1 Tessalonicenses 5 - Tradução Bíblica Pacaas Novos

Ca winim' xo' jun Taramaxicon nexi' pain ca in qui' ta' nucun cocon Paulo

¹ Hohot paxi' na pain ca om xirao' mi' mami' urut pahu' pain i ca' quem xere, pain xec nein ca in qui' ta' nucun Taramaxicon nexi' ca',

² xi wara taxi' pin ara hun pain ca ane ane maqui' ta' nucun ta. Ac pain ca ane ane maqui' towa ca wari' co an noc xa tain nain carawa ma' tara pain ca om winim' tocwa ma', ac i ma' tara ca ane ane maqui' ta' nucun Taramaxicon nexi'. Om ta maqui' hap ca ma' totoron oro wari' co om howa nana ma'.

³ Maqui' ta' iri tara xec nucun ne, ca' ac ne tara ca coromicat nucucun: Om na xin carawa ca to' i'ina napari' ne? Om na wari' co mana' nanapari', hohot tamana napari' oro carawa, ac i ma' tara ca coromicat ximama' caca ma'. Ame hwe e', ane ane maqui' pa' ac cocon tara ca jain jain tamana wa pain ca wap xun tococwa. Win ne ca ane ane caxi cama narima' pain ca pan' ta' ca cawinacam ma', ac i ma' tara ca ane ane maqui' pa' cocon ca jain jain wa. Om ta witan ca' camain' cacain ta.

⁴ Je ca tomi' urut pahu' ca' xere. Wahu' iri na ne, om ca an xiho' huhun oro wari' co om taraju pa' nana ma', co ac ca to cacain na ca jitacat nein xim nana ma'. Om ta jaxicao' cuhu' xec nein ca in qui' ta' ca Taramaxicon nexi'. Noro jein ca jaxicao' tocwa waximain xirim con caxicon wari' co an noc xa tain nain caramaxicon ma', om ta jaxicao' ac i ma' cuhu' ca maqui' nucun Taramaxicon nexi'.

⁵ Wahu' pain ca howa hun Taramaxicon nexi' ma', xuruxut xo' xuruxut xo' pi' pin hwe, ara xo' ara xo' pi' pin hwe. Ac ca to hwein na naran nucun Iri' Jam ma', ac wari' nein xec hwe. Om ca an xiho' xun wari' co pan tem ma', co ac ca xut cain na ca jitacat nein xim.

⁶ Je ca tomi' urut pahu' ca': Ma' tara ximixi' me. Om ta ara e' xin ca param pan nexi'. Om ta an xiho' xuxun oro wari' co om howa nana ma', co ac ca pi'am caca na pain ca om querec pin' cacain carawa ca maqui' pa' cocon ma'.

⁷ Xi ma' ne ximicocon oro wari' co om querec nana ma', co ac ca pi'am caca na. Ac ca pi'am towa caca na pain xim. Oro wari' co ara e' nanain ca param pan nucucun ma', pain ca toc tamanain to cacain comi uva ca mana' ma', ac ca toc tamanain to cacain na pain xim ma'. Om ca querec pin' cacain carawa ca maqui' pa' toton nonon.

⁸ Wari' iri na ne, pain ca wari' nein xec iri' ca', na e' na pain ca ma' ne ximixi'. Noro jun soldado pain ca pe cain arain too ca tac caho' nain quimacon je waracon ma', pain ca narain ho' xije cocon oro co to' i'ina nanapa' ta ca ma'. Ac i ma' xi' pain ca narain ho' xijexi' con Caxicon Jam ma', pain ca howa cara xun Iri' Jam, je pain ca tomi' querec te caracan xijexi' quem. Noro jun soldado pain ca pe cain caji waji' ca mam' quep caho' cain winacon ma' quem. Ac i ma' xi' pain ca coromicat nexi' quem, pain ca howa cara xun Taramaxicon nexi' pain ca to' witan toton capari' ma' quem.

⁹ Xi mana' capari' Iri' Jam ta. Om ca mama' jein xe capari' pain ca xo' howa xine capari' pane, om na. To' witan xuhu', xi om ne ca howa ara hun Panxita' pain ca mi' pin caho' cuhu' ta napari' con Taramaxicon nexi' Jeju Cristo.

¹⁰ Mi' pin caho' napari' Taramaxicon nexi' Jeju Cristo. Ma' ta to ho' cara cacapa' ta napari' pain ca win cwere xun ca'. Mo ta e' e' wet iri' pain ca aram aram in qui' tain cain macan' ca', mo ta wara cono' iri' quem, to ho' cara ac xun tara pain ca win cwere xun ta.

¹¹ Je ca tomi' urut pahu' ca': Wara tomi' toto xujuhu' pain ca hu caracan xujuhu' pane, wara to' hwara' opa xujuhu' pain ca quep xiho' xujuhu' pane quem. Ara cara jein quem.

