1 Tessalonicenses 3 - Tradução Bíblica Pacaas Novos

^1-2 Coromicat tamana urut pahu' pane. Om ca quereme mami' ac urut pain ca coromicat nuxut quem. Je ca hwet roron urut con coxari' Timóteo pahu' pane. Mon to wet pan ac urut na pain Atenas. Wata', Silvano, ca' urut, mon to wet ac urut na pa'ao'. Timóteo ma', taramaja wi naparut pain ca taramaja mi' urut con Iri' Jam cwa', pain ca pijim' hwet urut pain capijacon ca tomi' hwet napari' con Cristo. Hwet roron urut con pahu'. Ma' ta to' hwara' opa momon pain ca howa nucucun urut con pahu'. Quep xiho' roron, ma' ta howa cara caca quem urut con pahu'.

³ Hwet roron, ma' ta om to' i'ina tococwa pain ca quep em' tococwa pain ca howa nucucun ta urut con pahu'. Wara taxi' ara xi' hwein ca coromicat an pe xo' nucun Iri' Jam pari', pain ca main quep em' tuturuhu' oro wari' pain ca howa mahu' ta capari' pane.

⁴ Pain ca to ho' to ho' wet urut pahu' pane, wara tomi' pe urut pahu' pain ca main quep em' xuxun cacapari' oro wari' pain ca howa nexi' ca' urut pahu' pane. Je ca ara napari' quem, taxi' hwein.

⁵ Toron tamana napa' xumu pahu', xi coromicat ara xuhu' pane ta. Am tomi' querec cocon Caxicon Jam ma', am joc camara' cocon ma', am taramaja ximama' iri' pain ca pijim' mi' xuxun pain capijacon Iri' Jam ma', ac i ma' na ca coromicat ne pahu' pain ca jain jain ta' pahu' pane. Je ca hwet roron ton Timóteo pahu' pane. Ma' ta taxi' toton pain ca howa nucucun ta inon pahu' pane.

⁶ Ac i ma' paxi' na ca toron tamana ne xumu pahu' pane. Ane in hwet caparut Timóteo ne. Xo' wa' qui' nain ca to hwe ma'. Tomi' hwet ac caparut na pahu': To wet nana. Howa howa wet nonon Cristo. Tomi' querec te nonon oro wari' quem, ac i ma' na ca tomi' hwet caparut pahu'. Mam' pe wet nunuhu' quem, querec xuxun na nunuhu' ta naparut pahu'. Je ca param urut quem, querec xuxun na urut pahu' ta.

⁷ Je ca tomi' querec te pin urut ca' pahu'. Ximin paxi' urut pain ca to' i'ina caparut oro carawa ca', je pain ca quep em' cacaparut oro wari' co noc nanaparut cwa'. Ane tomi' querec te pin urut pain ca tomi' hwet caparut Timóteo pahu' ne, pain ca hwara' opa nana pain ca howa cara cocon Iri' Jam ta caparut pahu'.

⁸ Wa' pin na xumuxut pahu', xi om ne ca hwara' opa ara hwe pain ca howa cara hun Taramaxicon nexi' Jeju ta.

⁹ Om ca ha' caparut pain ca tomi' hwet tomi' hwet pi' pin urut con Iri' Jam nexi' pain ca tomi' querec te nuxut ca' pahu', xi mija ara ne ca tomi' querec te urut con pahu' ta.

¹⁰ Tama' tomi' urut con pain xec je pain xim quem. Jain jain urut con, tomi' mip ca' urut con pain iri' xumuxut ca': Mi' xut pain ca querec mami' urut cocon pain iri' curucucun ta urut con pahu'. Mi' xut pain ca quep xiho' urut cocon pain capijam ca om taraju pa' querec caca ma', ma' ta hwara' opa cara caca pain ca howa nucucun ta urut con pahu'.

¹¹ Mi' xut pain ca hwet xo' urut cocon ta urut con pahu' quem, ac i ma' na ca tomi' urut con Cotere' Iri' Jam con Taramaxicon nexi' Jeju quem.

¹² Ca' na ca tomi' mi' urut pahu' con Taramaxicon nexi' quem: To' hwara' tiquin' to' hwara' tiquin' pin rain ca om noc xucucun je pain ca om noc cocon oro wari' ma' quem urut con pahu'. Win urut pain ca tomi' querec te tamana urut cocon ca' quem urut con pahu'.

¹³ Ac i ma' na ca tomi' mi' urut pahu' con. Ma' ta to' hwara' opa momon pain iri' ximicocon ma' urut con pahu'. Ma' ta hohot cocon Cotere' Iri' Jam, ma' ta om ma' camain' cocon carawa ca ja' tomi' em' cocon pain ca caracat wa pain ca aram aram coco' quima hwet xun cocon ma', pain ca in qui' tain main macan' ca', pain ca ja' ja' xim quequem oro wari' nem quem urut con pahu'.