1 Coríntios 4 - Tradução Bíblica Pacaas Novos

Ca taramaja mi' cocon Cristo oro apóstolo

¹ Je ca tomi' xuhu' ca'. Na e' na pain ca querec pin' querec pin' pi' pin maparut pain ca taramaja mi' urut con Cristo ta. Querec pin' xut pain ca mi' pan caparut pain ca taramaja nuxut pain ca tomi' hwet jein ca coromicat xo' nucun Iri' Jam ca om an hwet querec ca pane caparut quem.

² Wari' co taramaja mi' non taramaxicon ma', na e' na pain ca taramaja xo' ca. Na e' na pain ca tomi' ha' cara con ta.

³ Am tomi' em' mahu' pain ca taramaja ne ca', am om tomi' ximama' mahu' pain, om ca toron capa' xumu pahu'. Am tomi' em' cacapa' oro taramaxicon cwa' quem, am om tomi' em' cacapa' pain, je i ma' ira, om ca toron capa' xumu. Om ca tomi' em' pan xije quem, om na.

⁴ Tara, ac ca om em' ta' na, tara pata' ta'a, om ca toron capa' xumu. Om paxi' na ca toron capa' xumu ca', ane om to' awi capa' ca om toron capa' xumu ca' ne. Wirico Taramaxicon nexi' pan co taxi' napa', wirico tara co tomi' napa' pain ca taramaja ne ca'. Mo ta taramaja xo' ta', mo ta om taramaja xo' ta', tomi' pan ac capa' tara pain.

⁵ Je ca tomi' xuhu' ca': Ta tomi' em' hap huhun pain ca taramaja nucucun oro wari' me ta. Winim' jein xec nein ca in qui' ta ca Taramaxicon nexi'. Wirico tara co an hwet pin tain nain oro ca coromicat nucucun oro wari' ca joc xim caca ira. Para taramaja mi' cocon Cristo quem? Om na, wirico tara co to' querec pin' napari' pain oro ca coromicat nucucun pain ca taramaja mi' cocon ma'. Wirico tara co tomi' nonon oro wari' co taramaja xo' nana. Mo ta taramaja xo' caca pain ca e' e' wet nucucun pane, hohot ma ta ac cocon tara, taramaja xo' ma ma' ira ac cocon tara, tomi' tomi' xam' ac cocon tara ta.

⁶ Pain ca tomi' joc mam' mi' xuhu' ne, pain ca tomi' mi' tain ca oin' xine tocwi ma', je pain ca tomi' mi' tain ca quep xine xirim ma', je pain ca tomi' mi' ton wari' co taramaja mi' non taramaxicon nucun ma' quem, tomi' mi' e' inain ta xere. Ma' ta quep xiho' xuhu' inuhu'. An hwet inain wuxu, an hwet inain wixicon Apolo quem. Ma' ta taraju pa' hwein ca tomi' ca Iri' Jam ta inuhu'. Xin to maho' je pain ca tomi' querec te paxica' huhun wari' co pijim' nunuhu' ma' ta napari'.

⁷ Xi awi tiquin' ca' xujuhu' ta. Oro caramaxicon Iri' Jam ca', wirico co mi' nuhu' pain. Je xi om tomi' xec xec qui' hwe quem? Ac ca om querec pin' hun a xira pain ca mi' cuhu' pain ta.

⁸ Wara ma' naparut xi' ma hwein oro carawa ca param pan hwe ma'. Wara caramaju pin urut xi' ma hwe ma' quem. Om ca taramaxicon hwe ta maparut. Taramaxicon pan urut, xi taxi' tiquin' ca' urut pahu' ta maparut. Ac i ma' na ca coromicat ximama' nuhu' ma'. Wa urut pahu' ta! Taramaxicon iri'o' xirara na urut pahu'. Taramaxicon wi ac urut pahu' xira.

⁹ Xi taramaxicon urut pain ca apóstolo urut ta. Om ca taramaxicon je caparut Iri' Jam, ac ca narain ho' caparut na pain ca taramaxicon wa. Ac ca mi' e' caparut na pain ca om hwara' opa camain' urut, ac ca an xiho' urut cocon na oro wari' co to' parapa' pin xi' wawa ma'. Ac ca querec querec cono' pin xut pahu' ta cacaparut na oro wari' cocon oro jam co taramaja mi' nonon Iri' Jam ma' quem.

