1 Timóteo 4 - Tradução Bíblica Pacaas Novos

Co om pijim' xo' nanain capijacon Iri' Jam

¹ Tomi' xo' ca' napari' Tamataracon Iri' Jam: Wixicam pin iri tara xec nein ca in qui' ta' nucun Cristo Jeju ma' ne, ma' ac caca tara oro wari' co an to pin nanain capijacon Iri' Jam ca pijim' iri' ca'. Howa howa om pin tatarain. Howa pin ac cacain tara ca pijim' nucucun oro wari' co taraju wet e' nonon oro caxicon jam co mixein nana ma'. Ac i ma' na ca tomi' capari' Tamataracon Iri' Jam. Tomi' xo' napari' pain.

² Mixein nana co pijim' ac i ma' nana ta. Ac ca iri'o' xi' ca' tara me nana. Om ca ha' mami' cacain Tamataracon Iri' Jam pain ca caracat hwe nonon ma'. Xi querec pin' mami' cacain ca mixein wa ta. Iri'o' tara ma' nanain. Om pin na ximicocon.

³ Pijim' ca' nana: Ta cut hwem narima' nanapari' pain ca tarama' nexi' ca', ta cut hun tarama' nanam pain ca narima' nequequem ma' quem nana. Ma' na carawa ca tomi' caho' capari' Iri' Jam ma', ta cao' hwein me ta napari' ma' nana. Cain' cain' xirara quem? Tomi' ma' mi' ara xi' napari' pain oro carawa Iri' Jam. Ma' ta cao' hwein ta napari'. Wari' pain ca howa xun Cristo ca', taxi' irin capijacon ca iri'o'. Mi' napari' pain carawa ca cao' wa. Mo ta tomi' mam' xun pain ca tomi' querec te urut pum pain ca mi' maparut pain carawa ca cao' wa ca' Te Iri' Jam xut, hohot ac ne na pain ca cao' xin ta.

⁴ Xi awi ara ne oro carawa ca tomi' ma' pin ca Iri' Jam ta. Om ca na ne pain ca noc inain ta xin. Mo ta tomi' mam' xun pain ca tomi' querec te urut pum pain ca mi' maparut pain carawa ca cao' wa ca' Te Iri' Jam xun, hohot ac ne na pain ca cao' xin ta.

⁵ Xi to' hohot ara cain Iri' Jam ta. Win ne ca awi na ta cain oro carawa pain cara pane, pain ca xo' tomi' ma' pin qui' cain pane. To' hohot nain ca tomi' nexi' pain ca tomi' mam' xun ca', pain ca tomi' querec te urut pum pain ca mi' maparut pain carawa ca cao' wa ca' xun ca'.

Ca xut xo' ra pain ca ara main ca taramaja nem ta con Timóteo Paulo

⁶ Mo ta tomi' hwet main oro ca xirao' mi' xim ca', mo ta tomi' hwet momon pain xerexi' ma'. Mo ta to' hwara' opa xijem pain ca noro tamana main capijacon Iri' Jam ca iri'o' ca'. Mo ta to' hwara' opa xijem pain capijacon Iri' Jam ca pijim' iri' ca', ca wara howa ma ma', ara xo' ac main tara ca taramaja nem pain ca taramaja mi' mon Cristo Jeju.

⁷ Je ca tomi' xim ca': Ta taraju wet main oro ca pijim' ximama' wa ca om maqui' nain capijacon Iri' Jam me. Noc rain. Xi quep xiho' capari' ta. Tama' to' hwara' opa xijem pain ca xut xo' ma pain ca win xumu e' main ca param nucun Iri' Jam ta.

⁸ Quep xiho' paxi' napari' ca to' hwara' opa xijexi' pain cwerexi' ca'. Ane quep xiho' tamana pan capari' ca to' hwara' opa xijexi' pain ximixi' pain tamataraxi' ne, pain ca win xumu e' xin ca param nucun Iri' Jam. Quep xiho' napari' pain ca e' e' wet nexi' pain macan' ca', quep xiho' tarapari' pain ca e' cara xi' pain pawin cain quem. Je ca tomi' pe capari' ca'.

⁹ Iri'o' na ca tomi' ne ca'. Na e' na pain ca howa howa pi' pin xin ta.

¹⁰ Je ca taramaja tamana iri' ca'. Xi howa ara xun Iri' Jam co e' cara ma', co to' witan ton nonon oro wari' ma'. Iri' Jam ma', pain ca howa xun ca', param tamana napari' pain ca witan wa.

¹¹ Ca' na roron pain oro ca xirao' ne oro xerexi' ma'. Hu mip roron pain ca tomi' ha' jein ta momon ta.

¹² Xo' hwara' paxi' ma. Ane om na ne pain ca tomi' napat quequem co howa nana ma' ne. Om ca na ne pain ca tomi' napat quequem pain ca xo' hwara' nem ma'. Na e' na pain ca win ca ne quequem pain ca querec pin' quequem pain ca tomi' xo' nem ma', je pain ca xut xo' nem ma' quem. Na e' na pain ca win ca ne quequem pain ca om noc momon oro wari', je pain ca howa mon Iri' Jam ma', je pain ca miri'om main oro ca caracat wa ma' quem.

¹³ Noro mi' roron pain ca xirao' pe xine capijacon Iri' Jam pain ca cut in xujuhu' ma'. Hu mi' roron pain, ca' na xo' roron pain, ma' ta taraju pa' cacain. Aram aram hwet ac xim tara pain ca pe ma ma'.

¹⁴ Ta miri'om main ca taramaja nem ca mi' quem Tamataracon Iri' Jam pain ca quep qui' quequem pain winam xerexi' co querec wet nonon co howa nana pane. Quep iri nenem pain winam ne, wara tomi' pe ac quequem na pain ca taramaja nem co pijim' nanain capijacon Iri' Jam pane.

¹⁵ Tama' ara cara rain ca taramaja nem ca xirao' mi' xim ca'. Win xumu rain. Ma' ta querec pin' quequem oro xerexi' pain ca taxi' taxi' tiquin' main ca pijim' wa pain ca ca' na wa capijacon Iri' Jam.

¹⁶ Ma' tara xumum me, ara xite xijem pain ca xut xo' ma ma', je pain ca pijim' main capijacon Iri' Jam ma'. Mo ta win xumu main ca taramaja nem ca ara ra xim ca', om ta xica' pe ma pain ca witan ma ma'. Witan tatara oro wari' co taraju nenem ma' quem.