1 Timóteo 2 - Tradução Bíblica Pacaas Novos

Ca hu tococwa pain ca in ac cocon Iri' Jam

¹ Tomi' mip inem pain i ca' quem: Hu iri roron co howa nana pain ca cut in xujuhu' ma' ne, na e' na pain ca tomi' cain' ca' momon: Tomi' mi' xuxun con Iri' Jam oro wari' ta roron. Quep xiho' roron, mi' roron pain oro carawa ca om nonon, ca' xun cocon. Tomi' querec te xun pain oro carawa ca ara mi' capari', ac i ma' tara ca hu momon ta.

² Tomi' mi' xuxun con Iri' Jam oro taramaxicon cocon oro xucucun wari' co querec wet nanapari' quem. Ma' ta om to' i'ina capari' oro ca to ho' xijexi' ca'. Na ac capari' tara pain ca xuruxut xo' iri' pain ca ara xin oro carawa ca hohot non Iri' Jam, ac i ma' tara ca hu momon ma'.

³ Awi na pain ca tomi' ac i ma' xun Iri' Jam co to' witan napari'. Hohot non ta.

⁴ Param param xam' napari' pain ca witan wa Iri' Jam, wiricoco oro wari' pain oro xijein macan' ma' quem, param param xam' napari' pain ca witan wa. Param napari' pain ca taraju pa' xin capijacon ca iri'o'.

⁵ Xi ma' xica' pe ara ca Iri' Jam ta. Ma' xica' pe na co to' wixicam pin napari' con, pain ca to' hohot capari' con. Wirico Cristo Jeju co wari' pin ma', wirico co to' wixicam napari' con.

⁶ Om ca narain ho' xucun pari'. To' pa' pin ma' tatarapa' ne na pane. Ma' ta to' witan ca' toton pain ca caracat nucucun ta napari'. Maqui' iri na xec nein ca wara coromicat an pe xo' ca Cote ca pane ne, je i ma' xec nein ca to' querec pin' capari' pain ca to' witan xuhu' ta capari' ca'.

⁷ Je ca wari' ne capa' pain ca apóstolo ra capa' pane. Pijim' hwet mi' roron pain capija oro wari' co om judeu nana ta napa' pane. Je ca na e' ne pain ca pijim' hwet toton pain capijacon Iri' Jam. Na e' na pain ca ca' na toton pain capijacon ca iri'o' con Jeju ta. Om ca mixein ta', tomi' iri'o' ina ta.

⁸ Je ca tomi' toton co tomi' xun nonon Iri' Jam. Tomi' xun iri nonon pain oro ca cut in nucucun ma' ne, na e' na pain ca xumu xo' caca pain ca tomi' xun cocon ma'. Na e' na pain ca hohot cocon Iri' Jam ca xuruxut nucucun. Om ca na ne pain ca mana' caca pain ca tomi' cocon Iri' Jam. Om ca na ne pain ca tomi' caracan xucucun pain quem.

⁹ Tomi' inanam oro narima' pain ca ma' ne ximicacam quem. Om ta mam' xec xec cocon oro wom co to cacama ma'. Ma' tara ximicacam pain tenenequequem ma' quem. Om ta pan xic xirac cacamain. Om ta an warawa pan xequequem pain ouro, je pain oro wijimain pacun ca awi tamana ma' quem, ca pérola caca oro wari' ma'. Om ta mi' hwara' cacamain dinheiro pain ca cut cocon oro womicacam co to xi' cacama ma'.

¹⁰ Na e' na pain ca mam' to' awi e' xequequem pain oro carawa ca ara pan cacama pain ca quep xiho' cocon oro win ma' cacama ma'. Je ca hohot ne cacam oro narima' co howa urun Iri' Jam ta nana ma'.

¹¹ Na e' na pain ca tacana to cacama oro narima' pain ca ca' na tacacama pain capijacon Iri' Jam ta. Taraju e' tatara, tomi' ha' totoron co pijim' nana ma'.

¹² Oro narima' ma', om ca na ne pain ca ca' na pan cocon pain capijacon Iri' Jam tarama' pain ca cut in wa ma'. Om ca na ne pain ca taramaxicon to ho' cocon quem, om na. Tacana to e' tatara. Na e' na pain ca taraju e' cacama pain ca ca' na xine capijacon Iri' Jam.

¹³ Xi quep cain' ara con Adão Iri' Jam pane, pain ca quep qui' cacam pane ta. Quep cain' non Adão, quep ac cam pa'ao' na Eva.

¹⁴ Om ca Adão ca co tomi' mixein ca Caxicon Jam pane. Wiricam Eva co tomi' mixein wa pane. Tomi' mixein iri ta ne, caracat pan ac cama na pain ca ara camain carawa ca tomi' caho' cam Iri' Jam ira.

¹⁵ Ara ac i ma' paxi' na Eva pane, ane quep xiho' tam cacam oro narima' Iri' Jam ne. Ara xi' iri tatarain oro ca taramaja nequequem pain ca narima' cacama ma' ne, je pain ca wijima cacama ma', je pain ca querec wet cacam humaxicacam ma' quem, to' witan ca' ac tacacama tara pain ca tomi' mixein mami' cacam Caxicon Jam. Ane na e' ne pain ca howa cara cocon Iri' Jam ne. Na e' na pain ca tomi' querec te cara cacam oro win ma' cacama, je pain ca xuruxut xo' cara cacama pain ca ara cacamain oro ca hohot non Iri' Jam ma', je pain ca ma' ne ximicacam quem.