1 Coríntios 5 - Tradução Bíblica Pacaas Novos

Ca pan to' cain taraxicocon con wari' co an nam manacon cote ca

¹ Tomi' xim inuhu' pain i ca' quem: Taraju inonon oro wari' co tomi' hwet nanapa' con win ma' nuhu' ma'. Tomi' ca' nanapa' con: Ma' na win ma' caca co quep ximao ta na ca tomi' hwet cacapa' con. Iri' caracat na ta nonon. Om ca awi camain' ne ca caracat nucun ta nonon. An pin nam manacon cote ca na ca tomi' hwet cacapa' con. Xi hohot na ta cacain i ma' co om howa nonon Iri' Jam ta. Noc nanain ta.

² Xin to xin to wet hwe pain ca ara cain i ma' ta! Je xi tomi' xaxa' qui' hwe con? Ac ca mi' pin mi' pin qui' ca ca nari nuhu' cwa' xira pain ca tomi' xaxa' hwe con ta. Wara xin hwet pin xuhun co ara nain i ma' ta. Om xi jao jao ma' cuhu' pain ca cut in xujuhu' ta.

³ Wara tomi' mi' inon pain ca wap wa ta. Om paxi' na ca pe ho' xuhu' pain cwere ca', ane pe ho' xuhu' pain tamatara ne. Ac ca pe ho' xuhu' na pain iri' cwere ca', pain ca tomi' mi' ton pain ca wap wa ca'. Tomi' ha' xine quem.

⁴ Cut in xi' iri xujuhu' pain ca an hwet hwein wixicon Taramaxicon nexi' Jeju ne, ac ca pe ho' xuhu' tara, pe ho' ac capari' tara ca hwara' opa nucun Taramaxicon nexi' Jeju Cristo quem.

⁵ Ca' ac hun tara, mi' ac hun tara con Caxicon Jam, quep xirac ac con tara, quep xirac ac cain tara curucun. Ma' ta witan ne tamataracon pain xec nein ca in qui' ta' nucun Taramaxicon nexi'.

⁶ Om xi xin to hwe pain ca hohot urut ca' ira hwe ma'. Mo ta caracat ca wari' ma' pahu', mo ta miri'om hun pain ca caracat nucun ma', quep quep pi' pin ac cuhu' tara ca caracat nucun. Wara taxi' ara xi' hwein i ma' ta. Win ne ca to' memerem nein capam' ma'. Maxoc wijimain iri xine ne, to' memerem to' memerem pi' pin ac nein na. Ac i ma' napari' ca caracat nucun win ma' nexi' quem. To' ara napari'.

⁷ Je ca tomi' xuhu' ca': Xin hwet pin jun co caracat ma'. Win urut pain ca judeu urut ca', pain ca xin hwet pin urut pain wara ca to' memerem nein capam' pain ca to' pa' pin xin urut pain wijimain taramaji ovelha ca to' mam' pe wet naparut pain ca to' witan qui' tococwa oro hwanana nuxut co to nanain Egito pane. Xin hwet pin jun, ma' ta hohot pin hwe. Wari' nucun Iri' Jam hwe ma' ira. Xi mi' pin caho' ara capari' Cristo pane ta. Win ne wijimain taramaji ovelha cocon oro hwanana pane, ma' ta witan ca' hwein ca wap wa pain ca caracat nuhu' ta nonon Iri' Jam pane. Ac i ma' napari' con Cristo pain ca mi' pin caho' capari' quem.

⁸ Je ca tomi' xuhu' ca': Tomi' querec te xun Cristo, mam' pe wet xun pain ca to' witan ca' capari' pain ca caracat nexi' ta. Ara iri xin ne, na e' na pain ca wara om cacapari' oro wari' co caracat nana ma', co pan teretem nana ma' quem. Tomi' querec te wi e' xuxun oro xerexi' co om mixein nana ma', co tomi' iri'o' nana ma' quem. Win caca oro hwanana co mam' tomi' querec te nanain capam' ca om joc wanan wa pain ca to' memerem nein ca an xiho' nain ca caracat wa pane.

⁹ Wara xirao' mi' ca' inuhu' pane: Moji'ac ca' jujun co quep nanam xequem narima' ma', wiricacam co quep ne nonon xucun tarama' ma' quem ta inuhu' pane. Ta jao jao ma' huhun me ta inuhu'.

¹⁰ Om paxi' na ca tomi' caho' xuhu' cocon oro wari' co om howa nonon Iri' Jam ma'. Co quep ximama' nana ma', co narain ho' xucucun pain carawa pain ca param ximama' nucucun ma', co cut noc xa nana carawa ma', co pe torotop mi' querec te nanain oro caji pacun ca Iri' Jam xi' ma caca ma' quem, om ca moji'ac ca' jujun caram ma' ta xuhu'. Mo xi moji'ac ca' xuxun huhun, na e' xira pain ca paca' hwein macan' ca', xi to to xam' ara cacain macan' oro wari' ta.

¹¹ Ane xirao' mi' ca' xuhu' cocon oro win howa hwe co caracat ca' nana pain xocori ca' ne. Moji'ac ca' jujun win ma' nuhu' co howa ina mixein nana pain ca caracat nucucun pain ca quep ximama' nucucun, ta jao jao ma' huhun me ta. Moji'ac ca' jujun co narain ho' xucucun pain carawa pain ca param ximama' nucucun ma'. Moji'ac ca' jujun co pe torotop mi' querec te nanain oro caji pacun ca Iri' Jam xi' ma caca ma'. Moji'ac ca' jujun co tomi' ximama' nonon oro win ma' caca ma', co tama' toc tamanain to nanain caji tocwa ca mana' ma', co cut noc xa nanain carawa ma' quem. Oro co ac i ma' nana pain ca howa ina mixein caca ma', moji'ac ca' ac huhun tara ta. Ta jao jao ma' huhun me ta. Om ta cao' to ho' huhun quem.

^12-13 Cain' cain' xita' quem? Tomi' mi' xitoton pain ca wap wa pain ca caracat nucucun oro wari' co om howa nonon Iri' Jam ra? Om na ta. Tomi' mi' pan totoron pain ca wap wa Iri' Jam ta. Wahu' iri na ne, na e' na pain ca tomi' mi' pan huhun pain ca wap wa oro win howa hwe co caracat nana ma'. Je ca xirao' pe xine pain capijacon Iri' Jam pane. Ca' na con pane: Xin hwet pin jun win ma' nuhu' co caracat ma' ta. Ac i ma' na ca xirao' pe xine pane.