1 Coríntios 6 - Tradução Bíblica Pacaas Novos

Ca tomi' xo' cocon pain ca ara cup xucucun pain ca xere xucucun

¹ Ara cup pin iri xujuhu' pain ca xere xujuhu' ma' ne, pain ca howa hun Jeju ma', tomi' hwet ac huhun pain na oro juiz co om howa nana ma'. Cain' cain' xihwe quem? Para tomi' xo' xut pain ca ara cup xujuxut ca' huhun ma'? Om ca wixipa' hwe ra? Je xi tomi' xo' pan xujuhu' pain ca wari' nucun Iri' Jam hwe ma' quem?

² Cain' cain' xihwe quem? Om ca taxi' hwein i ca' ra, pain ca main tomi' xo' xuxun ururun pain ca ara cup xucucun oro wari' pain oro xijein macan' ca'? Je ca tomi' xuhu' ca', win ne ca main tomi' xo' xuxun ururun pain ca wari' nucun Iri' Jam iri' ca', je ca ha' cuhu' pain ca tomi' xo' taxi' xujuhu' pain ca ara cup wijimain xujuhu' pain xocori ca' quem.

³ Taxi' hwein i ca' quem, pain ca main tomi' xo' xuxun oro jam ma' quem. Je ca tomi' xuhu' ca': Om ta tomi' xo' taxi' xijexi' pain oro ca ara cup xijexi' pain macan' ca' ra? Tomi' xo' taxi' xijexi' ta.

⁴ Je ca tomi' xuhu' ca': Ma' iri nuhu' oro ca to' ara cup xujuhu' pain i ma' ne, wijimain paxi' na ca to' i'ina nuhu' ma', om xi tomi' xo' xut pain me huhun oro juiz co om howa nonon Jeju ta.

⁵ Tomi' ac i ma' inuhu', ma' ta wixipa' hwe inuhu'. Om nuhu' wari' co coromicat xo' taxi' ma', co tomi' xo' taxi' nonon oro win howa hwe pain ca ara cup pin xucucun ma' ra?

⁶ Ma' cuhu' ma' ira! Ane om ha' hwe ne. Ara cup pin iri xujuhu' pain ca xere xujuhu' ma' ne, pain ca howa hun Jeju ma', tomi' hwet ac huhun pain na oro juiz co om howa nana ma'.

⁷ Pain ca tomi' hwet huhun pain ca ara cup pin xujuhu' oro juiz ma', je i ma' ca an hwet pe hwein ca pan teretem tamana nuhu' ta. Je xi pin ca ma' pain ne xujuhu' quem? Je xi mixein ma' tarapa' ne xujuhu' quem?

⁸ Ane om ac i ma' hwe ne. Ara cup pan xujuhu'. Mixein pan xujuhu'. Para ac i ma' hwe pain ca xere xujuhu' ma' quem?

⁹ Cain' cain' xihwe quem? Om ca taxi' huhun oro caracat ma', pain ca om to' ho' xun cocon Iri' Jam pain ca taramaxicon pe nucun ra? Taxi' huhun ma' ira! Ma' tara xumuhu' me. Oro iri' caxicocon hwijima' co caracat nana pain ca quep ximama' caca ma', oro wari' co pe torotop mi' querec te nanain oro caji pacun ca Iri' Jam xi' ma caca ma', oro co quep nanam xequem narima' ma', oro narima' co quep ne nonon xucun tarama' ma', oro co quep caracan xucucun ma' quem,

¹⁰ oro wari' co cut noc xa nanain carawa ma', oro wari' co narain ho' xucucun pain carawa pain ca param ximama' nucucun ma', oro wari' co tama' toc tamanain to nanain caji tocwa ca mana' ma', oro wari' co tomi' ximama' nonon oro win ma' caca ma', oro wari' co quep em' nonon waximain carawa pain ca cut noc xa ca' cocon pain, om ta to ho' cocon Iri' Jam pain ca taramaxicon pe nucun ta.

¹¹ Ma' paxi' nana win ma' nuhu' co ac i ma' nana pain cara pane. Ane hohoc pin cuhu' pain ca caracat nuhu' Iri' Jam ne. Iri' wari' ne pin inuhu' ta nuhu'. To' hohot pin nuhu'. Xi om ca Taramaxicon nexi' Jeju Cristo pain Tamataracon pahu'.

