1 Tessalonicenses 2 - Tradução Bíblica Pacaas Novos

Ca taramaja nucun Paulo pain Tessalônica

¹ Je ca tomi' urut pahu' ca' xere. Hwet iri urut pahu' pain ca pijim' mi' urut pahu' pain capijacon Iri' Jam pane ne, om ca hwet ximama' urut pahu', taxi' maparut. Xi howa cara ara hun Iri' Jam ta.

² Pain ca om hwet querec urut pahu' pain Tessalônica pane, wara quep em' paxi' nanaparut oro wari' co to nanain Filipos. Wara tomi' xirac paxi' nanaparut pane, taxi' maparut. Ane quep xiho' caparut Iri' Jam nexi' pain ca to' i'ina cacaparut oro win ma' nuhu' ne. To' quereme naparut pain ca pijim' mi' urut pahu' pain capijacon ca tomi' hwet napari' con Jeju.

³ Pijim' iri urut pahu' pain ca howa jun Iri' Jam urut pahu' pane ne, om ca tomi' ca' xujuxut: Hu mixein xuxun, ma' ta howa cacapari' ta urut pahu', om ca pijim' ac i ma' urut pahu'. Om ca mam' pijim' urut pahu' pain ca caracat wa. Om ca mixein urut pahu' quem, om na.

⁴ Pijim' mi' e' urut pain iri' capijacon Iri' Jam ca tomi' hwet napari' con Cristo Jeju. Win ne ca hohot hwe caparut Iri' Jam pane, pain ca pijim' jein capija ta caparut pane. Om ca tomi' ca' xujuxut cocon oro wari' pain ca pijim' mi' urut cocon pain capijacon Iri' Jam: Tomi' toto xuxun, ma' ta tomi' querec te cacapari', om ca tomi' ac i ma' xujuxut cocon. Pijim' xo' xuxun, ma' ta tomi' querec te pan capari' Iri' Jam co noro nain ximixi' ca', co taxi' napari' pain ca coromicat nexi' ca', ac i ma' xujuxut pain ca pijim' urut cocon oro wari' ma'.

⁵ Om ca tomi' ximama' urut pahu' pain ca awi hwe awi hwe urut pahu', ma' ta om noc maparut ta urut pahu' ca', taxi' maparut pain ca om tomi' ac i ma' urut pahu'. Om ca mixein urut pahu', ma' ta mi' maparut pain dinheiro nuhu' ta urut pahu' quem, taxi' naparut Iri' Jam pain ca om mixein urut pahu' quem.

⁶ Om ca in ac xut pain ca pijim' nuxut urut pahu', om ca in ac xut pain ca pijim' nuxut urut cocon oro xucucun wari' ma' quem.

⁷ Hohot paxi' xira pain ca in ac xut urut pahu' pain ca quep xiho' xut urut pahu' pane, xi om ne ca apóstolo ara urut pain ca pijim' jein capija caparut Cristo Jeju ta. Ane om ac i ma' urut pahu' pain ca to ho' urut pahu' pane ne. Tomi' pan hot e' urut pahu' pane. Win cama jicacam hwijima' pain ca tomi' pan hot cacam humaxicacam ma', ac i ma' urut pahu' pane.

⁸ Je ca hohot tamana caparut pain ca pijim' mi' urut pahu' pain capijacon Iri' Jam ca tomi' hwet napari' con Cristo Jeju pane. Xi tomi' querec te tamana ara urut pahu' ta. Hohot tamana naparut pain ca quep xiho' urut pahu' pane quem. Jain jain tamana urut pahu' pain ca quep xiho' xim urut pahu' pane. Xi querec te tamana ara urut pahu' pane ta.

⁹ Om ca mam' pe wet maparut pain ca taramaja tamana nuxut pain ca cut xin urut pain dinheiro ca mam' cut urut pain carawa ca cao' wa pane ra xere? Mam' pe wet maparut pain ma' ira. Jam' tamana urut pane. Ca taramaja urut, ca pijim' pijim' mi' ac urut pahu' na pain capijacon Iri' Jam con Jeju, ca taramaja taramaja urut, ca pijim' pijim' ac urut na pane. Pain xec je pain xim, taramaja tamana urut pane. Ma' ta om to' i'ina xuxun pain ca tama' xiram pa' xut xuxun ta urut pahu'.

¹⁰ Wahu' pain ca howa hwe ma', taxi' maparut pain ca xuruxut nuxut pain ca to ho' urut pahu' pane. Taxi' naparut Iri' Jam quem. Ara e' urut pain ca param nucun Iri' Jam pahu'. Xuruxut xo' urut, om ca hwet ne wuxuxut pain ca caracat wa pahu' quem.

