1 Coríntios 9 - Tradução Bíblica Pacaas Novos

Ca hohot ne pain ca pagar tocwa apóstolo pain ca taramaja nucun

¹ Om ca hohot ne pain ca ara tain oro ca om tomi' caho' capa' Iri' Jam ra? Hohot ne ca' ira. Om ca apóstolo ta' pain ca tomi' hwet roron pain capija oro wari' ta capa' Taramaxicon nexi' Jeju ra? Apóstolo ta' ca' ira. Om ca querec ton ra? Querec ton ca' ira. Om ca howa pin hwe pain ca pijim' hwet qui' xuhu' con Taramaxicon nexi' pane quem ra? Howa pin hwe ma' ira.

² Ma' paxi' tatara oro xucucun wari' co om howa nanapa' pain ca apóstolo ina ta toton ca'. Wahu' iri na ne, querec pin' pan mahu' pain ca apóstolo ta' ca', xi om ne ca howa pin ara hun Taramaxicon nexi' pata' ta.

³ Tomi' ximama' iri nanapa' oro wari' pain ca taramaja ne ca' ne, tomi' in pin ca' ac toton na:

⁴ Om ca hohot ne pain ca mi' maparut pain carawa ca cao' wa pain ca taramaja nuxut pain ca pijim' hwet urut pahu' pain capijacon Iri' Jam ra? Hohot ne ma' ira.

⁵ Cain' cain' ne cacam narima' nuxut co howa nana quem? Om ca hohot ne pain ca maji urut cacam pain ca pijim' mama' urut pain oro xijein xirim ra? Hohot ne ma' ira. Win caca oro xucucun apóstolo ma', win caca mana coxa' ca Taramaxicon nexi' Jeju ma' quem. Win ca Pedro ma' quem. Maji nanam manacocon, mi' ac tacacama na pain carawa ca cao' wa quem.

⁶ Cain' cain' ne ca coromicat nuhu' pata'? Cain' cain' ne ca coromicat nuhu' con Barnabé ma' quem? Om ca hohot ne pain ca mi' cacaparut pain dinheiro mam' cut urut pain carawa ca cao' wa pain ca taramaja mi' urut con Taramaxicon nexi' ra? Hohot ne ma' ira.

⁷ Je ca tomi' xuhu' ca'. Noro jujun oro soldado pain ca taramaja nucucun ma'. Pagar jein tata pain carawa ca cao' wa ra? Pagar jun tata con womicocon quem ra? Om na. Noro jun wari' co oin' nain xitot ma' quem. Paca' pin iri na caramajinain ne, om ca hohot ne pain ca cao' pan cain ra? Hohot na quem. Noro jun wari' co querec wet nain carawa nucun ma' quem. Om ca toc cain comi caraxi quem ra? Toc nain quem.

⁸ Om ca tomi' hwet tain capijacon wari' pain ca tomi' xuhu' ca'. Tomi' ac i ma' na capijacon Iri' Jam quem.

⁹ Xi xirao' pe ara ca Moisés pane. Ca' na con pane: Ta tucu pan hwein capijain boi pain ca xom nein tocwixi trigo pain ca horohot nein tocwi trigo me ta, ta narain ho' hwein pain ca cao' nein me ta. Ac i ma' na ca xirao' pe nucun Moisés pane. Cain' cain' xira quem? Je boi ca xiram pa' pan ca Iri' Jam ra? Om na, om paxi' na ca xiram pa' cain boi. Tomi' joc mam' mi' e' nain.

¹⁰ Para tomi' joc mam' mi' cain boi quem? Om ca tomi' mi' pan capari' pain ra? Tomi' mi' capari' pain ca wari' nexi' ca' ira. Win ca wari' co taramaja pe nain xitot ma'. Taramaja na, coromicat ac ca na: Om ta narain ho' cacapa' pain oro winain caramaji xitot ca', cao' tain quem na. Ac i ma' na boi pain ca xom nein tocwi trigo ma' quem. Xom tain, cao' ac tain tara ta na quem.

