1 Coríntios 7 - Tradução Bíblica Pacaas Novos

Ca an tacama narima', ca an tocwa tarama' quem

¹ Ma' na oro ca tomi' querec mahu' pain ca xirao' mi' mahu' pane. Tomi' xo' ho' xuhu' pain. Awi paxi' na ca om an tacama narima'.

² Ane mija ne ca quep ximama' caca oro wari' ne. Je ca na e' ne pain ca ma' ma' xam' cocon narima' oro tarama'. Na e' na pain ca ma' ma' xam' cacam tarama' oro narima' ma' quem.

³ Tarama' ma', om ca na ne pain ca nain ho' cam pain curucun manacon. Mi' taram pain, quep taram. Ac i ma' tara narima' ma' quem, om ca na ne pain ca nain ho' con pain cwerequem taxicam. Mi' toron pain.

⁴ Narima' ma', om ca mene camain cwerequem. Mene nain taxicam. Ac i ma' na tarama' ma' quem. Om ca mene cain curucun. Mene nain manacon.

⁵ Je ca tomi' xuhu' ca': Ta narain ho' xujuhu' pain me ta. Miri'om e' xujuhu' pain ca tomi' xo' cain' xujuhu' pain ca momon tomi' e' xun Iri' Jam ta hwe ma', mo ta tomi' ca' xujuhu': Om ta quep mami' xijexi' pain xocori ca'. Paric ca' e' tara xec nein ca om quep xijexi', ma' ta momon tomi' e' xun Iri' Jam ta je. Pi' pin iri tara oro xec nein ca tomi' hun Iri' Jam ne, in hwet ac xujuhu' tara, quep mami' ac xujuhu' tara quem. Ma' ta om tomi' querec cuhu' Caxicon Jam pain ca to' i'ina xujuhu' pain ca param nuhu' ma'.

⁶ Om paxi' na ca hu xuhu' pain ca cut jem narima' xuhu' ca', om na. Tomi' e' inuhu' pain ca hohot na pain ca cut hwem narima' ta xuhu' ca'.

⁷ Ane param xuhu' pain ca an xiho' mahu' pain ca xat e' ta' ca' ne. Tara pahu', mi' pan ara xi' napari' pain ca param nucun Iri' Jam ta. Co mi' wa pain ca xat e' wa ma', co mi' wa pain ca an wa narima' ma' quem, wirico Iri' Jam co mi' nain i ma' ta.

⁸ Tomi' ho' xuhu' pain ca coco' e' hwe ma' quem, wahu' pain ca cono' ca' cucuhu' oro manahu' ma' quem. Wahu' pain ca narima' hwe ma' quem, pain ca cono' ca' cucuhu' waram taxuhu' ma' quem, tomi' xim inuhu'. Awi paxi' na ca coco' e' cara hwe. Win ta' ca' paxi' inuhu'.

⁹ Ane tomi' ca' xim xuhu' ne: Mo ta om miri'om taxi' hwein ca toron ne xumuhu' pain ca param hwein ma', hohot ac ne na pain ca cut hwe narima'. Hohot na pain ca cut hwe tarama' pain ca narima' nuhu' ma' quem. Xi na ne pain ca toron ximama' ne xumuhu' pain ca param tamana hwein ta.

¹⁰ Tomi' ho' inuhu' pain ca wara cut hwe narima' ma' quem, wahu' quem oro narima', tomi' inuhu' pain ca wara cut hwe tarama' ma' quem. Om paxi' na ca tomi' pan xuhu'. Wirico Taramaxicon nexi' co tomi' nuhu'. Tomi' ca' nuhu' pain ca narima' nuhu' ma': Ta an to pin huhun waram taxuhu' me ta nuhu'.

¹¹ Ane tomi' xim xuhu' pain i ca' ne: Mo ta ma' cama narima' co wara an pe pin non taxicam ma', xat e' cara ac cama tara, om ca na ne pain ca an cama xucun tarama'. Mo ta in hwet ton wara taxi cama, in hwet ac con tara. Tomi' ca' nuhu' pain ca tarama' nuhu' ma' quem: Ta an to pin hwehwem oro manahu' me ta nuhu' quem.

