1 Timóteo 3 - Tradução Bíblica Pacaas Novos

Wari' co querec wet nonon co howa nonon Jeju, wiricoco wari' co diácono nana quem

¹ Wari' co querec wet xitoton na nonon co howa nana ma', awi tamana na ca taramaja nucun ca param ca ma'. Iri'o' na ca tomi' ne ca'.

² Je ca tomi' xim ca': Wari' co querec wet nonon co howa nana ma', om ca na camain' ne pain ca hwet ne wixicon pain ca caracat wa. Xica' pe tara manacon. Ma' tara ximicon pain ca om ara e' cain ca param pan nucun. Coromicat xo' tara. Xut xo' tara. Tomi' querec te totoron oro wari' co hwet nonon pain xiricon. Ca' na taxi' totoron pain capijacon Iri' Jam co howa nana ma'.

³ Om ta toc tamanain pe cain caji tocwa ca mana'. Om ta to' xitoton na cocon co tomi' taparam' nonon ma'. Ara xite e' totoron oro wari'. Om ta tomi' mana' ximao cocon quem. Om ta tama' param cain dinheiro.

⁴ Querec wet xo' taxi' tataram mana panxica cam jicacam mana panxica. Hu taxi' tataram quem. Ma' ta tomi' ha' pan cocon. Ma' pan tara ximicacam, om ta tomi' ximama' cacama.

⁵ Mo ta om querec wet xo' taxi' cacam mana panxica cam jicacam mana panxica ma', cain' xi querec wet xo' taxi' ac cacam co howa nonon Iri' Jam quem?

⁶ Om ca na ne pain ca querec wet ca wari' co xo' howa non Jeju quem. Mo ta querec wet ca wari' co xo' howa ma', am xec xec ta' ca, am tomi' mi' ton con pain ca wap wa Iri' Jam quem. Win ca Caxicon Jam pain ca tomi' mi' qui' tocwa pain ca wap wa pain ca xec xec nucun pain cara pane.

⁷ I ca' quem, wari' co querec wet nonon co howa nana ma', na e' na pain ca querec pin' tocwa pain ca xut xo' nucun. Na e' na pain ca awi na co ma' awi na co ma' ta cocon oro wari' co om howa nonon Jeju. Ma' ta om tomi' napat tocwa, ma' ta om tomi' querec pan con pain ca caracat wa Caxicon Jam ma', ma' ta om pan' mao ca con quem.

⁸ Ac i ma' tatara oro diácono co quep xiho' nonon co howa nana ma' quem. Na e' na pain ca querec pin' tococwa pain ca xuruxut xo' nucucun. Om ta tomi' capijacocon e' caca. Om ta toc tamanain to cacain comi uva ca mana'. Om ta tama' param cacain dinheiro.

⁹ Howa iri'o' tatarain capijacon Iri' Jam ca an hwet mi' capari' ca'. Om ta tara ta'a camain' cacain. Na e' na pain ca xuruxut xo' caca pain ca tomi' ha' iri'o' cacain quem.

¹⁰ Na e' na pain ca querec pin' cain' tococwa pain ca xuruxut xo' nucucun. Mo ta om mam' xine carawa ca to' i'ina nonon, hohot ac ne tara pain ca ara cacain ca taramaja nucucun oro diácono.

¹¹ Ac i ma' tatara ca narima' nequequem quem. Na e' na pain ca querec pin' tacacama pain ca xuruxut xo' nequequem. Om ta tomi' em' cacam oro win narima' cacama. Ma' tara ximicacam pain ca om ara e' cacamain ca param pan nequequem. Om ta mixein camain' cacama.

¹² Wari' co diácono ma', xica' pe tara manacon. Querec wet xo' taxi' tataram mana panxica cam jicacam mana panxica. Hu xo' taxi' tataram quem.

¹³ Oro diácono co ara xo' nanain ca taramaja nucucun ma', querec pin' ac tococwa tara pain ca querec pin' tococwa pain ca taramaja xo' nucucun. Ha' ac cocon tara pain ca om tomi' hwet jin' cacain ca howa nucucun pain ca howa cocon Cristo Jeju quem.

^14-15 Hwet ho' xim paxi' inem. Tara pata' ta'a, am om om ta'. Om ca taxi' xije. Je ca xirao' mi' xim pain carta pain xocori ca'. Ma' ta wara taxi' main ca param mi' capari' Cotere' Iri' Jam co e' cara ma'. Xuruxut xo' je napari' pain ca mana panxita' capari' ca'. Ca xuruxut xo' nexi' ca', pain ca cut in xijexi' pain ca howa xun ca', je ca mam' to' hwara' opa xin capijacon Iri' Jam ca iri'o'.

¹⁶ Iri' Jam ma', om ca an hwet querec cain ca coromicat an pe xo' nucun ca howa iri' con Cristo Jeju pane. Pain xocori ca' iri na ne, an hwet mi' napari' con. Ca' napari' con: Wari' pin na Cristo. An hwet mi' napari' pain ca awi nucun Tamataracon Iri' Jam. Querec nonon oro jam co taramaja mi' nonon Cote ca. Pijim' hwet ac tocwa na cocon oro wari' co om judeu nana. Mija nana oro wari' co howa nonon pain oro xijein macan'. Piri' in hwet ac con na Cote ca pain pawin. Ac i ma' na tamara' ca com mi' xun ca'.