1 Timóteo 1 - Tradução Bíblica Pacaas Novos

¹ Paulo ina pain ca xirao' mi' xim ca'. Wari' nucun Cristo Jeju ina, xi om ne ca apóstolo ra ara capa' pain ca tomi' hwet roron pain capija oro wari' capa' pane. Iri' Jam ma', co to' witan napari' ma', wirico co apóstolo nucun Panxita' ra napa' ca'. Cristo Jeju ma', co howa iri' pain ca winim' xun ca', pain ca aram aram in qui' ta' ca ma', wirico co mi' napa' pain ca taramaja ne ca'.

² Wata' co xirao' mi' nem cwa' Timóteo. Tomi' querec te tamana inem. Ac ca iri' panxita' xim na, xi om ne ca howa ara ma pain ca tomi' hwet xim con Cristo Jeju pane ta. Param inon Cotere' Iri' Jam con Taramaxicon nexi' Cristo Jeju pain ca quep xiho' quequem pain ca mi' quequem pain ca param nucucun. Param inonon pain ca xiram pa' quequem, je pain ca mi' quequem pain ca om toron ne xumum quem.

Ca hu con cocon oro wari' co ca' na mixein nanain capijacon Iri' Jam

³ Wara tomi' inem pane, tomi' mip inem pain ca mao tain qui' tain Macedônia pane. Mon to wet rain Éfeso ta inem pane. Ma' ta hu mip momon pain ca pijim' maho' je ta momon co pijim' pan teretem nanain capijacon Iri' Jam ta inem pane.

⁴ Pijim' maho' jein oro ca pijim' ximama' wa ca pijim' caca oro hwanana ta roron inem cocon pane. Mam' pe wet ximama' maho' jein oro wixicocon quem roron ta inem cocon pane. Pain ca pijim' ximama' tococwa oro hwanana, je pain ca mam' pe wet ximama' xine oro wixicocon ma' quem, je ca maqui' ne ca mana' caracan ximama' wa. Oro ca pijim' ximama' nucucun ma', om ca to' querec pin' camain' capari' con Iri' Jam pain ca to' witan xim capari' ca'. Xica' pe na ca howa nexi' ca' con, je ca to' querec pin' capari' pain ca to' witan xim capari' ca'.

⁵ Je ca tomi' ac i ma' xim ca': Hu xo' roron co pijim' pan teretem nana ma'. Xumu xo' je, querec pin' jein carawa ca param mi' cuhu' Iri' Jam, howa iri'o' jein capijacon ca ca' na xihwe ta roron. Na ac ne tara pain ca om noc xucucun, je pain ca om noc cocon Iri' Jam quem.

⁶ Co pijim' pan teretem nana ma', an to pin nanain ca xumu xo' wa, an to pin nanain oro carawa ca awi ma', ca taxi' caca pain ca hohot con Iri' Jam. An to pin nanain ca howa iri'o' wa. Param e' nanain ca tomi' ximama' wa.

⁷ Tomi' ca' nana: Hu e' xuxun oro win ma' nexi' cwa'. Ca' na e' xuxun pain oro ca tomi' nucun Iri' Jam ca tomi' ha' je tococwa oro wari' con Moisés pane. Xi taraju pa' pan cacain ta. Warut co taxi' ta paxi' nana. Ane om taraju pa' camain' cacain oro ca tomi' nucun Iri' Jam ca tomi' ha' je tococwa ma' ne.

⁸ Oro ca tomi' nucun Iri' Jam ca tomi' ha' je capari' ca', mo ta taraju pa' xo' xin ca coromicat nucun pain ca hu capari' pain, awi na. Awi na oro ca tomi' nucun, taxi' iri'.

⁹ Taxi' irin i ca' quem: Pain ca hu cocon oro wari' Iri' Jam ma', pain ca tomi' ha' je cocon ma', om ca em' hwe ta tococwa co xuruxut xo' nana, om na. Mo nana co em' hwe ta wawa ma': Co miri'om nanain oro ca tomi' nucun Iri' Jam. Co ari nonon. Co om howa nonon. Co caracat taxipa' nana. Co miri'om nanain oro caramaxicon Iri' Jam. Co om win xumu nanain oro ca param nucun quem. Co to' pa' pin nonon mana cote caca cacam waram jicocon. Co to' pa' pin nonon oro win ma' caca quem.

¹⁰ Co quep nanam oro xequem narima', wiricacam oro narima' co quep xut nonon oro xucun tarama' ma' quem. Co quep tarama' xucucun, wiricacam co quep narima' xequequem quem. Co cut mama' nonon oro wari' pain ca vender tiquin' xun cocon ma' quem. Co tomi' mixein taxipa' nana ma', wiricoco co tomi' an pe mi' mixein nanain ca tomi' nucucun pain ca ara xin cacain ma' quem. Oro wari' co ari nanain oro capijacon Iri' Jam ca pijim' iri' ca' quem. Oro wari' co ara ac i ma' nana ma', wiricoco co em' hwe ta wawa pain ca om tomi' ha' cacain oro ca tomi' nucun Iri' Jam ca tomi' ha' je capari' ca'.