Ca hu mam' tococwa pain ca win pi' pin ta' ne ca xirao' nucucun

¹² Tomi' ho' xim urut pahu' pain i ca' quem xere: Querec pin' jujun co taramaja tamana nana pain ca querec wet cucuhu' ma', pain ca tomi' xo' cucuhu' con Taramaxicon nexi' ma', je pain ca hu cucuhu' pain capijacon ma'.

¹³ Tomi' querec te jujun pain ca querec pin' huhun pain ca taramaja nucucun ma'. An hwet mi' jujun pain ca om noc huhun quem. Xi ma' ara ne ca taramaja nucucun pain ca quep xiho' cucuhu' ma'. Tomi' querec te xujuhu' pain ca to ho' xujuhu' ma' quem.

¹⁴ Hu ca' urut pahu' pain i ca' quem xere: Tomi' jujun co jam' curucucun ma', co noc nanain ca taramaja wa ma'. Tomi' toto jujun co naro curucucun pain ca tomi' xaxa' nucucun ma'. Quep xiho' jujun co om hwara' opa nana pain ca howa nucucun ma'. Tomi' pan hot tomi' pan hot xam' jujun oro wari' ma' quem.

¹⁵ Ma' tara xumuhu' con wari' co quep xiram nuhu' ma'. Ta win mapa' ne hun me. Xiram pa' pan e' xujuhu' pain ca ara mi' xujuhu' pain ca awi wa me. Tama' xiram pa' xujuhu' pain ca xere xujuhu' ma', tama' xiram pa' jujun oro wari' ma' quem.

¹⁶ Tama' querec te je me.

¹⁷ Tama' tomi' jun Iri' Jam quem. Ta an pe camain' hwein me.

¹⁸ Tomi' querec te jun pain oro ca ara nuhu' ma' quem. Mo ta hohot cuhu' oro carawa ma', mo ta om hohot cuhu' ma' quem, je je ari na. Tomi' querec te jun pain Iri' Jam. Je ca param mi' cuhu' ma', pain ca win cwere hun Cristo Jeju ma'.

¹⁹ Ta tomi' am pin hwein Tamataracon Iri' Jam pain ca meo cuhu' pain xumuhu' me.

²⁰ Ta tomi' napat hwein ca pijim' nucucun oro win ma' hwe me, pain ca tomi' hwet rain capijacon Iri' Jam napa' Tamataracon ta caca ma'.

²¹ Ta tomi' napat hwein ca pijim' nucucun me. Na e' na pain ca coromicat xo' hwe pain ca tomi' querec xujuhu' pain oro ca pijim' wa ma'. Am an xiho' nein iri' capijacon Iri' Jam ca wara pijim' xihwe ma', am om an xiho' nein. Mo ta querec pin' hwein pain ca maqui' con Iri' Jam ma', awi na ta ac hwein tara, howa ac hwein tara ta.

²² Tomi' in pin tomi' in pin pi' pin jein oro ca pijim' wa ca pan tem ma', ca om maqui' non Iri' Jam ma'. Miri'om jein ta.

²³ Tomi' mi' urut pahu' con Iri' Jam co mi' napari' pain ca om toron ne ximixi' ca'. Tomi' ca' urut con pahu': To' hohot mip roron pain oro ca xuruxut nucucun pum ta urut con pahu'. Mi' roron pain ca win xumu quequem pain iri' ximicocon, je pain oro ca param nucucun quem urut con pahu'. Ma' ta om ma' camain' cuhu' ca ja' tomi' em' pan cuhu' pain ca caracat wa pain ca aram aram in qui' ta' ca Taramaxicon nexi' Jeju Cristo ta urut con pahu'.

²⁴ Iri' Jam ma', co hohot xine nuhu' ma', mi' turuhu' pain ca hohot mip hun quem. Xi mixein taxi' capari' ta. Tama' ara mi' napari' pain oro ca tomi' pe mi' capari' ta.

²⁵ Tomi' mi' xut con Iri' Jam me xere.

²⁶ An hwet mi' xujuhu' pain ca tomi' querec te xujuhu' pain ca xere xujuhu' quem.

²⁷ Wata' pain ca Paulo ta' ca', tomi' ca' inuhu' quem, xi ma' ara capari' Taramaxicon nexi' ta. Noro mi' noro mi' xam' xujuhu' pain ca xirao' nuxut ca'. Taraju taraju pi' pin tatara oro xerexi' ma' pahu'. Je ca tomi' xuhu' ca'.

²⁸ Param urut con Taramaxicon nexi' Jeju Cristo pain ca quep xiho' cuhu' ma', pain ca mi' cuhu' pain ca param nucun ma'. Je i ca' ca xirao' nuxut ca'.