Ca mene cain cwerexi' Iri' Jam

¹² Ma' nana win ma' nuhu' co tomi' ca' nana quem: Hohot na pain ca ara xin oro carawa ca param iri' na ca tomi' nucucun. Je i ma' ira, hohot paxi' na. Ane om quep xiho' quep xiho' pi' pin capari' oro carawa ca param iri' ne. Hohot paxi' na pain ca ara tain oro carawa ca param ta' ca'. Ane noc pan tain ne. Mo ta ara tain ta', ara ara. Mo ta om ha' capa' pain ca maho' tain quem, ac ca quep xat capa' tara. Noc inain ca quep xat capa' oro carawa ca ara ta' ta' ca'.

¹³ Ma' ac caca na xucucun co tomi' ca' nana quem: Mi' napari' pain carawa Iri' Jam, ma' ta ma'am hwe ta napari'. Je ca mi' capari' pain pemenexi' ca' quem, ma' ta ma'am hwein carawa ca cao' hwe ta napari' na ca tomi' caca quem. Je i ma' ira, iri'o' paxi' na ca tomi' nucucun ma'. Ane ara om pin tain cain carawa je pemenexi' Iri' Jam ne. Cwerexi' ma' iri na ne, om ca mi' capari' pain, ma' ta mam' quep ximama' hwein ta capari', om na. Xi wirico Taramaxicon nexi' ara ca co mene nain cwerexi'. Mam' taramaja mi' xine pain curuhu' ta napari'. Wirico co querec wet nain cwerexi' quem.

¹⁴ Main to' e' mami' tarapari' Iri' Jam quem. Win ne ca to' e' mami' con Taramaxicon nexi' Jeju Cristo pane. Je ca taxi' xun pain ca querec wet cain cwerexi' ca'.

¹⁵ Om ta coximinain curucun Cristo ne ma' hwein cwerexi' ca' ra? Coximinain curucun Cristo ne cwerexi' ca' ira, wara taxi' hwein i ma' ta. Hohot tara pain ca quep xim caxicam narima' pain ca coximinain curucun Cristo iri' ca' ra? Hohot tara pain ca an tapan' mi' xim pain coximinain curucun Cristo ra? Om na, om ca hohot camain' ne ta!

¹⁶ Mo ta quep xim caxicam narima' ma', ac ca xica' pe pin ne na cwerexi' pain cwerequem, wara taxi' hwein i ma' quem. Win ne ca xirao' pe xine pain capijacon Iri' Jam pane. Ca' na con pane. Co ma' 2 nana ma', quep iri xequequem ne, ac ca xica' pe pin ne na cwerequequem ta. Ac i ma' na ca xirao' pe xine pane.

¹⁷ Je ca tomi' xuhu' ca': Mo ta jao jao ma' xun Taramaxicon nexi' cwa', xica' pe pin ac ne na tamataraxi' pain Tamataracon quem.

¹⁸ Ta quep hwem xequem narima' me ta. Wahu' pain ca narima' hwe ma' quem, ta quep ne hun xucun tarama' me ta. Mo ta caracat iri', pain oro xijein ca caracat wa ma', om ca to' em' pin xin cwerexi'. Ane om ac i ma' ne pain ca quep ximama' iri' ca'. Mo ta quep ximama' iri', to' em' pan irin cwerexi' ta.

¹⁹ Cain' cain' xihwe quem? Om ca taxi' hwein i ca' ra, pain ca ac xirinain Tamataracon Iri' Jam ne curuhu' ma'? Ac xuru mahu' ta cuhu' Tamataracon Iri' Jam ma' ira. Corom pe ho' nuhu'. Mi' nuhu' pain Iri' Jam. Om ca mene pan hwein curuhu'.

²⁰ Wirico Iri' Jam ara xi' na co mene pan nain curuhu'. Xi om ne ca mam' to' witan ara cuhu' pain quicon Panxica ta. Je ta mam' tomi' ha' qui' hun pain curuhu' ma' quem. Ma' ta awi na Iri' Jam ta caca oro wari' pahu'.