¹¹ Je ca tomi' xuhu' ca': Ac i ma' urut quem. Ac ca oin' urut pain xitot na pain xumuhu' pane, pain ca pijim' hwet urut pahu' pain capijacon Iri' Jam pane. Om ca hohot ne pain ca mi' maparut pain carawa ca cao' wa je oro carawa ca om naparut ca' quem ra? Hohot ne ma' ira.

¹² Om ca narain ho' huhun pain carawa oro xucucun apóstolo. Je xi om narain ho' qui' maparut pain quem? Ane om xiram pa' xut ta urut pahu' pane ne. Om ca tomi' camain' urut pahu', om ca param camain' urut pain caramajuhu' pane. Quereme urut pain oro ca ximin wa pane. Ma' ta om to' i'ina urut cocon oro wari' co howa xin nanain capijacon Iri' Jam con Cristo ta urut pane.

¹³ Om ca taxi' huhun oro sacerdote co taramaja to nanain xiricon Iri' Jam ra? Taxi' huhun ma' ira! Mi' ara xi' tata pain cwerein carawa ca cut qui' caca oro wari' ma', pain ca cut mi' xun cocon pain Iri' Jam. Ac i ma' nana oro sacerdote co taramaja to ho' nanain pana ca tom tain' pe xine carawa ma' quem. Mi' tata pain cwerein carawa ca cut qui' caca oro wari' ma' quem.

¹⁴ Tomi' ac i ma' na Taramaxicon nexi' pane: Oro wari' co taramaja nana pain ca pijim' hwet cacain capija pain ca to' witan toton ta' oro wari' ca', na e' na pain ca mi' tococwa pain carawa pain ca taramaja nucucun pain ca pijim' nucucun ta na pane.

¹⁵ Hohot paxi' xira pain ca quep xiho' pan mahu', ane om quep xiho' xine ta xuhu' pain cara pane ne. Om ca quep xiho' xine xuhu' pain ca xirao' mi' xuhu' pain xocori ca' quem, om na. Taramaja mi' e' inuhu', tomi' querec te tamana ina pain ca pijim' hwet e' xuhu' pain capijacon Iri' Jam ca'. Mo ta to' i'ina pin mahu' pain ca ac ca xin to ta' ne pain ca tomi' querec te ne ca', hohot ac capa' tara pain ca mi' pin wa ta.

¹⁶ Ane om na ne pain ca xin to ta' pain ca pijim' hwet tain capijacon Iri' Jam con Jeju ne. Na e' na pain ca pijim' hwet tain. Om ca miri'om ac tain, xi om ne ca pijim' rain ara capa' Cristo ta.

¹⁷ Mo xi pijim' pan ta' ta', mo xi maqui' nein xumu pain ca pijim' ta' ne ca', je i ma' xira ca cut qui' ta' carawa pain ca taramaja ne ta. Ane pijim' ra pan capa' Iri' Jam ne. Tora' napa', pijim' ra ta napa'. Na e' na pain ca pijim' tain capijacon Iri' Jam con Jeju ta.

¹⁸ Je ca tomi' xuhu' ca': Ma' paxi' na carawa ca awi ca mi' capa' Iri' Jam. Ma' carawa ca mi' capa' quem? Taraju wet je e', mi' napa' pain ca tomi' querec te wa pain ca pijim' mi' e' xuhu' pain capijacon con Jeju. Pijim' mi' e' inuhu' pain, om ca pagar xine pain xuhu'. Hohot paxi' xira pain ca pagar mahu', xi taramaja ara ta' pain ca pijim' xuhu' ta. Ane om tomi' xuhu' pain ca pagar xine ta xuhu' ne.

¹⁹ Om paxi' na xucun wari' co quep xat napa' pain ca taramaja mi' ne ta capa'. Ane taramaja mi' e' toton oro wari' ne, maqui' nain xumu ca', taramaja mi' e' toton ta ina. Ma' ta mija caca co howa nonon Cristo pata' ina.

