nari nequequem co querec wet nanam ma'. Na e' na pain ca quep xiho' tacacama pain ca mi' tacacama pain carawa ca om nanam ta.

⁴ Mo ta ma' cacama humaxicacam cacam waram winacacam ma', wiricacam pan tatara co querec wet nanam. An hwet tatarain ca howa nequequem pain ca tomi' ha' cocon Iri' Jam ma', pain ca querec wet taxi' cain' cacam oro ca nari nequequem ma'. Je ca hohot con Iri' Jam ta. Querec wet iri tataram waram jicacam cacam mana copa' cacama cacam mana cojeo' cacama ne, ac ca pagar in hwet cacam na pain ca wara querec wet pan tacacama pain ca hwijima' nequequem pane.

⁵ Narima' co mi' pin ca' nam taxicam ma', co om ma' camain' ca nari nequem co querec wet nam ma', howa non Iri' Jam pain ca xiram pa' cam ma'. Winim' non pain ca mi' cam pain carawa ca om nam. Tomi' taxipa' non pain xec je pain xim quem. Xiram pa' ne ta Te Iri' Jam, mi' ne pain carawa ca om napa' ca' non.

⁶ Narima' co mi' pin ca' nam taxicam ma' iri na ne, co win xumu e' nain carawa ca param cama ma', ca mam' querec te cama ma', ac ca mi' pin cama na. E' paxi' na cwerequem. Ac ca mi' pin ne na ximicam pain ca coromicat nequem.

⁷ Hu mip ac i ma' raram oro xerexi' ma', ma' ta om hwet ne wixicacam pain ca caracat wa.

⁸ Wari' co miri'om nanam oro ca nari nucun ma', co om querec wet xo' camain' nanam mana panxica cam jicon con cote ca ma', ac ca an pe pin cain na capijacon Iri' Jam ca howa iri' ca'. Pan tem tiquin' ca' non wari' co om howa camain' non Cristo Jeju.

⁹ Tomi' ho' xim cacam oro narima' co cono' ca' nanam waram taxicacam ma', co quep xiho' xi' wawa ma'. Narima' co tiquin' ca' nain ca 60 pin ne cawaxi' nequem ma', hohot ac ne tara pain ca quep xiho' wi tacama cacam oro xequem narima' co wara cono' ca' nanam taxicacam. Mo ta quep xiho' xim tacama, na e' na pain ca ma' xica' pe ca taxicam pain ca e' e' wet nucun pane.

¹⁰ Hohot e' na pain ca quep xiho' tacama narima' co wara querec pin' wa pain ca ara taxipa' camain oro ca awi wa pane. Mo na: Co wara querec wet querec wet horon pin nanam humaxicam pane. Co querec te taxipa' nonon co howa nana co maqui' nanain xijein xirim pane, co cao' to ho' xine, pi'am to jein xuru ca' nonon pane. Co xiram pa' taxipa' nonon co howa nana pain ca ara mi' e' cocon pain oro carawa ca param caca pane quem. Co quep xiho' taxipa' nonon oro wari' co i'ina nonon oro carawa pane quem. Co win xumu taxipa' nain oro ca xiram pa' wa pain ca ara mi' cocon pain oro ca awi wa co howa nana pane quem. Mo ta xut xo' ac i ma' cama pain ca e' e' wet qui' ca taxicam pane, hohot ac ne tara pain ca quep xiho' tacama pain xocori ca'.

¹¹ Co xo' horon nana ma' iri na ne, co om hwet querec nanain ca 60 ne cawaxi' nequequem ma', om ta quep xiho' wi tacacama cacam oro mon horon ma'. Xi maqui' ta' ara ne xec nein ca cut mami' xi' cacama tarama'. An to ac cacamain tara ca wara tomi' pe nequequem pain ca win xumu xun Cristo ta cacama pane.

¹² Em' pin ac cacama tara pain ca an to pin cacamain ca wara tomi' an pe mi' cocon pain ca tomi' nequequem.

¹³ Je ca tomi' xim ca': Mo ta quep xiho' wi tacacama cacam oro mon horon ma', jam' taxipa' ac ne tara cwerequequem. Corom corom ac cacamain tara xiricocon oro win ma' cacama, tomi' ximama' ac cacama tara pain ca tomi' xina cacamain waracocon oro xucucun wari' ma', pain ca querec wet e' cacamain caramaxicocon ma', pain ca om querec wet pan cacamain caramaxicacam ma' quem.

¹⁴ Je ca tomi' xim ca': Oro narima' co cono' ca' nanam waram taxicacam pain ca xo' horon xo' horon wet nequequem ma', na e' na pain ca cut cocon xucun tarama'. Wijima ac cacama tara, querec wet ac cacamain tara xiricacam. Om ac ne tara ca hwet ne wixicacam cocon oro wari' co noc nonon Iri' Jam ma'.

¹⁵ Ma' ara xi' nana co an to pin nonon Iri' Jam. Howa ni ac cacama na, ja' ja' pin ac cocon na Caxicon Jam quem.

