1 Tessalonicenses 1 - Tradução Bíblica Pacaas Novos

¹ Paulo ina pain ca xirao' mi' xuhu' ca'. Wata', wirico Silvano, wirico Timóteo, ca' urut pain ca xirao' mi' urut pahu' pain ca cut in xujuhu' pain Tessalônica ma', pain ca win cwere hun Cotere' Iri' Jam con Taramaxicon nexi' Jeju Cristo ma'. Param urut con Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param urut cocon pain ca mi' cucuhu' pain ca om toron ne xumuhu' quem.

Ca querec te urut con Iri' Jam pahu' ta cocon

² Tomi' iri urut con Iri' Jam ne, tomi' mi' ac urut pahu' con na. Tama' tomi' querec te tomi' querec te xam' urut pahu' con.

³ Tama' mam' pe wet urut pahu' pain ca taramaja nuhu' ma'. Taramaja mi' hun Iri' Jam, xi om ne ca howa ara hun ta. Jain jain huhun oro win ma' nuhu' pain ca quep xiho' xun huhun ma', xi noc camain' huhun ta. Quereme hwein oro ca to' i'ina cucuhu' ma' quem, xi om ne ca winim' ara hun Taramaxicon nexi' Jeju Cristo pain ca in qui' ta' nucun ma' quem. Je ca mam' pe wet urut ca', pain ca tomi' mi' urut pahu' con Cotere' Iri' Jam.

⁴ Om ca noc cuhu' Iri' Jam ta xere. Taxi' urut con pain ca tora' cuhu' pain ca wari' ne pin cuhu' ma'.

⁵ Xi pijim' mi' ara urut pahu' pain capijacon Iri' Jam ca tomi' hwet napari' pain ca to' witan xim capari' Cristo Jeju pane ta. Om ca capijacon wari' ne ca pijim' urut pahu' pane, om na. Quep xiho' naparut Tamataracon Iri' Jam pain ca pijim' hwara' opa urut pahu' pane. Iri'o' na ca pijim' nuxut pane quem, taxi' urut. Querec pin' maparut pain ca xuruxut nuxut pain ca to ho' urut pahu' pane quem, pain ca quep xiho' xim urut pahu' pane.

⁶ Taxi' urut pahu' pain ca tora' cuhu' Iri' Jam ma', xi xuruxut xo' ara hwe pain ca hohot hun ta. Win caca ne maparut, win ca ne hun Taramaxicon nexi' quem. Jain jain hwe pain oro carawa ca to' i'ina nuhu' ma', jain jain paxi' hwe pain, ane querec te pan hwe pain ca howa pin hwein capijacon Iri' Jam ne. Je Tamataracon Iri' Jam ca ja' tomi' querec te nuhu' ma'.

⁷ Je ca querec pin' cucuhu' co howa nonon Jeju ma', co to nanain oro xijein cidade pain Macedônia je pain Acaia ma'. Win caca ne nunuhu'.

⁸ Pijim' iri hwein capijacon Iri' Jam con Taramaxicon nexi' ne, pijim' mi' pijim' mi' tiquin' ac tococwa na oro wari' co to nanain Macedônia je Acaia. Om ca pijim' mi' e' tococwa co to nanain Macedônia je Acaia ma'. Taraju taraju pi' pin nana oro wari' co to nanain oro xijein macan' ma' quem. Taxi' taxi' pi' pin nunuhu' pain ca howa hun Iri' Jam quem. Tomi' hwet xuxun paxi' urut cocon pain ca howa nuhu' ma'. Ane wara taxi' cucuhu' ne. Wara taraju nunuhu' pain ca howa nuhu' ma'.

⁹ Hwet iri urut cocon pain macaracocon ne, wiricoco pan ac caca na co tomi' hwet nanaparut pahu'. Tomi' hwet nanaparut pain ca tomi' querec te hwein capijacon Iri' Jam pain ca xo' hwet urut pahu' pain cidade nuhu' pane. Tomi' hwet nanaparut pain ca howa howa om pin hwein caji pacun ca Iri' Jam xi' ma hwe pane ira. Tomi' hwet nanaparut pain ca howa pin hun Iri' Jam, je pain ca taramaja mi' hun Iri' Jam co e' cara ma', co iri'o' ma'.

¹⁰ Tomi' hwet nanaparut pain ca winim' hun Panxica ma', co to' e' mami' ca ma'. Winim' hun Jeju pain ca in qui' tain cain pawin. Wirico Jeju co to' witan ca' xim napari' con Cote ca co wap toton nonon oro caracat ma', pain ca mama' jein cote ne xe toton cocon ma'.