¹² Tomi' ca' inonon oro xucucun ma' pahu', tomi' inon wari' co howa ma', co om howa manacon ma' quem. Wata' co tomi' non, xi wara tomi' xo' capari' pain Taramaxicon nexi' ta. Ca' inon wari' co howa non Jeju: Mo ta om howa cama manacon ma'. Om paxi' tara ca howa cama, ane hohot cam pain ca pe ho' cara con taxicam ne. Je i ma' ira tara taxicam, om ca na ne pain ca an pe pin cam.

¹³ Ac i ma' tara narima' co howa ma', co om howa taxicam ma' quem. Om paxi' tara ca howa ca, ane hohot con pain ca pe ho' cara cam manacon ne. Je i ma' ira tara manacon ma' quem, om ca na ne pain ca an pe pin con.

¹⁴ Xi quep xiho' ara con taxicam Iri' Jam ta, xi om ne ca howa pan ara cama manacon ta. Om paxi' na ca howa pan ca, ane jao jao ma' cam manacon co howa ma' ne. Ac i ma' nam narima' co om howa ma' quem. Quep xiho' nam Iri' Jam, xi om ne ca howa pan ara ca taxicam ta. Om paxi' na ca howa pan cama, ane jao jao ma' con taxicam co howa ma' ne. Mo xi om quep xiho' cacam, je i ma' xira ca om quep xiho' cacam mana panxicaca quem. Ane quep xiho' cocon pain ca jao jao ma' xequequem cote cacama cacam jicacam ne.

¹⁵ Mo ta an pe pin tam narima' ne ca tarama' co om howa ma', je i ma' ira ac con tara manacon. Om ca na ne pain ca cuc cuc con pain ca to wet ra to wet ra con ma'. An pe pin ac cam tara. Mo ta an pe pin ton taxi cama narima' co om howa ma' quem, je i ma' ira ac cam tara taxicam. Om ca na ne pain ca cuc cuc cam pain ca to wet ra to wet ra cam quem. An pe pin ac con tara quem. Param ara xi' napari' Iri' Jam pain ca xin ne xijexi', je pain ca om mana' xijexi' ta.

¹⁶ Wum quem narima' pain ca howa ma ma', om ca taxi' mon taxim ma' quem. Mo ta aram aram howa pin ca pum, mo ta om howa pin ca pum. Wum quem, pain ca tarama' ma ma', pain ca howa ma ma' quem, om ca taxi' mam narima' nem quem. Mo ta aram aram howa pin cama pum, mo ta om howa pin cama pum.

¹⁷ Je ca tomi' xuhu' ca', mo ta om cut querec hwem narima' pain ca xo' howa xine qui' cuhu' Iri' Jam pane, coco' e' cara ac hwe ma' tara. Mo ta wara ma' cuhu' narima', pe ho' cara ac hwem ma' tara. Ac i ma' tara pain oro ca ara je cuhu' pain ca xo' howa xine qui' cuhu' pane quem. Ara cara ac hwein ma' tara. Je ca tomi' toton oro co cut in xucucun pain ca howa cocon Jeju.

¹⁸ Wari' co wara wac xirac wa taparinain ca xirac nucun pain ca xo' howa ne qui' con Iri' Jam pane, je i ma' ira tara, om ta joc xim cain. Wari' co om wara wac xirac wa taparinain ca xirac nucun pain ca xo' howa ne qui' tocwa pane, je i ma' ira tara, hohot na pain ca om wac xirac tocwa quem.

¹⁹ Mo ta wac xirac tocwa, mo ta om wac xirac tocwa quem, je i ma' ira pan na Iri' Jam. Cain' cain' capari' quem? Taraju wet je e', na e' na pain ca tomi' ha' xin oro ca ara je capari' ca'.