²⁰ Je ca an xiho' toton oro win judeu ta' pain ca pe ho' toton ca', an xiho' inonon pain oro ca ara caca. Ma' ta howa cocon Cristo pata' inonon. Tomi' ha' taxipa' nanain ca xirao' nucun Moisés. Ac i ma' ina quem, pe ho' iri inonon ne, tomi' ha' ac tain na ca xirao' nucun Moisés. Om paxi' na ca tomi' ha' rain ta capa' Iri' Jam, ane tomi' ha' pan tain ne. Ma' ta howa cocon Cristo pata' inonon ta.

²¹ Ac i ma' ina pain ca pe ho' toton oro co om judeu nana pain ca om tomi' ha' cacain ca xirao' nucun Moisés quem. Pe ho' iri inonon ne, an xiho' ac toton na, miri'om ac tain na ca xirao' nucun Moisés. Ma' ta howa cocon Cristo pata' inonon. Taraju pa' jein i ca' quem: Pain ca miri'om tain ca xirao' nucun Moisés ma', om paxi' na ca miri'om pan ton Iri' Jam. Tomi' ha' cara ara xi' inain capijacon Cristo.

²² Pe ho' iri inonon co om hwara' opa nana pain ca howa nucucun ma' ne, pain ca om taraju pa' caca pain ca ein cacain carawa ma', om ca tomi' mana' toton pain ca om hwara' opa nucucun pain ca om taraju pa' nucucun. An xiho' e' inonon pain ca ein cacain carawa. Ma' ta hwara' opa pin caca pain ca howa nucucun ta inonon. Je cwere mao na cocon oro wari'. An xiho' an xiho' pi' pin inonon. Ma' ta ma' caca oro wari' co witan nana pata' ta ina.

²³ Je ca tomi' xuhu' ca': Ac i ma' ina pain ca pe ho' toton oro wari'. Ma' ta howa cacain capijacon Iri' Jam con Jeju ta ina. Ma' ta tomi' querec te wi xijexi' pain oro ca awi ca mi' xim capari' Iri' Jam ta inonon.

²⁴ Om ca taxi' huhun oro wari' co jein nana ma', pain ca jein hwet cacain tawiri wana ca coco' to xi' caca ra? Taxi' huhun ma' ira. Jein jein xam' paxi' nana, ane xica' pe ca co an nain carawa ca awi ne. Je ca tomi' xuhu' ca': An xiho' jun co hwet cain' nain tawiri wana pain ca mo mip nucun ma', ac ca jein mip hwe ma' tara pain ca win xumu hwein ca ara je cuhu' Iri' Jam. Ma' ta cut hwein carawa ca awi ca mi' xim cuhu' quem.

²⁵ Win caca oro wari' co jein xi' nana ma', tama' jein querec jein querec nana. Jein in ximama' nana, toin piri' nana, meo meo nanain taparacocon pain aracocon. Miri'om nanain ca param pan ne curucucun, ma' ta an xin carawa ca awi ta nana. Carawa ca an xi' caca ma', main pi' pin tara, main om pin tara. Ane to wet cara ne carawa ca an xi' iri' pain ca howa xun Jeju ne. Win xumu urun Iri' Jam, ma' ta an xin carawa ca awi ca om pi' ra ha' ta iri'.

²⁶ Je ca tomi' xuhu' ca': Win xumu inon Iri' Jam pain ca taramaja mi' ton ca'. Win ca wari' co mo xo' ma', co om mo ximao ma'. Om ca tomi' ximao ta' pain ca pijim' tain capijacon Iri' Jam ca'. An xiho' inonon oro wari' co to' xo' nana pain ca to' caracan xucucun pain caji pic pain micocon, co om to' nenene nana ma'. Ac ca to' iri'o' ta' na pain ca pijim' ne ca'.

²⁷ Ac ca to' xije na, miri'om inain ca param pan ne cwere ca'. Ma' ta mi' capa' pain carawa ca awi Iri' Jam ta ina. Cain' cain' xirapa' Iri' Jam quem? Wara pijim' paxi' inonon oro wari' cwa'. Nain ho' xirapa' pain carawa ca mi' xim capa' Iri' Jam ra? Noc inain i ma' ta. Je ca miri'om tain ca param pan ne cwere ca'.