1 Tessalonicenses 4 - Tradução Bíblica Pacaas Novos

Ca na e' ne pain ca xuruxut xo' hwe, ma' ta hohot hun Iri' Jam ta cocon Paulo

¹ Tomi' xun urut pahu' pain i ca' quem xere. Wara hu urut pahu' pain ca xuruxut xo' je, ma' ta hohot hun Iri' Jam ta urut pahu' pane. Querec pin' paxi' urut pahu' pain ca tomi' ha' maparut quem. Xuruxut xo' hwe ma' ira. Ane hu ca' urut pahu' pain xocori ca' ne. Win ne ca tomi' jujun caparut Taramaxicon nexi' Jeju cwa'. Xuruxut xo' cara je me urut pahu'. Win xumu win xumu tiquin' jein ca xuruxut xo' wa ta urut pahu'.

² Xi taxi' ara hwein ca pijim' mi' urut pahu' pain ca hu urut pahu' pane ta. Wirico Taramaxicon nexi' co pijim' ac i ma' jujun ta naparut pahu' pane.

³ Param nuhu' Iri' Jam pain ca xuruxut xo' hwe pain ca iri' wari' ne cuhu' ma', pain ca ara e' hwein oro ca hohot non ma'. Wahu' pain ca tarama' hwe ma', ta quep hwem xequem narima' me. Wahu' quem oro narima', quep e' turuhu' taxuhu' ta.

⁴ Tomi' tomi' xam' inuhu': Na e' na pain ca cut xo' hwem narima' ma', je pain ca cut xo' hun tarama' pain ca narima' nuhu' ma' quem. Ta caracat camain' hwe pain me.

⁵ Ta tomi' ha' camain' hwein ca param ximama' wa pain ca win xumu wa oro ca om awi wa me. Ac i ma' ara xi' nana oro wari' co om querec pin' nonon Iri' Jam ta.

⁶ Ta mam' ara cup xujuhu' pain ca param ximama' wa me. Ta mam' mixein camain' xujuhu' pain me. Ma' tara xumuhu' me. Taramaxicon nexi' ma', wap toton nonon oro wari' co quep nanam xequem narima'. Wap tatam nanam oro narima' co quep ne nonon xucun tarama' ma' quem. Wara tomi' ac i ma' urut pahu' pain ca hu mip urut pahu' pane ta.

⁷ Xi quep jem xequem narima' capari' pain ca xo' howa xine capari' pain ca tarama' nexi' Iri' Jam ta. Om ca quep ne jun xucun tarama' tacacama oro narima' ma' quem. Xuruxut xo' je, hohot xine pain ca wari' ne xuhu' ta capari' pain ca xo' howa xine capari' ma' ira.

⁸ Je ca tomi' urut pahu' ca': Mo ta tomi' in pin hwein ca xirao' mi' urut pahu' ca', om ca wari' ca co tomi' in pin hwe. Tomi' in pin hun Iri' Jam co mi' nuhu' pain Iri' Tamataracon ca ara awi e' ma'.

⁹ Xirao' mi' xun paxi' urut pahu' pain i ca' quem, pain ca om noc xujuhu' pain ca xere xujuhu' ma'. Ane hohot ne pain ca om xirao' mi' urut pahu' pain ne. Xi wara hu pan ara cuhu' pain Iri' Jam ta. Ta noc camain' xujuhu' me ta cuhu' ma' ira.

¹⁰ Xi wara tomi' ha' ara hun ta. Tomi' querec te tomi' querec te xam' huhun oro xerexi' co to nanain oro xijein xirim pain Macedônia ma' ira. Ac i ma' paxi' hwe. Ane hu mip xim urut pahu' pain i ca' ne xere: Tomi' querec te cara jujun me, iri' cote ne ac ne tara ca om noc huhun ta urut pahu'.

¹¹ Win xumu mip jein ca xuruxut xo' wa, ma' ta om to' i'ina cuhu' oro carawa pain ca to ho' xujuhu' ma'. Ta querec wet hwein oro ca ara nucucun oro win ma' hwe me, querec wet e' jein oro ca ara pan nuhu' ma', ma' ta ma' cuhu' oro carawa ca param hwe ma', pain ca cut xin hwein carawa ca cao' wa ma'. Win ne ca wara hu urut pahu' pane.

¹² Ma' ta querec pin' cucuhu' pain ca xuruxut xo' nuhu' oro wari' co om howa nana ma'. Ma' ta om mi' ne mi' ne huhun pain carawa oro wari' quem urut pahu'.

Ca in qui' ta' nucun Taramaxicon nexi'

¹³ Tomi' xo' xim urut pahu' cocon oro xerexi' co wara cono' nana quem xere. Taraju pa' je e'. Ma' ta om an xiho' huhun oro wari' co om coromicat xo' nana ma', co tara ta'a nana pain ca e' mami' xi' caca co wara cono' nana ma'.

¹⁴ Mi' pin na Jeju pane. E' mami' ac ca na quem. Je ca howa iri' ca'. Je ca howa xin i ca' quem: Iri' Jam ma', main to' e' mami' totoron oro xerexi' co wara cono' nana ma', co win cwere nonon Jeju pain ca howa cocon pane, ame hwe e'. To' e' mami' iri totoron ne, jao jao cut qui' ac cocon tara con Jeju pain ca aram aram maqui' tain cain macan' ca'.

¹⁵ Tomi' xim urut pahu' pain i ca' quem, xi wirico ara ca Taramaxicon nexi' co tomi' hwet nain pane: Wari' pain ca om cono' querec iri' ca', pain ca e' e' wet xi' iri' pain ca in qui' ta' nucun ca', om ta wara hwet cain' xun Taramaxicon nexi'. Om ta o pan xuxun co wara cono' nana ma'.

¹⁶ Wirico pan tara Taramaxicon nexi' co quiji' qui' tain nain pawin cain. Harahap je iri tarapari' ne, merem ac ca tara taramaxicon nucucun oro jam co taramaja mi' nonon ma', ca on on ac ne tara caji taracom nucun Iri' Jam ma'. E' mami' cain' ac caca tara oro xerexi' co wara cono' nana pane, co howa nonon Taramaxicon nexi' pain ca e' e' wet nucucun pane.

¹⁷ Wari' pain ca e' e' wet nexi' ca' iri tara ne, cut hap ac capari' tara Iri' Jam. Cut wi ac capari' tara cocon oro xerexi' co wara e' mami' nana ma', hwet wi ac xun tara Taramaxicon nexi' pain tajain nanawin cain. To ho' cara ac xun tara Taramaxicon nexi' ta.

¹⁸ Je i ma'. Tomi' toto xujuhu' pain ca tomi' urut pahu' ca'. Tomi' xaxa' tomi' xaxa' om ac hwe tara ta.