²⁰ Je ca tomi' xuhu' ca': Oro ca ara nuhu' pain ca xo' howa xine qui' cuhu' Iri' Jam pane, na e' na pain ca ara cara ara cara xam' hwein ta.

²¹ Mo ta wara ma' cuhu' taramaxicon co taramaja mi' e' hwe ma', pain ca xo' howa xine qui' cuhu' Iri' Jam pane, om ac ne tara ca toron ne xumuhu', ta jein ca' xuxuxun na hwe me ta. Tara, mo ta aram aram tomi' cuhu' taramaxicon nuhu' ma', om pin xuhu', maho' jein ca taramaja mi' e' mahu' ta iri turuhu' ne, hohot ac ne tara pain ca maho' hwein quem.

²² Ta toron ne xumuhu' pain ca wara taramaja mi' e' hun taramaxicon nuhu' pain ca xo' howa xine qui' cuhu' Taramaxicon nexi' me. Taramaja mi' paxi' hun taramaxicon nuhu' ma', ane wara to' witan ca' cuhu' con Caxicon Jam Taramaxicon nexi' ne. Taramaxicon ne pin hun quem. Ac i ma' hwe pain ca om cuhu' taramaxicon co taramaja mi' e' hwe ma' quem. Om paxi' turuhu' taramaxicon, ane taramaja mi' e' hun Cristo ne.

²³ Wirico Cristo ara xi' na co mene nuhu' ma', xi om ne ca mam' to' witan ara cuhu' pain quicon ta. Je ta taramaja mi' e' hun ta. Om ta taramaja mi' e' huhun oro wari' ta.

²⁴ Je ca tomi' xuhu' ca' xere: Oro ca ara nuhu' pain ca xo' howa xine qui' cuhu' Iri' Jam pane, ara cara ac hwein ma' tara pain ca jao jao ma' hun ma'.

Ca tomi' tococwa co coco' e' nana ma', wiricacam oromon xojam' ma' quem

²⁵ Pain ca xirao' mi' mahu' pane, tomi' querec mahu' cocon oro wari' co om cut querec nana narima' ma', cacam oromon xojam' co om cut querec nana tarama' ma' quem. Tomi' xo' ho' xim inuhu' pain quem. Tomi' hwet pan xuhu' pain ca coromicat ne ca' pahu', xi wara tomi' xo' capa' pain Taramaxicon nexi' ta. Taraju wet xine, xi om ne ca xiram pa' ara capa' pain ca mi' capa' pain ca tomi' xo' wa ta.

²⁶ Je i ca' ca coromicat ne ca': Maqui' pin na oro xec nein ca to' i'ina xim capari' oro carawa. Je ca awi ne pain ca om cut xujuhu' pain xocori ca'. Coco' e' cara iri xi' ca' je.

²⁷ Mo ta ma' pin cuhu' narima', om ta an to pin hwehwem. Mo ta om cuhu' narima' ma', ta toron ne xumuhu' me.

²⁸ Wahu' pain ca cut xi' narima' hwe ma', om paxi' na ca caracat hwe pain. Wahu' quem oromon xojam' pain ca cut xi' tarama' hwe ma' quem, om paxi' na ca caracat hwe pain. Ane xiram pa' xuhu' pain ca ximin xi' hwe pain oro carawa ca to' i'ina xim nuhu' pain ca cut xujuhu' ma' ne. Narain ho' xim paxi' inuhu' pain.

²⁹ Je ca tomi' xuhu' ca' xere: In qui' ta' tara Cristo. Om ta pain homa ne ca in qui' ta' nucun. Je ca na e' ne pain ca win xumu xin ca taramaja nexi' pain ca taramaja mi' xun ca'. Win xumu jein, mao ac ne ma' tara pahu'. Tarama' co ma' non narima' ma', ac ca om con tara, win xumu e' tarain ca taramaja nucun pain ca taramaja mi' con Cristo. Ac i ma' tara narima' co ma' nam tarama' ma' quem, ac ca om cam tara, win xumu e' tarain ca taramaja nequem pain ca taramaja mi' con Cristo.

