1 Coríntios 8 - Tradução Bíblica Pacaas Novos

Cwerein carawa ca mi' xine oro caji pacun ca Iri' Jam xi' ma caca oro wari'

¹ Pain ca xirao' mi' mahu' pane, tomi' querec mahu' pain cwerein carawa ca mi' xine oro caji pacun ca Iri' Jam xi' ma caca oro wari' ma'. Tomi' xo' ho' xim inuhu' pain quem. Taxi' taxi' pi' pin paxi' irin oro caji pacun ca Iri' Jam xi' ma caca oro wari' ma', taxi' irin pain ca om hwara' opa nein. Taraju pa' je e': To' xec xec napari' ca taraju pa' nexi' ca'. Ane to' hwara' opa xijexi' pain ca om noc xijexi' ne.

² Wari' co coromicat ca' cwa': Wata' co taraju pa', wata' co taxi' ta tara, wirico co om taraju pa' querec nain ca taraju pa' ra con Iri' Jam. Wirico co om taxi' querec nain ca taxi' ra con quem.

³ Ane om ac i ma' ne con wari' co om noc non Iri' Jam ne. Om iri na ca noc con ne, querec pin' ac tocwa na, querec pin' pan non Iri' Jam. Taxi' na ta non.

⁴ Cain' cain' xixi' quem? In hwet xin ca tomi' querec nuhu' pane, pain ca cao' xixin ra qui' hwein cwerein carawa ca mi' xine oro caji pacun ma'. Taxi' irin oro caji pacun ca Iri' Jam xi' ma caca oro wari' ma'. Om ca e' ne, om ca Iri' Jam ne. Ma' xica' pe ara xi' na Iri' Jam.

⁵ Ma' nana oro wari' co tomi' ca' nana quem: Ma' nana oro xucucun iri' jam, to nanain pawin, to nanain macan' ta nana. Mija paxi' nana oro ca howa ximama' caca ma', ca Iri' Jam xi' ma caca ma', ca Taramaxicon nexi' xi' ma caca ma'.

⁶ Ane ma' xica' pe pan capari' Iri' Jam co Te iri' cwa' ne. Wirico co tomi' ma' tomi' ma' pi' pin nain oro carawa. Wirico co in ac iri', co win xumu iri'. Ma' xica' pe na Taramaxicon quem, wirico Jeju Cristo. Wirico co win tomi' ca Iri' Jam pain ca tomi' ma' tomi' ma' pi' pin cain oro carawa pain ca quep capari' ca' quem. Wirico co to' e' napari' quem.

⁷ Taraju pa' ac i ma' paxi' iri', ane om taraju pa' ac i ma' pi' pin caca oro wari' ne. Ma' nana co om coromicat xo' querec nana ma'. Wara howa nanain oro caji pacun ca Iri' Jam xi' ma caca pane, wara howa qui' nanain pain ca hwijima' nucucun pane. Pe pin nonon, e' tara ma' nanain pane. Pain xocori ca' iri na ne, pain ca cao' xin cacain cwerein carawa ca mi' xine caji pacun ma', i'ina pin ac ne na ximicocon. Quep naparut ca caracat wa, xi om ne ca cao' ara urut pain cwerein carawa ca mi' xine caji pacun ta nana pain ca coromicat pan teretem nucucun pain ca om taraju pa' querec nucucun.

⁸ Ane om to' hohot capari' con Iri' Jam carawa ca cao' iri' ne. Mo ta cao' irin carawa, mo ta om cao' irin, je i ma' ira, je je ari na con Iri' Jam ta.

⁹ Je je ari paxi' na con Iri' Jam, ane tomi' xuhu' pain i ca' ne. Ma' tara xumuhu' me. Hohot paxi' na pain ca cao' hwein cwerein carawa ca mi' xine caji pacun. Ane om na ne pain ca ja' camara' huhun oro xerexi' co om hwara' opa nana pain ca howa nucucun ne. Am i'ina ne ximicocon pain ca cao' hwein cwerein carawa ca mi' xine caji pacun ma'.

¹⁰ Om paxi' na ca i'ina ne xumuhu' pain. Tara cocon co win howa hwe co i'ina ne ximicocon ma' pain. Mo ta querec cucuhu' pain ca corom mama' hwein xirim ca pe torotop mi' querec te pe xine caji pacun ca Iri' Jam xi' ma caca ma', mo ta querec cucuhu' pain ca cao' to hwein ma'. Om ta win caca ne cucuhu' ra? Am cao' xin cacain carawa ca mi' xine oro caji pacun ma', caracat urut xi' ma ac caca tara pahu'.

¹¹ Ja' camara' pin ac huhun tara co win howa hwe co om taraju pa' nana ma', co mi' pin caho' ca Cristo ma'. Xi taraju pa' urut xi ma' ara hwe ta.

¹² Mo ta caracat ac i ma' hwe pain ca ara cup pin huhun co win howa hwe ma', co om hwara' opa nana pain ca howa nucucun ma', mo ta to' i'ina ac i ma' huhun pain ca coromicat nucucun ma' quem, to' ara pin ac hun na Cristo pain ca ari hun quem.

¹³ Je ca tomi' xuhu' ca': Mo ta cao' pan ta' carawa ma', mo ta mam' ja' caracat pin ton co win howa ta' pain ca cao' ne ca', om ta cao' camain' tain cwerein carawa. Ma' ta om ja' pan' pin ton ta inon.