¹⁰ Ac ca tomi' em' ca' maparut na: Tamanain pan hwe pain ca pijim' hwet hwein capijacon Cristo ma'. Warut cwa' iri na ne, taraju pa' pan urut, xi om ne ca win cwere ara urut con Cristo ta, ac i ma' na ca tomi' em' maparut ma'. Tomi' em' ca' maparut quem: Om ca hwara' opa hwe. Warut iri na ne, hwara' opa tamana urut, ac i ma' maparut. Tomi' em' ca' maparut quem: Tomi' querec te pan nanaparut oro wari', noc pan nunuhu' quem, ac i ma' na tomi' em' maparut ta.

¹¹ Qui' urut pain oro carawa ca ara naparut ca' ira. Wara ximin urut pain cara pane, ximin ximin wet urut pain xocori ca' quem. Tama' pe' urut. Werewein taxipa' na womuxut. Quep em' nanaparut pain ca to' cacaparut pain micocon. Om taxipa' naparut xirim ca to xo' urut.

¹² Tama' jam' urut pain ca taramaja tamana nuxut pain ca cut xin carawa ca cao' wa ta urut. Tomi' noro iri nanaparut oro wari' ne, tomi' querec te ac urut cocon na, ara mi' turuhu' pain ca awi wa Iri' Jam ta ac urut cocon na. Quep em' iri nanaparut ne, quereme ac urut cocon na quem.

¹³ Tomi' em' iri nanaparut ne, tomi' taxi' tamana ac urut cocon na. Ac carawa ca om awi ta hwe, ca wixicao' caca oro wari' ma' nanaparut, ac wari' co cunu homiricocon hwe ta nanaparut. Wara ac i ma' nanaparut pane, mao ac ne ma' na parut, ac i ma' ac i ma' wet nanaparut pain xocori ca' quem.

¹⁴ Om ca xirao' mi' ac i ma' xuhu', ma' ta wixipa' hwe ta xuhu', om ca coromicat ac i ma' ta' pain ca xirao' mi' xuhu' ca'. Hu e' inuhu'. Ac ca mana panxita' xuhu' na pain ca hu xuhu' ca'. Om ca noc xuhu'.

¹⁵ Mija paxi' tatara oro co ca' na nunuhu' ma', pain ca howa hun Cristo ma'. Ma' 10.000 paxi' tatara, ane om mija caca co te hwe ma' ne. Xica' pe ina. Ac ca te mahu' na, xi wata' ara ne co pijim' mi' cain' nuhu' pain capijacon Iri' Jam con Jeju pain ca to' witan xim cuhu' pane. Howa ac hun na Cristo Jeju.

¹⁶ Je ca tomi' mip xuhu' ca': An xiho' xine pain ca xut xo' ne pain ca howa ton Cristo ca' me inuhu'.

¹⁷ Je ca mam' xuhu' con Timóteo cwa', co tomi' querec te tamana ta' cwa'. Ac ca panxita' ton na. Taramaja xo' na, tomi' ha' taxipa' non Taramaxicon nexi' quem. To' mam' pe wet turuhu' pain ca xut xo' ne ca', pain ca win cwere ton Cristo Jeju. Je ca ca' na toton pain oro xijein macan' ma' quem, pain ca hwet toton pain ca cut in to xucucun pain ca howa cocon Jeju ma'.

¹⁸ Ma' nana oro win ma' nuhu' co xin to nana ma'. Coromicat ca' nana: Om ta hwet mami' capari' Paulo, xi jin' ara capari' ta nana pain ca coromicat nucucun.

¹⁹ Ane hwet xim xuhu' ne. Mo ta param mi' capa' pain ca hwet xuhu' Taramaxicon nexi', hwet ac xuhu' tara. Om ta om om ta', hwet ho' xuhu'. Querec pin' ac toton tara co xin to nana ma' pahu'. Am tomi' capijacocon e' caca, am an hwet iri'o' cacain ca hwara' opa nein Tamataracon Iri' Jam, querec pin' ac toton tara.

²⁰ Mo ta tomi' capijacocon e' caca pain ca taramaxicon pe ho' naparut Iri' Jam ta caca ma', mo ta om querec pin' tococwa pain ca pe ho' cocon ca hwara' opa nein Tamataracon ma', taxi' ac tococwa na pain ca om iri'o' nucucun.

²¹ Je ca tomi' xuhu' ca': Cain' cain' xita' pain ca aram aram hwet xuhu' ma' quem? Ma' carawa ca param hwe pata'? Param mahu' pain ca wap xuhu' ra? Param mahu' pain ca tomi' querec te xuhu' pain ca tomi' wixite xuhu' ra? Taxi' pan je ta.