³⁰ Ac i ma' tara wari' co tomi' xaxa' ma' quem, om ta tama' coromicat e' cain ca tomi' xaxa' nucun. Ac i ma' tara wari' co tomi' querec te ma' quem, om ta tama' coromicat e' cain ca tomi' querec te nucun quem. Co cut carawa ma' quem, om ta win xumu cain carawa ca cut ca, win xumu e' tarain ca taramaja nucun pain ca taramaja mi' con Cristo.

³¹ Oro caramaji macan' ca ma' napari' ca', om ca na ne pain ca win xumu xin. Pi' pin ta' ara xi' na macan' ta.

³² Noc inuhu' pain ca toron ximama' ne xumuhu' ma'. Je ca tomi' xuhu' ca'. Wari' co om non narima' ma', coromicat nain caramaxicon Taramaxicon nexi' pain ca taramaja mi' con ma'. Ma' ta tomi' querec te capa' ta non.

³³ Wari' co ma' non narima' ma' iri na ne, coromicat nain caramaji macan'. Ma' ta tomi' querec te capa' narima' ne ta na.

³⁴ Tocwan ac ne na ca coromicat nucun. Ac i ma' na narima' co om nam tarama' ma' quem, narima' co wara mi' ca' nam taxicam ma', xojam' co om an querec tarama' ma' quem, coromicat nanain caramaxicon Taramaxicon nexi'. Ma' ta taramaja mi' xun ta nonon. Ma' ta hohot con oro ca ara nexi', ma' ta hohot con oro ca coromicat nexi' ta nonon. Narima' co ma' nam tarama' ma' iri na ne, coromicat nain caramaji macan'. Ma' ta tomi' querec te capa' tarama' ne ta na.

³⁵ Quep xiho' xim inuhu'. Je ca tomi' ac i ma' xuhu'. Om paxi' na ca narain ho' xuhu' pain ca cut wa narima'. Om paxi' na ca narain ho' xuhu' pain ca cut wa tarama' pain ca narima' nuhu' ma' quem. Param e' inuhu' pain ca xuruxut xo' wa. Param e' inuhu' pain ca om toron ximama' ne xumuhu' pain ca win xumu hun Taramaxicon nexi' ta.

³⁶ Tomi' ho' xim inuhu' con tarama' co wara tomi' xo' nam xojam' co an ta' ca ma', pain ca main an xim ta cam ma'. Mo ta querec pin' xucun pain ca om ara xo' nucun pain ca om an hap cam ma', pain ca mija pin ne cawaxi' nequem ma'. Mo ta jain jain cam pain ca param cam ma' quem, ara ac cain tara ca param nucun, an ac cam tara ta. Om ca caracat ca. Hohot na pain ca an xequequem.

³⁷ Mo ta wara an pe xo' cain ca coromicat nucun pain ca maho' tain ca an tam ta ca ma', mo ta maqui' nein iri' ximicon. Mo ta hwara' opa ca pain ca miri'om taxi' cain ca toron ne ximicon pain ca param cam ma', hohot na pain ca om an cam quem.

³⁸ Je ca tomi' xuhu' ca': Hohot paxi' na pain ca an cam. Ane hohot tamana ne pain ca om an cam ne.

³⁹ Narima' co ma' nam tarama' ma', pe ho' cara toron pain ca e' e' wet nucun. Mo ta mi' ca' cam taxicam ma', hohot na pain ca an cama xucun tarama' co param cama ma', co howa non Taramaxicon nexi'. An e' toron wari' co howa non Taramaxicon nexi' ta.

⁴⁰ Mo ta om an cama xucun tarama' ma', tomi' querec te tamana ac cama tara. Tomi' querec te pije' ca' tara pain ca an cama xucun tarama', tomi' querec te tamana tara pain ca om an cama xucun tarama'. Je i ma' ca coromicat ne cam. Ac ca maqui' nein Tamataracon Iri' Jam na ca coromicat ne ca' quem.