¹¹ Ca pijim' nexi' ca', maqui' nain capijacon Iri' Jam con Jeju cwa', pain ca to' witan xim capari' ca'. Iri' Jam ma', co in ac iri' cwa', co awi tamana cwa', wirico co an hwet mi' napari' pain ca pijim' nexi'. Pijim' rain ta napa' quem.

Ca querec te inon Iri' Jam pain ca xiram pa' capa' ta ca Paulo

¹² Tomi' querec te inon Jeju Cristo co Taramaxicon ne iri' cwa', pain ca quep xiho' capa' pain ca taramaja ne ca'. Tomi' querec te inon pain ca querec pin' capa' pain ca om taramaja nene ta' ca' quem. Je ca taramaja mi' ne ta capa' ca'.

¹³ Tomi' xirac paxi' inon pain cara pane. Ja' tiquin' inonon oro wari' co howa nonon pane. Quep em' tamana inonon pane quem, ac i ma' paxi' ina pain cara pane. Ane xiram pa' capa' Cristo Jeju ne. Om paxi' napa' xumu pane. Hohot tara ma' inain ca quep em' toton pane. Xi howa ton Jeju pain ca Panxica Iri' Jam ca pane ta.

¹⁴ Om xi xiram pa' capa' Taramaxicon nexi' Cristo Jeju pane, xi iri' wari' ta' ta. Ane xiram pa' tamana pan capa' ne. Mi' e' napa' pain ca howa ton. Mi' e' napa' pain ca om noc ton, je pain ca om noc toton oro wari' co howa nonon ma' quem.

¹⁵ Maqui' iri nain macan' Cristo Jeju pane ne, to' witan toton oro caracat ta ac ca na. Iri'o' na ca tomi' ne ca'. Na e' na pain ca howa howa pi' pin xin ca tomi' ne ca'. Wata' co iri' caracat ta. Om na xucun wari' co an xiho' napa' pain ca caracat ne ta.

¹⁶ Caracat ac i ma' paxi' ina pane. Ane xiram pa' pan capa' Cristo Jeju ne. Ma' ta querec pin' cacapa' oro wari' pain ca an hwet mi' toton pain ca tomi' pan hot tamana ne ca', je pain ca winim' toton pain ca howa cacapa' ta nonon. Tomi' pan hot tamana ara xi' napa' pain ca winim' capa' pain ca howa ton pane quem. Tomi' ca' nonon oro wari' co howa xun nonon pa'ao': Win ton Paulo pane nonon. Caracat tiquin' ca' paxi' nuhu' pane, ane tomi' pan hot tamana ton pain ca winim' ton pain ca howa xim capa' pane nonon.

¹⁷ Je ca na e' ne pain ca tomi' querec te tamana cara xun Iri' Jam ta. Xica' pe na Iri' Jam co taramaxicon cara. Om ca mi' pin ra ha' ca. Om ca querec tocwa quem. Na e' na pain ca in ac cara xun ta. Na e' na pain ca querec pin' cara xun pain ca awi tamana nucun ta. Amém, iri'o' na ca tomi' ne ta.

¹⁸ Ac ca panxita' xim na Timóteo, je ca tomi' xim pain ca hu xim ca' pain ca xirao' mi' xim ca' arain. Win ne ca wara tomi' pe quequem xerexi' co pijim' nanain capijacon Iri' Jam pane, pain ca tomi' xo' quequem pain ca taramaja nem pane. Tama' mam' pe wet rain ca tomi' quequem pane. Ma' ta ara xo' main ca taramaja nem. Ma' ta hwara' opa ma pain ca tomi' in pin momon co pijim' pan teretem nanain capijacon Iri' Jam ma'.

¹⁹ Howa cara rain capijacon Iri' Jam ca iri'o'. Ara e' rain oro ca awi wa ma', ca taxi' ma pain ca hohot con Iri' Jam ma'. Ma' ara xi' nana co an to pin nanain ca param nucun Iri' Jam. Taxi' paxi' xucucun pain ca om hohot con Iri' Jam oro ca ara caca ma'. Ane opain pin ne ximicocon ne. Je ca an to pin cacain ca howa wa.

²⁰ Ma' nana oro win ma' caca ma', Himeneu con Alexandre ma', an to pin nanain ca howa wa. Je ca an to mi' toton con Caxicon Jam ma'. Ma' ta quep xirac tococwa, ma' ta wap tococwa, ma' ta ma' pin ne ximicocon, ma' ta tomi' napat tomi' napat om pin cocon Iri' Jam pain ca pijim' pan teretem nucucun ta inonon.