¹⁶ Oro narima' co howa nonon Cristo Jeju ma', mo ta ma' cacama ca nari nequequem co cono' ca' nanam waram taxicacam ma', na e' na pain ca querec wet pan cacam. Om ta na ne pain ca to' i'ina cacam co howa nana pain ca xiram pa' xut me cacam ma'. Ma' ta quep xiho' pan tacacama co om nanam ca nari nequequem co querec wet nanam ta.

¹⁷ Wari' co querec wet nonon co howa nana ma', mo ta taramaja xo' caca pain ca querec wet cocon ma', na e' na pain ca querec pin' tococwa, je pain ca quep xiho' tococwa quem. Co win xumu tamana nanain ca taramaja nucucun pain ca pijim' cacain capijacon Iri' Jam ma', pain ca hu cocon co howa nana ma', wiricoco tatara co querec pin' tamana wawa ma'. Wiricoco tatara co quep xiho' wawa ta.

¹⁸ Win ne ca xirao' pe xine capijacon Iri' Jam pane: Ta tucu main capijain boi pain ca xom xom nein trigo me, ma' ta cao' ne pain ca taramaja nein ma', ac i ma' na ca xirao' pe nein. Ma' na xijein ca xirao' pe nein quem. Ca' na: Wari' co taramaja ma', na e' na pain ca pagar tocwa pain ca taramaja nucun, ac i ma' na ca xirao' pe nein ma'. Je ca tomi' xim ca': Wari' co pijim' mi' nonon pain capijacon Iri' Jam co howa nana ma', na e' na pain ca quep xiho' tococwa ta.

¹⁹ Mo ta tomi' em' tocwa pain ca caracat wa wari' co querec wet nonon co howa nana ma', mo ta ma' xica' pe ca co tomi' em' non ma', co querec inon pain ca caracat ca ta non ma'. Ta howa hap mon me. Mo ta ma' 2 caca, mo ta ma' 3 caca co querec urut con pain ca caracat ca ma' cocon ma', howa ac momon tara.

²⁰ Mo ta iri'o' ne pain ca caracat ca ma', na e' na pain ca tomi' mon pain taraxicon. Taraju tatara co howa nonon Jeju pain ca cut in xujuhu' ma', taraju tatara pain ca tomi' mon pain taraxicon. Ma' ta jin' caca, ma' ta om win ca ne cocon ma'.

²¹ Je ca tomi' xim ca': Tomi' ha' ne pain oro ca hu xim pain ca xirao' ne ca'. Pain oro carawa ca ara ma ma', pain ca tomi' main taraxicocon co querec wet nonon co howa nana ma', ta xiram pa' paxica' momon me ta. Om ca na camain' ne pain ca tomi' querec te paxica' momon. Tomi' mip inem ta. Taraju na Iri' Jam con Cristo Jeju cocon oro jam co tora' ca ma', pain ca taramaja mi' xine cocon ma', taraju nanapa' pain ca tomi' mip xim ca'.

²² Mo ta ma' ca wari' co querec pin' paxi' ma ma', pain ca hohot ne pain ca querec wet cocon oro co howa nana ma', ta quep hap main winacon pain ca tomi' xo' mon pain ca taramaja nucun me. Querec pin' cain' ron pain ca xut xo' nucun. Mo ta tomi' xo' mon pain ca taramaja wa pain ca ma' con ca caracat wa ma', ac ca caracat wi ma con tara. Ma' tara xumum me. Pe ni ca' rain oro ca caracat wa me. Om ca na camain' ne pain ca hwet ne wuxum ta.

²³ Tomi' xim inem pain i ca' quem. Ta toc e' ma com me ta. Toc wijimain ra comi uva ca mana'. Xi om ne ca caxi ho' caxi ho' ara ne pemenem pain xumum ma'.

²⁴ Je ca tomi' xim cocon wari' co quep tain main winacocon pain ca taramaja nucucun ma', tomi' querec ac tococwa tara. Ma' tara xumum me, ta quep hap main winacocon me. Ma' ara xi' nana wari' co wara querec pin' wawa pain ca caracat nucucun ma'. Wara querec pin' tata pain ca om tomi' xo' querec tococwa pain carawa ca ara caca ma'. Oro xucucun iri nana ne, om ca querec pin' hap tococwa pain ca caracat nucucun ma'. Joc xim nanain. Ame ma e', main taxi' ac tococwa tara pain ca tomi' xo' xun tococwa pain carawa ca ara caca ma'.

²⁵ Ac i ma' nana oro wari' co ara nanain ca awi wa quem. Ma' nana co wara querec pin' wawa pain carawa ca awi ca ara caca ma'. Oro xucucun iri nana ne, om ca querec pin' hap tococwa pain carawa ca awi ca ara caca ma'. Ame ma e', main taxi' ac tococwa tara pain carawa ca awi ca ara caca. Om ta joc xim ac cacain ta.