¹¹ Taxi' maparut pain ca tomi' querec te tomi' querec te xam' urut pahu' pane quem. Win ca wari' co tomi' querec te tamana nanam mana panxica ma', ac i ma' na ca tomi' querec te tamana urut pahu' pane.

¹² Ac cote cacama hwijima' urut pahu' pain ca hu urut pahu' ma'. Tomi' toto urut pahu', hu urut pahu' pain ca xuruxut xo' je urut pahu' ma'. Win ne ca howa pin hun Iri' Jam co tora' nuhu' ma', pain ca taramaxicon pe ho' xim cuhu' ma', je pain ca jao jao ma' xine pain ca awi tamana ne cuhu' ma' urut pahu' pane.

¹³ Pijim' mi' iri urut pahu' pain capijacon Iri' Jam pane ne, querec pin' ac hwein na pain ca om maqui' nein ca coromicat nuxut. Om ca capijacon wari' ne hwein. Capijacon Iri' Jam ma' ira hwein. Je ca tama' tomi' querec te urut con pahu'. Iri'o' na quem, maqui' non Iri' Jam co meo cara nain xumuhu' pain ca howa hwein capijacon ma'.

¹⁴ Taxi' urut pahu' pain ca howa hwein capijacon quem xere. Xi hwara' opa cara hwe pain ca quep em' cucuhu' oro win ma' nuhu' ma'. Win caca oro xerexi' co cut in xucucun pain Judeia cain, co howa nonon Iri' Jam pain ca win cwere cocon Cristo Jeju cwain. Momon hwara' opa nana pain ca quep em' cocon oro taramaxicon nucucun oro judeu cwain. Carawa ca ara nuhu' pain ca quep em' cucuhu' oro win ma' nuhu' ma', je ca ara nonon pain ca quep em' cocon oro taramaxicon nucucun oro judeu quem.

¹⁵ Oro taramaxicon nucucun oro judeu pane, wiricoco co to' pa' pin nonon Taramaxicon nexi' Jeju pane. Wiricoco co to' parapa' pin nonon oro profeta pane quem. Wiricoco co quep em' nanaparut quem. Om ca hohot camain' cocon Iri' Jam. Noc noc xam' nonon oro wari' quem.

¹⁶ To' i'ina nanaparut pain ca pijim' mi' urut cocon pain capijacon Iri' Jam oro wari' co om judeu nana ma', pain ca to' witan xim nuhu' Iri' Jam ta urut cocon ma'. Je curucucun. Mija pin na ca caracat nucucun. Cote ne pin na cocon. Mana' tamana pin nonon Iri' Jam. Mama' jein cote ne xe ta toton nonon quem.

Ca in hwet mami' xut pahu' ta cocon

¹⁷ Je ca tomi' xut pahu' ca' xere. Paca' iri urut pahu' pain ca to' i'ina xim cacaparut oro win ma' nuhu' co ja' jein ca' nanaparut pahu' pane ne, tomi' xaxa' tamana ac urut na. Om paxi' na ca pain ne ca to pira ca' urut pahu' pane, ane mam' pe wet urut pahu' ne. Mija na ca coromicat urut pahu' pane. In hwet xuxun na urut pahu' pane. Querec mami' xixin curucucun na urut pahu' pane ta.

¹⁸ In hwet xuxun na urut pahu' pane. Wata' pain ca Paulo ta' ca', in hwet xitoton na paxi' inuhu' pane. Om ca xica' pe ne ca hwet toton xuhu'. Ma' 2 pin na ca in hwet toton paxi' xuhu' pane. Ane to' i'ina caparut Caxicon Jam ne.

¹⁹ Ma' co taxi' urut pain ca howa cara cocon Iri' Jam quem? Ma' co ja' tomi' querec te nanaparut quem? Ma' co tomi' hwet xun xut con Taramaxicon nexi' Jeju pain ca coco' quima hwet xun urut con pain ca aram aram in qui' tain cain macan' ca' quem? Om ca wahu' ne? Wahu' ne ma' ira! Mija tara ca tomi' querec te xut pahu' pain ca aram aram querec pin' cuhu' Taramaxicon nexi' pain ca howa cara nuhu' ta. Win ca wari' co tomi' querec te tamana ma', pain ca hwet cain' cain tawirinain wana pain ca maji jein xi' ca cocon oro win ma' ca ma', pain ca an cain carawa ca awi. Ac i ma' urut pahu'.

²⁰ Je ca tomi' urut pahu' ca'. Wahu' co tomi' hwet iri' pain ca tomi' querec te tamana urut pahu' ca'. Wahu' co ja' tomi' querec te pan nanaparut quem.